‘పాసివ్ యుథనేషియా’ అంటే ఏమిటి? సుప్రీంకోర్టు అనుమతిపై చర్చ

జీవితంలో చావునైనా భరించవచ్చు కానీ, బతికుండగానే అనుభవించే నరకయాతనను చూడటం ఎవరికైనా కష్టమే. కోలుకునే అవకాశం లేక, కేవలం యంత్రాల సాయంతోనే ప్రాణాన్ని నిలబెడుతున్న రోగుల విషయంలో సుప్రీంకోర్టు కీలక నిర్ణయం తీసుకుంది. హరీశ్ రాణా కేసు నేపథ్యంలో 'పాసివ్ యుథనేషియా' (కరుణ్య మరణం) అంశం ఇప్పుడు దేశవ్యాప్తంగా చర్చనీయాంశమైంది. అస్సలు ఈ ప్రక్రియ ఏంటి? దీనివల్ల రోగికి కలిగే విముక్తి ఏంటో తెలుసుకుందాం.

పాసివ్ యుథనేషియా అంటే అసలు ఏంటి?:

చాలామంది 'యుథనేషియా' అంటే ఏదో విషపు ఇంజెక్షన్ ఇచ్చి ప్రాణం తీయడం అనుకుంటారు. కానీ 'పాసివ్ యుథనేషియా' పద్ధతి దానికి పూర్తిగా భిన్నం. ఒక మనిషి కోలుకునే అవకాశం అస్సలు లేదని, అతను కేవలం వెంటిలేటర్ లేదా ఫీడింగ్ ట్యూబ్ వంటి కృత్రిమ లైఫ్ సపోర్ట్ మీదనే ఉన్నాడని డాక్టర్లు నిర్ధారించినప్పుడు ఈ నిర్ణయం తీసుకుంటారు. ఇందులో నేరుగా ప్రాణం తీయరు. కేవలం ఆ కృత్రిమ సహాయాన్ని మాత్రమే నిలిపివేస్తారు. దీనివల్ల రోగి తన అనారోగ్యం కారణంగా సహజంగానే మరణిస్తారు. అంటే, టెక్నాలజీతో బలవంతంగా నిలబెట్టిన ప్రాణానికి ప్రకృతిసిద్ధమైన ముగింపుని ఇవ్వడమే ఈ ప్రక్రియ ముఖ్య ఉద్దేశం.

సుప్రీంకోర్టు తీర్పు మరియు గౌరవప్రదమైన మరణం:

మనిషికి గౌరవంగా జీవించే హక్కు ఉన్నట్టే, గౌరవంగా మరణించే హక్కు కూడా ఉంటుందని మన అత్యున్నత న్యాయస్థానం గుర్తించింది. హరీశ్ రాణా వంటి కేసుల్లో రోగులు దశాబ్దాల తరబడి స్పృహ లేకుండా, కేవలం మంచానికే పరిమితమై నరకయాతన అనుభవిస్తుంటారు. అటు రోగికి, ఇటు ఆ కుటుంబాన్ని ఆర్థికంగా, మానసిక వేదన నుంచి విముక్తి కలిగించడానికి సుప్రీంకోర్టు కొన్ని కఠిన నిబంధనలతో ఈ 'పాసివ్ యుథనేషియా'కు అనుమతి ఇచ్చింది. ఇది ఒక రకంగా చెప్పాలంటే ఆ రోగి అనుభవిస్తున్న సుదీర్ఘ నరకం నుంచి ప్రశాంతమైన విముక్తి కలిగించడమే.

ఈ తీర్పుపై భిన్నాభిప్రాయాలు వ్యక్తమవుతున్నాయి. కొందరు దీనిని మానవత్వంతో కూడిన నిర్ణయంగా స్వాగతిస్తుంటే, మరికొందరు దీనివల్ల దుర్వినియోగం జరిగే అవకాశం ఉందని ఆందోళన వ్యక్తం చేస్తున్నారు. అందుకే సుప్రీంకోర్టు దీనిని ఒక మెడికల్ బోర్డు పర్యవేక్షణలో, న్యాయపరమైన అనుమతులతో మాత్రమే చేయాలని స్పష్టం చేసింది. ఇక వైద్యం విఫలమై, ప్రాణం యంత్రాల మీద భారంగా సాగుతున్నప్పుడు, ఆ యాతనను ముగించడం అనేది మరణం కాదు, అది ఒక ఆత్మకు లభించే శాంతి. ఈ సున్నితమైన అంశంపై అవగాహన పెంచుకోవడం నేటి కాలంలో ఎంతో అవసరం.