అమెరికాపై గెలిచిన భారతీయ విద్యార్థిని.. అందరికీ ఆదర్శం

అమెరికాలో ఉన్నత విద్యను అభ్యసిస్తున్న భారతీయ పీహెచ్‌డీ విద్యార్థిని ప్రియ సక్సేనా, తనపై ట్రంప్ ప్రభుత్వం చేపట్టిన అకస్మిక డిపోర్టేషన్ (బహిష్కరణ) ప్రయత్నాన్ని చట్టపరంగా దీటుగా ఎదుర్కొని, ఫెడరల్ కోర్టు ద్వారా విజయం సాధించారు. చిన్న ట్రాఫిక్ ఉల్లంఘనను కారణంగా చూపి ఆమె వీసాను రద్దు చేయడాన్ని కోర్టు కొట్టివేసింది.

28 ఏళ్ల ప్రియ సక్సేనా దక్షిణ డకొటా స్కూల్ ఆఫ్ మైన్స్ అండ్ టెక్నాలజీ లో కెమికల్ & బయాలాజికల్ ఇంజినీరింగ్‌లో పీహెచ్‌డీ చివరి దశలో ఉన్నారు. ఆమె చట్టబద్ధంగా మంజూరైన F-1 స్టూడెంట్ వీసా కలిగి ఉన్నారు. అయితే, 2024 ఏప్రిల్‌లో అమెరికా హోంల్యాండ్ సెక్యూరిటీ డిపార్ట్‌మెంట్ (DHS) ఎటువంటి ముందస్తు నోటీసు లేకుండా ఆమె వీసాను అకస్మాత్తుగా రద్దు చేసింది. దీనికి కారణంగా ఆమెపై ఉన్న "క్రిమినల్ రికార్డ్" అని పేర్కొంది.

కానీ, వాస్తవానికి ఆ క్రిమినల్ రికార్డ్ కేవలం 2021లో జరిగిన ఒక చిన్న ట్రాఫిక్ ఉల్లంఘన. ఎమర్జెన్సీ వాహనానికి దారి ఇవ్వకపోవడం మాత్రమే. ఇందుకు ఆమె అప్పట్లోనే ఫైన్ చెల్లించి, విషయాన్ని పరిష్కరించారు. ఇలాంటి లఘు నేరాలు అమెరికా వలస చట్టాల ప్రకారం డిపోర్టేషన్‌కు కారణం కాబోవు అని ప్రియ న్యాయవాది కోర్టులో బలంగా వాదించారు. వీసా రద్దు చేయడంతో పాటు, ఆమె స్టూడెంట్ ఎక్స్ఛేంజ్ అండ్ విజిటర్ ఇన్ఫర్మేషన్ సిస్టమ్ (SEVIS) రికార్డ్ కూడా తొలగించబడింది. దీంతో మే 10న పీహెచ్‌డీ పట్టా పొందే అవకాశం ఆమెకు దూరం అవుతుందనే తీవ్ర ఆందోళన నెలకొంది.

న్యాయ పోరాటం - విజయం:

ఈ నేపథ్యంలో, ప్రియ సక్సేనా తనపై తీసుకున్న చర్యను సవాలు చేస్తూ ఏప్రిల్ మధ్యలో ట్రంప్ ప్రభుత్వంపై ఫెడరల్ కోర్టులో కేసు దాఖలు చేశారు. కేసును విచారించిన ఫెడరల్ జడ్జి తొలుత ప్రియకు అనుకూలంగా తాత్కాలిక ఆదేశం జారీ చేసి, ఆమె విద్యాభ్యాసం కొనసాగించే హక్కును కల్పించారు. ఈ తాత్కాలిక ఉపశమనంతో, ప్రియ విజయవంతంగా తన డాక్టరేట్ పట్టాను ఈ మధ్య కాలంలో పొందారు. తాజాగా, ఈ వారం ఫెడరల్ కోర్టు మరో కీలక ముందస్తు ఉత్తర్వు ఇచ్చింది. ఈ ఉత్తర్వు ప్రకారం, డీహెచ్.ఎస్ ఆమెను అరెస్టు చేయడానికి లేదా నిర్బంధించడానికి కోర్టు అనుమతి లేకుండా ఎటువంటి చర్యలు తీసుకోవడానికి వీల్లేదు. జడ్జి తన తీర్పులో డీహెచ్.ఎస్ చర్యలు చట్ట విరుద్ధంగా కనిపిస్తున్నాయని మరియు ప్రియకు శాశ్వత నష్టం కలిగించవచ్చని స్పష్టం చేశారు.

వలసదారులపై కఠిన వైఖరి విద్యార్థులపై ప్రభావం:

వలసదారులపై కఠిన వైఖరితో ఉన్న ట్రంప్ పాలన, 2025లో తిరిగి అధికారంలోకి వచ్చిన తర్వాత తన చర్యలను మరింత కఠినతరం చేసింది. అంతర్జాతీయ విద్యార్థులు కూడా ఈ కఠిన చర్యల వల్ల తీవ్రంగా ప్రభావితమవుతున్నారు. చిన్నచిన్న కారణాలతో వేలాది వీసాలు, సెవిస్ రికార్డులు రద్దు చేయబడినట్లు తీవ్ర ఆరోపణలు వెలువడుతున్నాయి.

ఇటీవల కోర్టులో దాఖలు చేసిన అఫిడవిట్‌లో, డీహెచ్.ఎస్ ఒక మిలియన్‌కు పైగా అంతర్జాతీయ విద్యార్థుల వివరాలను ఎఫ్.బీఐ డేటాబేస్ ద్వారా స్కాన్ చేశామని, అందులో 6,400 కేసుల్లో "మ్యాచ్" లభించిందని, వాటిలో సుమారు 3,000 వీసాలు రద్దు చేశామని స్వయంగా అంగీకరించింది. అయితే, ఈ విధంగా రద్దు చేయబడిన చాలా మంది విద్యార్థులు వాస్తవానికి చట్టబద్ధంగా అమెరికాలో నివసిస్తున్నవారే.

ప్రియ విజయం - ఇతరులకు స్ఫూర్తి

ఈ నేపథ్యంలో, ప్రియ సక్సేనా తన న్యాయ పోరాటంలో సాధించిన విజయం అమెరికాలో ఉన్న వేలాది మంది అంతర్జాతీయ విద్యార్థులకు, ముఖ్యంగా చిన్నపాటి కారణాలతో ఇబ్బందులు పడుతున్న వారికి గొప్ప ఆశాకిరణంగా మారింది. చట్టబద్ధంగా ఉన్నవారిని కూడా చిన్న కారణాలతో వేధించే ప్రభుత్వ విధానంపై నిపుణులు తీవ్రంగా విమర్శిస్తున్నారు. ఈ విజయంతో అంతర్జాతీయ విద్యార్థులకు కూడా అమెరికా చట్టవ్యవస్థ ద్వారా న్యాయ పరిరక్షణ లభిస్తుందని తేలింది. ప్రియ సక్సేనా న్యాయ విజయమొక వ్యక్తిగత గెలుపు మాత్రమే కాదు, వేలాది అంతర్జాతీయ విద్యార్థులకు అమెరికా న్యాయవిధానాలపై నమ్మకాన్ని కలిగించే సంఘటనగా నిలిచింది. ఇలాంటి కఠిన చర్యలపై నిఖార్సయిన సమీక్ష అవసరం ఉందని వలస నిపుణులు సూచిస్తున్నారు.