తీరని కల.. కలగానే మిగిలింది.. కెనడాలో ఇండియన్ స్టూడెంట్ పైలట్ దుర్మరణం

కెనడాలో జరిగిన ఒక దుర్ఘటనలో భారతీయ విద్యార్థి పైలట్ ప్రాణాలు కోల్పోయాడు. కెనడాలోని మెనిటోబా రాష్ట్రంలో ఉన్న స్టైన్‌బాచ్ సౌత్ ఎయిర్‌పోర్ట్ సమీపంలో మంగళవారం రెండు శిక్షణ విమానాలు గాలిలో ఢీకొన్న ప్రమాదంలో ఇద్దరు విద్యార్థి పైలట్లు మృతి చెందారు. మృతుల్లో ఒకరు భారతీయ మూలాలు కలిగిన 21 ఏళ్ల శ్రీహరి సుకేష్ కాగా.. మరొకరు 20 ఏళ్ల కెనడా యువతి సవానా మే రోయెస్. ఈ ప్రమాదం ప్రముఖ పైలట్ శిక్షణ కేంద్రం అయిన హార్వ్స్ ఎయిర్కు కేవలం 400 మీటర్ల దూరంలో చోటు చేసుకుంది. మృతి చెందిన ఇద్దరు విద్యార్థులు కూడా అదే సంస్థలో శిక్షణ తీసుకుంటున్నవారే కావడం విషాదకరం.

- విషాద ఘటన వివరాలు

హార్వ్స్ ఎయిర్ అధ్యక్షుడు ఆడమ్ పెన్నర్ తెలిపిన వివరాల ప్రకారం.. శ్రీహరి , సవానా ఇద్దరూ సింగిల్-ఇంజిన్ సెస్‌నా విమానాల్లో టేకాఫ్ , ల్యాండింగ్ ప్రాక్టీస్ చేస్తున్నారు. వారు ఇద్దరూ ఒకేసారి ల్యాండ్ అవ్వడానికి ప్రయత్నించడంతో విమానాలు గాల్లోనే ఒకదానికొకటి ఢీకొన్నాయి. విమానాల్లో రేడియోలు ఉన్నా, ఒకరినొకరు గుర్తించకపోవడం వల్లే ఈ ప్రమాదం జరిగిందని తెలుస్తోంది.

- శ్రీహరి సుకేష్ గురించి

కేరళకు చెందిన శ్రీహరి సుకేష్ ఇప్పటికే ప్రైవేట్ పైలట్ లైసెన్స్ పొందాడు. ప్రస్తుతం అతను కమర్షియల్ పైలట్ కోర్సు అభ్యసిస్తున్నాడు. చిన్న వయసులోనే పైలట్ కావాలన్న కలను నిజం చేసుకుంటూ ఉన్న సమయంలోనే ఈ ప్రమాదం అతడి జీవితాన్ని బలిగొంది.

- భారత దౌత్యప్రతినిధుల స్పందన

టొరాంటోలోని భారత కౌన్సులేట్ జనరల్ ఈ ఘటనపై తీవ్ర విచారం వ్యక్తం చేసింది. "శ్రీహరి సుకేష్ అనే యువ భారత విద్యార్థి పైలట్‌ గాలిలో జరిగిన ప్రమాదంలో మృతిచెందిన వార్త తీవ్ర దిగ్భ్రాంతిని కలిగించింది. మేము ఆయన కుటుంబానికి ప్రగాఢ సంతాపాన్ని తెలియజేస్తున్నాం. కుటుంబానికి అవసరమైన అన్ని సహాయాలను అందించేందుకు మేము స్థానిక పోలీస్, శిక్షణ సంస్థతో సంప్రదింపులో ఉన్నాం," అని ఒక ప్రకటనలో వెల్లడించింది.

- హార్వ్స్ ఎయిర్ గురించి

1970లలో స్థాపితమైన హార్వ్స్ ఎయిర్ ఒక కుటుంబ ఆధ్వర్యంలోని విమాన శిక్షణ కేంద్రం. ప్రపంచం నలుమూలల నుంచి వచ్చిన సుమారు 400 మంది శిక్షణార్థులు ఇక్కడ శిక్షణ పొందుతున్నారు. కమర్షియల్ పైలట్లు, రిక్రియేషనల్ పైలట్‌లు ఇక్కడ శిక్షణ పొందే అవకాశం ఉంటుంది.

ప్రస్తుతానికి ఈ ఘటనపై దర్యాప్తు కొనసాగుతోంది. విద్యార్థి పైలట్ల భవిష్యత్తుపై కలలు కన్న కుటుంబాలకు ఇది తీరని నష్టం.