వీసా రద్దు : అమెరికా సర్కార్ పై గెలిచిన ఒక భారతీయ విద్యార్థి

ముందుగ మురిస్తే పండుగ కాదన్న వాస్తవం అమెరికా సర్కార్ తెలిసి వస్తోంది. కోర్టులు షాకులిస్తూ తెలియజేస్తున్నాయి. ట్రంప్ వచ్చాక విదేశీ విద్యార్థులను అమెరికాలో వేటాడుతున్నారు. వారు గతంలో చేసిన తప్పులను తవ్వితీస్తున్నారు. చిన్న కేసు నమోదైనా సరే వారి వీసా రద్దు చేసి దేశం విడిచివెళ్లిపోవాలని హుకూం జారీ చేస్తున్నారు. అసలు న్యాయ అన్యాయాలు.. కేసులు విచారించకుండానే వీసాల రద్దు చేసేస్తున్నారు. దీంతో అమెరికాలో విదేశీ విద్యార్థులకు గడ్డు కాలం నడుస్తోంది. ఇలానే ఓ భారతీయ విద్యార్థి వీసాను రద్దు చేశారు. అతడు పబ్ నుంచి బయటకొచ్చి ఒక గుంపుతో గొడవపడ్డాడని వీసా బ్యాన్ చేశారు. అయితే దీనిపై ఆ విద్యార్థి అమెరికా సర్కార్ పై న్యాయ పోరాటం చేసి గెలిచాడు. అతడి విజయం ఇలానే వీసా రద్దు చేయబడ్డ ఎంతో మంది భారతీయ విద్యార్థులకు స్ఫూర్తిగా నిలుస్తోంది. అందరూ ఈ తీర్పును చూసి ఇప్పుడు కోర్టులకు ఎక్కేందుకు రెడీ అవుతున్నారు.

అమెరికాలో విద్యనభ్యసిస్తున్న ఒక భారతీయ విద్యార్థికి ఊరట లభించింది. విస్కాన్సిన్-మాడిసన్ విశ్వవిద్యాలయంలో ఇంజనీరింగ్ చదువుతున్న కృష్ణ లాల్ ఇస్సర్దాసాని అనే 21 ఏళ్ల విద్యార్థి వీసాను రద్దు చేస్తూ ట్రంప్ ప్రభుత్వం తీసుకున్న చర్యలను అమెరికా కోర్టు న్యాయమూర్తి తాత్కాలికంగా నిలిపివేశారు. ఏప్రిల్ 15న వెలువడిన ఈ ఉత్తర్వులు హోమ్‌ల్యాండ్ సెక్యూరిటీ విభాగం ఇస్సర్దాసానిపై ఎలాంటి చర్యలు తీసుకోకుండా నిషేధిస్తుంది. వచ్చే మే ప్రారంభంలో కంప్యూటర్ ఇంజనీరింగ్‌లో బ్యాచిలర్ డిగ్రీ పొందనున్న ఇస్సర్దాసానికి ఈ తీర్పు ఒక పెద్ద ఊరటనిచ్చింది.

ఈ న్యాయ పోరాటం అమెరికా విద్యార్థి వీసాల రద్దు.. స్టూడెంట్ అండ్ ఎక్స్ఛేంజ్ విజిటర్ ఇన్ఫర్మేషన్ సిస్టమ్ (SEVIS) నుండి రికార్డుల తొలగింపు వంటి వివాదాస్పద అంశాలపై భారతీయ విద్యార్థులకు ఒక గొప్ప ఆయుధంగా మారనుంది.. దేశవ్యాప్తంగా వందలాది మంది అంతర్జాతీయ విద్యార్థుల SEVIS రికార్డులు ఊహించని విధంగా రద్దు చేయబడ్డాయి. 1952 నాటి విదేశీ విధాన చట్టాన్ని ఉటంకిస్తూ దాదాపు 29 రాష్ట్రాల్లోని విద్యార్థుల వీసాలు రద్దు చేయబడ్డాయి. గతంలో డ్రైవింగ్ చేస్తూ మద్యం లేదా మాదక ద్రవ్యాలు సేవించినందుకు (DUI) వంటి ఆరోపణలు ఎదుర్కొన్న మరికొందరి వీసాలు కూడా రద్దు చేయబడ్డాయి. వారికి ఈ విద్యార్థి కోర్టులో విజయం ఒక స్ఫూర్తిదాయకంగా మారింది.

