అమెరికా తరిమికొడుతోంది.. కెనడా క్యాష్ చేసుకుంటోంది

అమెరికాలో డొనాల్డ్ ట్రంప్ ప్రభుత్వం తీసుకున్న హెచ్‌-1బీ వీసా ఫీజు పెంపు నిర్ణయం అంతర్జాతీయ వలసల రంగంలో కలకలం సృష్టిస్తోంది. వీసా ఫీజును ఏకంగా లక్ష డాలర్లకు పెంచడంతో ప్రపంచవ్యాప్తంగా ఉన్న ఐటీ నిపుణులు, విదేశీ విద్యార్థులు తీవ్ర ఆందోళన వ్యక్తం చేస్తున్నారు. ఈ భారీ పెంపు కారణంగా అమెరికన్ కంపెనీలు హెచ్‌-1బీ అభ్యర్థుల నియామకంలో వెనకడుగు వేస్తున్నాయి.

*కెనడాకు గోల్డెన్ ఛాన్స్! కొత్త ఇమ్మిగ్రేషన్ ప్లాన్

అమెరికా నిర్ణయంతో నిరుత్సాహానికి గురవుతున్న ప్రతిభావంతులైన వలసదారులను తమవైపు ఆకర్షించేందుకు కెనడా ప్రభుత్వం ఒక తెలివైన కొత్త వ్యూహాన్ని సిద్ధం చేస్తోంది.

కెనడా ప్రధాని మార్క్ కార్నీ ప్రకటించిన ప్రకారం, రాబోయే బడ్జెట్‌లో కొత్త వలస ప్రణాళికను ప్రవేశపెట్టనున్నారు. దేశ ఆర్థిక, సామాజిక అవసరాలకు అనుగుణంగా వలస విధానంలో కీలక సవరణలు చేయనున్నారు. అమెరికాలో వీసా సంక్షోభం ఎదుర్కొంటున్న నైపుణ్య నిపుణులను తమ దేశానికి మళ్లించడమే ఈ కొత్త పాలసీ ప్రధాన లక్ష్యం. మాజీ ప్రధాని జస్టిన్ ట్రూడో కాలం నాటి వలస పరిమితులను కొనసాగిస్తూనే, దేశ అవసరాలకు తగ్గట్టుగా వాటిని సర్దుబాటు చేయనున్నారు.

టెక్ కంపెనీలపై హెచ్‌-1బీ ప్రభావం

అమెరికా ప్రకటించిన హెచ్‌-1బీ వీసా ఫీజు పెంపు టెక్ రంగంలో పెద్ద గందరగోళానికి దారితీసింది. కంపెనీలపై భారం పెరుగుతుండటంతో, అనేక సంస్థలు వీసా దరఖాస్తు ప్రక్రియను తాత్కాలికంగా నిలిపివేస్తున్నాయి. వాల్‌మార్ట్ , టాటా కన్సల్టెన్సీ సర్వీసెస్ వంటి పెద్ద సంస్థలు ఇప్పటికే వీసా ఆధారిత నియామకాలను తాత్కాలికంగా నిలిపివేస్తున్నట్లు ప్రకటించాయి. అమెరికాలో చదువుకొని ఉద్యోగాల కోసం హెచ్‌-1బీ వీసా దరఖాస్తు చేసుకునే విద్యార్థులకు ఫీజు మినహాయింపు ఉన్నప్పటికీ, మొత్తం భారం కంపెనీలపైనే పడుతుంది.

టెక్ నిపుణులకు కెనడా కొత్త గమ్యం

అమెరికాలో పెరుగుతున్న వీసా వ్యయాలు, అస్థిర విధానాల నేపథ్యంలో అనేక మంది ఐటీ నిపుణులు, స్టార్టప్ వ్యవస్థాపకులు కెనడాను ప్రత్యామ్నాయ గమ్యంగా చూస్తున్నారు. ఇప్పటికే టొరంటో , వాంకూవర్ వంటి కెనడా నగరాలు సాంకేతిక రంగంలో వేగంగా అభివృద్ధి చెందుతున్నాయి. ఈ కొత్త వలస ప్రణాళికతో ఆ దేశంలోని టెక్ రంగం మరింత బలపడే అవకాశం ఉంది.

అమెరికా వీసా విధానాల కఠినత వల్ల కలిగే ప్రతికూలతలను కెనడా తెలివిగా అవకాశాలుగా మార్చుకుంటోంది. హెచ్‌-1బీ కలలు కంటున్న ప్రతిభావంతులైన యువతకు ఇది కొత్త ఆశను అందిస్తోంది. రానున్న నెలల్లో కెనడా ప్రకటించబోయే ఇమ్మిగ్రేషన్ పాలసీ అంతర్జాతీయ స్థాయిలో కీలక చర్చలకు దారి తీసే అవకాశం ఉంది.