అమెరికాలో ఉన్నా మనోళ్లది అదే పని.. వైరల్ వీడియో

రామేశ్వరం వెళ్లినా శనీశ్వరం పోదు అన్నట్టు మన భారతీయులు అమెరికా వెళ్లినా ఇక్కడి జాఢ్యాలు, అలవాట్లు మార్చుకోలేకపోతున్నారు.దానివల్ల విదేశంలోనూ మన పరువు పోతోంది. ఏ దేశమేగినా.. ఎందుకాలిడినా.. ఆ దేశ సంప్రదాయాలు పాటించాలి. పాటించకపోతే రిస్క్ లో పడుతాం. రోమ్ లో ఉన్నప్పుడు రోమన్ లా ఉండాలన్నది సామెత.. కానీ మన భారతీయులు అమెరికా వెళ్లినా అక్కడ బట్టలు ఆరుబయట ఆరేయడం ఒకరి కంటపడింది. ఈ వీడియో వైరల్ కావడంతో ప్రతిస్పందనలు వెల్లువెత్తాయి.

అమెరికాలోని ఓ ఇంటి పెరట్లో బట్టలు ఆరబెట్టిన దృశ్యం సోషల్ మీడియాలో వైరల్‌గా మారింది. చాలా దేశాల్లో ఇది సాధారణమైన విషయమే అయినప్పటికీ ఈ వీడియోను ఒక భారతీయ సంతతికి చెందిన వ్యక్తి షేర్ చేస్తూ ఇది ఇండియా కాదని, అమెరికా అని పేర్కొనడం వివాదాస్పదమైంది.

విద్యార్థులు అమెరికాలో స్థిరపడటానికి సహాయం చేసే మహమ్మద్ అనస్ అనే వ్యక్తి ఈ వీడియోను షేర్ చేశారు. వీడియో ప్రారంభంలో "ఇది ఇండియా కాదు, అమెరికా" అని షాకింగ్ ఎమోజీతో టెక్స్ట్ కనిపించింది. కెండ్రిక్ లామార్ యొక్క 'నాట్ లైక్ అస్' అనే పాట బ్యాక్‌గ్రౌండ్‌లో ప్లే అవుతున్న ఈ వీడియోను చూసిన నెటిజన్లు ఇండియాను అమెరికాతో పోల్చడాన్ని తప్పుబట్టారు. చాలా మంది యూజర్లు దీనిపై తమ అసహనాన్ని వ్యక్తం చేశారు.

"అమెరికన్లు బట్టలు ఆరబెట్టరా?" అని ఒక యూజర్ ప్రశ్నించగా, "క్షమించండి, బట్టలు ఆరబెట్టడం చట్టవిరుద్ధమా?" అని మరొకరు అడిగారు. "నేను చాలా గందరగోళంలో ఉన్నాను. అమెరికాలో మనం ఇలా చేయకూడదా?" అని ఇంకొకరు కామెంట్ చేశారు.

చాలా మంది యూజర్లు అనవసరమైన పోలికలు తేవడాన్ని విమర్శిస్తున్నారు. బట్టలు ఆరబెట్టడం అనేది ప్రపంచవ్యాప్తంగా అనేక మంది చేసే సాధారణమైన పని అని, దానిని ఒక దేశానికి మాత్రమే పరిమితం చేయడం సరికాదని వారు అభిప్రాయపడుతున్నారు. ఈ వీడియో సోషల్ మీడియాలో చర్చనీయాంశంగా మారింది.