'గారె'ల వాసనకు పడిపోయారు.. ఇండియన్ అతిథి మర్యాదకు నెటిజన్ల ప్రశంసలు!

మనకు నోరూరించే వంట వాసన తగిలినా, అది చూసినా "ఎవరో భలే వండుతున్నారు గురూ!" అనిపిస్తుంది కదా. అమెరికాలో ఇద్దరు వ్యక్తులకు కూడా అలాంటి అనుభూతే కలిగింది. అయితే, వారు ఏం వండుతున్నారో తెలియదు. ఆకలిగా ఉందో, లేక ఆ తెలియని వంట వాసనపై ఆసక్తి కలిగిందో తెలీదు కానీ, ఆ వాసనను పట్టుకుని వెళ్లారు. ఒక భారతీయ మహిళ ఇంటి తలుపు తట్టారు. "మీ ఇంట్లో చాలా మంచి వాసన వస్తోంది. ఏం వండుతున్నారు?" అని అడిగారు.

ఆమె "గారెలు" వండుతున్నానని చెప్పడం ఆశ్చర్యం కాదు కానీ, ఆ తర్వాత జరిగినదే వైరల్ అయ్యింది. ఆ మహిళ వెంటనే "ఇదిగోండి.. మీరు రెండు గారెలు తినండి" అంటూ వాటిని పళ్ళాల్లో పెట్టి, కొబ్బరి పచ్చడితో సహా వారికి వడ్డించింది. ఈ సంఘటన ఇంటర్నెట్‌లో ఎంతగానో వైరల్ అవుతోంది. ఈ సంఘటన పది రోజుల క్రితం అమెరికాలోని మిన్నెసోటాలో జరిగింది. పేవ్‌మెంట్‌లను శుభ్రం చేస్తున్న ఇద్దరు అమెరికన్లు భారతీయ వంటకం (గారెల) వాసనకు పడిపోయి, ఆ ఇంటికి వెళ్లిన దృశ్యాన్ని స్వయంగా ఆ కంపెనీయే వీడియో తీసి 'ఎక్స్' ప్లాట్‌ఫామ్‌లో పోస్ట్ చేసింది.

ఈ వైరల్ వీడియో కేవలం పది రోజుల్లోనే కోటి (10 మిలియన్) కంటే ఎక్కువ వ్యూస్ పొందింది. ఈ వీడియో చూసిన నెటిజన్లు కూడా "అంటే ఇది ఇండియన్ అంటే!", "అతిథి మర్యాదకు రియల్ ఎక్జాంపుల్" అంటూ భారతీయ సంస్కృతిని, ఆతిథ్యాన్ని వివిధ రకాలుగా ప్రశంసిస్తూ కామెంట్లు చేశారు. వారు చెప్పినట్లు "వినాలంటే భారతం వినాలి, తింతే గారెలు తినాలి!!" అనిపించేలా ఈ ఘటన ప్రపంచవ్యాప్తంగా భారత సంస్కృతికి మంచి గుర్తింపు తెచ్చింది.