ఫెడరల్ డిస్ట్రిక్ట్ జడ్జి విలియం కాన్లీ మంగళవారం ఇచ్చిన తీర్పులో యూడబ్ల్యూ-మాడిసన్ విద్యార్థి క్రిష్ ఇస్సర్దాసాని F-1 విద్యార్థి వీసాను రద్దు చేయకుండా సమాఖ్య ఇమ్మిగ్రేషన్ అధికారులను తాత్కాలికంగా నిలిపివేస్తూ ఆదేశాలు ఇచ్చారు. ఇస్సర్దాసాని రికార్డును ప్రభుత్వం SEVIS డేటాబేస్ నుండి తొలగించిందని మాడిసన్ న్యాయవాది షబ్నమ్ లోట్ఫీ తాత్కాలిక నిరోధక ఉత్తర్వు కోసం అభ్యర్థన దాఖలు చేశారు.

ఈ సందర్భంగా న్యాయవాది లోట్ఫీ మాట్లాడుతూ "ఈ అంతర్జాతీయ విద్యార్థులు ఎటువంటి తప్పు చేయలేదు. వారు తమ విద్యార్థి హోదా షరతులను పూర్తిగా పాటించారు. అమెరికా చట్టానికి కట్టుబడి ఉన్నారు. అమెరికా ప్రభుత్వం చేస్తున్నది న్యాయం కాదు. అమెరికా ఈ అన్యాయాన్ని ఖండించాలి. తమ రాజకీయ ఎజెండాకు అనుగుణంగా వాస్తవాలను వక్రీకరించకుండా పరిపాలనను నిరోధించాలి" అని ఆయన వాదించారు.

కోర్టు తీర్పు ప్రకారం.. నవంబర్ 22, 2024న ఇస్సర్దాసాని, అతని స్నేహితులు ఒక పబ్ నుండి బయలుదేరిన తర్వాత మరో గుంపు వ్యక్తులతో గొడవపడ్డారని.. ఇస్సర్టాసానిని దుష్ప్రవర్తన ఆరోపణలపై అరెస్టు చేశారు. అయితే ఇస్సర్దాసాని ఎప్పుడూ కోర్టుకు హాజరు కాలేదని.. డేన్ కౌంటీ డిస్ట్రిక్ట్ అటార్నీ ఇస్మాయిల్ ఓజాన్నే ఈ కేసులో అతనిపై అభియోగాలు మోపడానికి నిరాకరించారని తీర్పు తెలిపింది.

జడ్జి కాన్లీ తన తీర్పులో ఇస్సర్దాసాని ఎటువంటి నేరానికి పాల్పడినట్లు రుజువు కాలేదని.. అతని వీసా రద్దు చట్టవిరుద్ధమని పేర్కొన్నారు. ఏప్రిల్ 28న ఈ విషయంపై ప్రాథమిక ఇంజక్షన్ విచారణను ఆయన నిర్ణయించారు.

ఈ ఉత్తర్వు తమ రికార్డులు రద్దు చేయబడిన ఇతర విదేశీ విద్యార్థి వీసాదారులకు దేశవ్యాప్తంగా లభించిన మొట్టమొదటి విజయాలలో ఒకటిగా పరిగణించబడుతోంది. ఈ పరిణామం భవిష్యత్తులో ఇలాంటి సమస్యలు ఎదుర్కొంటున్న విద్యార్థులకు ఒక ఆశాకిరణంగా నిలుస్తుందని భావిస్తున్నారు. రద్దు కారణంగా ఇస్సర్దాసాని తన డిగ్రీని పూర్తి చేయలేడు.. విద్యార్థి వీసా ఉన్నప్పుడే అర్హత పొందే ఒక ప్రత్యేక ఉద్యోగ కార్యక్రమానికి దరఖాస్తు చేసుకోలేడు. ఇప్పుడు కోర్టు ఇచ్చిన తాత్కాలిక స్టే కారణంగా అతనికి ఊరట లభించింది.