'పబ్జీ' కి ప్రత్యామ్నాయమైన 'FAU-G' టీజర్ ని రిలీజ్ చేసిన అక్షయ్ కుమార్..!

ప్రపంచవ్యాప్తంగా అత్యంత ఆదరణ దక్కించుకున్న 'పబ్జీ' గేమ్ ని దేశ భద్రతను దృష్టిలో పెట్టుకొని కేంద్రప్రభుత్వం ఇండియాలో బ్యాన్ చేసిన సంగతి తెలిసిందే. అయితే 'పబ్జీ' మొబైల్ మరియు పబ్జీ లైట్ యాప్స్ మనదేశంలో నిషేధించబడగానే దేనికి ప్రత్యామ్నాయంగా 'FAU-G' (ఫా-జీ) అనే గేమ్ ని తీసుకొస్తున్నట్లు బాలీవుడ్ స్టార్ హీరో అక్షయ్ కుమార్ ప్రకటించిన సంగతి తెలిసిందే. ఈ నేపథ్యంలో ఫా-జీ గేమ్ ని నవంబర్‌ లో లాంచ్ చేస్తున్నట్లు గేమ్ రూపకర్తలు ఎన్‌కోర్ గేమ్స్ ట్వీట్ ద్వారా వెల్లడించారు. 'FAU-G' అంటే 'ఫియర్ లెస్ అండ్ యునైటెడ్ గార్డ్స్'. దేశభక్తిని పెంపొందించే విధంగా ఈ గేమ్‌ ను రూపొందించారు. ఫా-జీ గేమ్‌ లో మొదటి లెవల్ భారత్ - చైనా మధ్య గాల్వాన్ లోయ వివాదం నేపథ్యంలో సాగుతుందని తెలుస్తోంది.

దసరా సందర్భంగా 'FAU-G' కి సంబంధించిన ఫస్ట్ టీజర్‌ ను అక్షయ్ కుమార్ విడుదల చేశారు. ఈ సందర్భంగా అక్షయ్ ట్వీట్ చేస్తూ 'ఈ రోజు మనం చెడుపై మంచి విజయాన్ని జరుపుకుంటాము. మన FAU-G ను జరుపుకోవడానికి ఇంతకంటే మంచి రోజు ఏముంటుంది. దసరా సందర్భంగా FAU-G టీజర్‌ ను మీ ముందుకు తీసుకొస్తున్నాం'' అని పేర్కొన్నారు. ఒక్క నిమిషం నిడివి ఉన్న ఈ టీజర్‌ లో ఫా-జీ గేమ్ ఫస్ట్ లెవల్‌ ను చూపించారు. శత్రువులతో పోరాటం చేయడానికి ఎలాంటి పద్ధతులు ఉపయోగించాలి.. ఎలాంటి ఆయుధాలు రూపొందించాలి అనేది ఈ టీజర్‌ లో చూపించారు. కాగా, ఈ గేమ్ ద్వారా వచ్చిన ఆదాయంలో 20 శాతాన్ని భారతప్రభుత్వ నగదు సేకరణ కార్యక్రమం 'భారత్ కే వీర్‌'కు ఎన్‌కోర్ గేమ్స్ అందించనుంది. అయితే ఈ గేమ్ మనదేశంలో పబ్జీ స్థాయిలో ఆదరణ సంపాదించుకుంటుందా లేదా అన్నది చూడాలి.