స్టార్ డైరెక్టర్ కు చుక్కలు చూపిస్తున్న స్టార్ హీరో!

ఇల్లు అలక గానే పండగ కాదు అని తెలుగు లో ఒక సామెత. పాతదే కదా.. ఇప్పటి అంతర్జాల సామాజిక మాధ్యమాల తరానికి సరిపోదేమో అనుకుంటే అంతకంటే పొరపాటు మరొకటి లేదు. ఇప్పటికీ ఆ సామెత చాలా అంశాలకు కరెక్ట్ గా సరి పోతుంది. ముఖ్యంగా ఒక స్టార్ డైరెక్టర్ కు సరిగ్గా సరి పోయేలా ఉందని ఫిలిం నగర్ కోడై కూస్తోంది.

ఆయన ఓ టాప్ డైరెక్టర్. ఆయన సినిమా చేస్తానంటే నో చెప్పే స్టార్ హీరోలు దాదాపుగా లేరు. ఆ డైరెక్టర్ ట్రాక్ రికార్డ్ అలాంటిది. కానీ ఆయనేమో ఒక పెద్ద స్టార్ తో సినిమా తెరకెక్కించాలని పట్టుబట్టుకుని కూర్చున్నాడు. సినిమా త్వరగానే సెట్ అయింది కానీ పట్టాలెక్కే సరికే చాలా సమయం వృధా అయింది. సాధారణం గా ఈ టైం లో ఆయన రెండు సినిమాలు చేసేవారేమో. లేట్ అయితే అయింది ఎలాగూ బౌండ్ స్క్రిప్ట్ ఉంది కదా.. వీలైనంత త్వరగా పూర్తి చేయాలని అనుకుంటే అది కూడా కుదిరేలా లేదట. ఈ కాంపౌండ్ లో చేయడం డైరెక్టర్ గారికి మొదటి సారి. ఇప్పుడిప్పుడే ఈ సంప్రదాయాలు అలవాటవుతున్నాయి. హీరో గారు దర్శకుడి పని విషయం లో వేళ్లు పెడుతున్నారని.. ఈ ఫింగరింగ్ ఎక్కువ కావడం తో ఏం చెయ్యాలో అర్థం కాక దర్శకుడు తల పట్టుకుంటున్నారట.

ఈ దర్శకుడు కెరీర్ ఆరంభంలో మరో దర్శకుడి వద్ద పని చేశారు. అప్పట్లో ఆయనతో తెగ ఇబ్బంది పడ్డారట. ఇప్పుడు ఈ హీరోగారి ఫింగరింగ్ దెబ్బకు మునుపటి రోజులు.. అప్పటి ఫీలింగ్స్ గుర్తుకొస్తున్నాయని సన్నిహితుల వద్ద వాపోతున్నారట. నిజమే.. సినిమా సెట్ అవగానే పండగ కాదు. ఆ తర్వాత కదా అసలు సినిమా కనిపించేది. ప్రస్తుతానికి ఆ దర్శకుడికి అలాంటి సినిమానే కనిపిస్తోందట!