టాలీవుడ్ లో సరికొత్త రికార్డ్ క్రియేట్ చేసిన 'ఆర్.ఆర్ ఆర్' కొమురం భీమ్..!

దర్శకధీరుడు రాజమౌళి ప్రతిష్టాత్మకంగా తెరకెక్కిస్తున్న పాన్ ఇండియన్ మూవీ 'ఆర్.ఆర్.ఆర్' (రౌద్రం రణం రుధిరం). యంగ్ టైగర్ ఎన్టీఆర్ - మెగా పవర్ స్టార్ రామ్ చరణ్ కలసి నటిస్తున్న ఈ సినిమాపై భారీ అంచనాలు నెలకొన్నాయి. ఇందులో 'కొమురం భీమ్' గా తారక్ నటిస్తుండగా.. 'అల్లూరి సీతారామరాజు'గా చరణ్ నటిస్తున్నాడు. దసరా కానుకగా ప్రపంచ వ్యాప్తంగా అక్టోబర్ 13న ఈ చిత్రాన్ని విడుదల చేయడానికి సన్నాహాలు చేస్తున్నారు. ఇప్పటికే విడుదలైన ప్రచార చిత్రాలు విశేషంగా ఆకట్టుకున్నాయి. ముఖ్యంగా 'భీమ్ ఫర్ రామరాజు' 'రామరాజు ఫర్ భీమ్' పేర్లతో విడుదలైన హీరోల ఇంట్రో వీడియోలు మిలియన్ల వ్యూస్ తో రికార్డులు క్రియేట్ చేస్తున్నాయి. ఈ క్రమంలో ఎన్టీఆర్ కొమురం భీమ్ టీజర్ టాలీవుడ్ లో సరికొత్త రికార్డ్ సృష్టించింది.

'ఆర్.ఆర్.ఆర్' చిత్రం నుంచి 2020 అక్టోబర్ 22న విడుదల చేయబడిన 'రామరాజు ఫర్ భీమ్' టీజర్ యూట్యూబ్ లో ఇప్పటి వరకు 50 మిలియన్లకు పైగా వ్యూస్ రాబట్టింది. ఈ నేపథ్యంలో టాలీవుడ్ ఫిలిం ఇండస్ట్రీలో 50M+ వ్యూస్ మార్క్ అందుకున్న మొట్ట మొదటి టీజర్ గా కొమురం భీమ్ ఇంట్రో వీడియో రికార్డ్ క్రియేట్ చేసింది. అంతేకాకుండా ఈ వీడియోకి 1.3M పైగా లైక్స్ మరియు 1.4M కామెంట్స్ వచ్చాయి. యూట్యూబ్ లో కొమురం భీమ్ హవా చూస్తుంటే టాలీవుడ్ లో ఇతర స్టార్ హీరోలకు భారీ టార్గెట్ ను నిర్దేశించడం ఖాయంగా కన్పిస్తోంది. ఈ నేపథ్యంలో ఎన్టీఆర్ ఫ్యాన్స్ సోషల్ మీడియాలో పెద్ద ఎత్తున హంగామా చేస్తున్నారు. '#GonduBebbuliNTRHits50M' హ్యాష్ ట్యాగ్ తో ట్విట్టర్ లో నేషనల్ వైడ్ ట్రెండ్ చేస్తున్నారు.

కాగా, 'ఆర్‌.ఆర్‌.ఆర్‌' చిత్రాన్ని డి.పార్వతి సమర్పణలో డీవీవీ ఎంటర్టైన్మెంట్స్ బ్యానర్ పై దానయ్య భారీ బడ్జెట్ తో నిర్మిస్తున్నారు. ఇందులో అలియా భట్ - ఒలీవియా మోరిస్‌ హీరోయిన్లుగా నటిస్తుండగా.. బాలీవుడ్ స్టార్ యాక్టర్ అజయ్ దేవగన్ కీలక పాత్రలో నటించారు. శ్రియా - సముద్రఖని - అలిసన్ డూడీ - రే స్టీవెన్‌ సన్ తదితరులు ఇతర ప్రధాన పాత్రలు పోషిస్తున్నారు. ఎమ్.ఎమ్ కీరవాణి ఈ చిత్రానికి సంగీతం సమకూరుస్తుండగా.. సెంథిల్ కుమార్ సినిమాటోగ్రఫీ అందిస్తున్నారు. శ్రీకర్ ప్రసాద్ ఎడిటింగ్ బాధ్యతలు నిర్వర్తిస్తున్నారు.