'వీరమల్లు' కోసం మళ్లీ రంగంలోకి దిగుతున్న పవన్!

Thu Oct 21 2021 13:58:14 GMT+0530 (IST)

hari hara veera mallu shooting update

పవన్ కల్యాణ్ కథానాయకుడిగా దర్శకుడు క్రిష్ 'హరి హర వీరమల్లు'  సినిమాను రూపొందిస్తున్నాడు. ఇది మొగల్ చక్రవర్తుల పాలనా కాలానికి సంబంధించిన కథ. ఆ కాలంలో పేరు మోసిన ఒక వజ్రాల దొంగ కథ. సంపన్నులను దోచి పేదవాడికి పంచే రాబిన్ హుడ్ తరహా కథ. అలాంటి ఈ పాత్రను ఈ సినిమాలో పవన్ పోషిస్తున్నాడు. ఫస్టు లుక్ తోనే ఆయన మంచి మార్కులు కొట్టేశాడు. మొగల్ చక్రవర్తుల కాలం నాటి కథ కావడంతో అప్పటి కట్టడాలకు సంబంధించిన భారీ సెట్లను వేశారు. ఇందుకోసం నిర్మాత ఎ.ఎమ్. రత్నమ్ కోట్ల రూపాయలను ఖర్చు చేశారు.



ఈ సినిమా 50 శాతం వరకూ షూటింగు జరిగిన తరువాత కరోనా తీవ్రత కారణంగా షూటింగు ఆపుకోవలసి వచ్చింది. ఆ సమయంలో పవన్ కూడా కరోనా బారిన పడ్డాడు. ఆ తరువాత నుంచి పవన్ 'భీమ్లా నాయక్' షూటింగు పైనే పూర్తి దృష్టిపెట్టాడు. 'వీరమల్లు'తో పోలిస్తే ఇది చిన్న సినిమానే గనుక ఈ సినిమాను పూర్తి చేసిన తరువాతనే వెళదామని పవన్ అనుకున్నాడు. అలా ఆయన చిత్రీకరణ పరంగా ఈ సినిమాను చివరిదశకు తీసుకొచ్చాడు. ఇక ఈ నెల 25వ తేదీ నుంచి 'వీరమల్లు' తాజా షెడ్యూల్ షూటింగును మొదలుపెట్టనున్నట్టు తెలుస్తోంది.

ఈ షెడ్యూల్లో భారీ యాక్షన్ ఎపిసోడ్ ను చిత్రీకరించనున్నట్టు చెబుతున్నారు. అర్జున్ రామ్ పాల్ .. జాక్విలెన్ ఫెర్నాండేజ్ కూడా ఈ షెడ్యూల్లో పాల్గొననున్నారని అంటున్నారు. డిఫరెంట్ గా డిజైన్ చేసిన ఈ యాక్షన్ ఎపిసోడ్ ఈ సినిమాకి హైలైట్ గా నిలవనుందని చెబుతున్నారు. కీరవాణి అందించిన సంగీతం ఈ సినిమాకి ప్రధానమైన బలంగా నిలుస్తుందనీ ఆయన అందించిన బ్యాక్ గ్రౌండ్ స్కోర్ ఈ సినిమాను మరోస్థాయిలో నిలబెడుతుందనే నమ్మకాన్ని క్రిష్ వ్యక్తం చేయడం అందరిలో మరింత ఆసక్తిని పెంచుతోంది.

ఇక ఈ సినిమాలో పవన్ సరసన నాయికగా నిధి అగర్వాల్ అలరించనుంది. ఈ సినిమాలో ఆమె మరింత గ్లామరస్ గా కనిపించనుందని అంటున్నారు. ఆ మధ్య ఆమె పుట్టినరోజున వదిలిన పోస్టర్ కుర్రాళ్ల మనసులను కట్టిపడేసింది. ఇంతవరకూ నిధి అగర్వాల్ చేస్తూ వచ్చిన సినిమాల్లో అత్యధిక బడ్జెతో నిర్మితమవుతున్న సినిమా ఇదే అవుతుంది. ఈ సినిమాపై ఈ సుందరి భారీ ఆశలే పెట్టుకుంది. వచ్చే ఏడాదిలో ఏప్రిల్ 29వ తేదీన ఈ సినిమాను విడుదల చేయనున్నారు. ఈ సినిమా ఏ స్థాయి సంచలనానికి తెరతీస్తుందనేది అభిమానుల్లో ఆసక్తిని రేకెత్తిస్తోంది.