సెప్టెంబర్ 30లోపు ఎన్నికలు నిర్వహించాలి: హైకోర్టు హుకూం

తెలంగాణలో స్థానిక సంస్థల ఎన్నికల నిర్వహణపై నెలకొన్న అనిశ్చితికి తెరదించుతూ హైకోర్టు కీలక తీర్పును వెలువరించింది. గ్రామపంచాయతీ ఎన్నికలను రాబోయే మూడు నెలల్లోగా పూర్తి చేయాలని, అందుకు సంబంధించిన వార్డుల విభజన ప్రక్రియను 30 రోజుల్లోగా పూర్తి చేయాలని హైకోర్టు న్యాయమూర్తి జస్టిస్‌ టి.మాధవీదేవి బుధవారం ఆదేశాలు జారీ చేశారు. ఈ మేరకు రాష్ట్ర ప్రభుత్వం, రాష్ట్ర ఎన్నికల సంఘానికి స్పష్టమైన నిర్దేశాలిచ్చారు.

-ఎన్నికల జాప్యంపై హైకోర్టు ప్రశ్న:

స్థానిక సంస్థల పాలకవర్గాల గడువు 2024 జనవరి 30వ తేదీతో ముగిసినప్పటికీ, ఎన్నికల నిర్వహణలో జరుగుతున్న జాప్యంపై హైకోర్టు రాష్ట్ర ప్రభుత్వం, ఎన్నికల సంఘాన్ని తీవ్రంగా ప్రశ్నించింది. ఎన్నికల నిర్వహణలో జాప్యాన్ని సవాలు చేస్తూ పలువురు మాజీ సర్పంచులు దాఖలు చేసిన పిటిషన్‌పై సోమవారం విచారణ చేపట్టిన జస్టిస్‌ టి.మాధవీదేవి ఈరోజు తన తీర్పును వెలువరించారు.

-పిటిషనర్ల వాదనలు:

పిటిషనర్ల తరఫు న్యాయవాదులు వాదనలు వినిపిస్తూ గతేడాది జనవరి 31తో సర్పంచుల పదవీకాలం ముగిసినా, ప్రభుత్వం ఇప్పటికీ ఎన్నికలు నిర్వహించకుండా జాప్యం చేస్తోందని తెలిపారు. సర్పంచులను తప్పించి పంచాయతీల బాధ్యతలను ప్రత్యేక అధికారులకు అప్పగించడం రాజ్యాంగ విరుద్ధమని, తెలంగాణ పంచాయతీరాజ్‌ చట్టాలకు కూడా ఇది విరుద్ధమని వాదించారు. ప్రత్యేక అధికారులు తమ ఇతర విధుల్లో నిమగ్నమై ప్రజల సమస్యలను పట్టించుకోవడం లేదని, ఇది ప్రజలకు తీవ్ర ఇబ్బందులు కలిగిస్తోందని పేర్కొన్నారు. అంతేకాకుండా రాష్ట్ర ఆర్థిక సంఘం ద్వారా నిధులు సమకూరుస్తామని ప్రభుత్వం ఇచ్చిన హామీతో పలువురు సర్పంచులు తమ సొంత నిధులు వెచ్చించి అభివృద్ధి పనులు చేశారని, ప్రస్తుతం ఆ నిధులు అందక తీవ్ర ఇబ్బందులు పడుతున్నారని న్యాయవాదులు హైకోర్టు దృష్టికి తెచ్చారు. కేంద్రం నుంచి వివిధ పథకాల కింద రావాల్సిన నిధులు కూడా రావడం లేదని, కాబట్టి వెంటనే ఎన్నికల నిర్వహణకు చర్యలు తీసుకోవాలని, లేదంటే పాత సర్పంచులకే బాధ్యతలు అప్పగించాలని వారు కోరారు.

-ప్రభుత్వం, ఎన్నికల సంఘం వాదనలు

ప్రభుత్వం తరఫున అదనపు అడ్వొకేట్‌ జనరల్‌ ఇమ్రాన్‌ఖాన్‌ వాదనలు వినిపిస్తూ సుప్రీంకోర్టు తీర్పు ప్రకారం స్థానిక సంస్థల్లో బీసీ రిజర్వేషన్లు ఖరారు చేసి ఎన్నికల ప్రక్రియ చేపట్టాల్సి ఉందని తెలిపారు. ఈ ప్రక్రియ పూర్తి కావడానికి మరో నెల రోజుల గడువు అవసరమని ఆయన కోరారు. అయితే ఎన్నికల నిర్వహణపై గతంలో ఒకసారి హామీ ఇచ్చి ఎందుకు అమలు చేయలేదని న్యాయమూర్తి ఈ దశలో ప్రశ్నించారు. ఎన్నికల సంఘం తరఫున సీనియర్‌ న్యాయవాది జి.విద్యాసాగర్‌ వాదనలు వినిపిస్తూ రిజర్వేషన్లను ఖరారు చేయాల్సిన బాధ్యత ప్రభుత్వానిదేనని స్పష్టం చేశారు. ఈ ప్రక్రియ పూర్తికాగానే ఎన్నికల ప్రక్రియను ప్రారంభిస్తామని తెలిపారు. ప్రభుత్వం ఎన్నికల నిర్వహణకు ఆమోదం తెలిపాక, ప్రక్రియ పూర్తి చేయడానికి రెండు నెలల సమయం పడుతుందని ఆయన కోర్టుకు తెలిపారు. దీనిపై న్యాయమూర్తి జోక్యం చేసుకుంటూ, సకాలంలో ఎన్నికల నిర్వహణకు ప్రభుత్వం చర్యలు తీసుకోకపోతే ఎన్నికల సంఘం చొరవ తీసుకోవాలని సుప్రీంకోర్టు స్పష్టం చేసినందున, ఆ దిశగా ఎందుకు చర్యలు తీసుకోలేదని ప్రశ్నించారు. రిజర్వేషన్ల ఖరారుతో పాటు ఎన్నికలకు ఏర్పాట్లు చేయాల్సిన బాధ్యత ప్రభుత్వానిదేనని న్యాయవాది సమాధానమిచ్చారు.

హైకోర్టు ఆదేశాలు

ఇరు పక్షాల వాదనలు విన్న హైకోర్టు న్యాయమూర్తి, ప్రజల ప్రయోజనాలను దృష్టిలో ఉంచుకొని మూడు నెలల్లో గ్రామపంచాయతీ ఎన్నికలను నిర్వహించాలని స్పష్టమైన ఆదేశాలు జారీ చేశారు. సెప్టెంబర్ 30 నాటికి ఎన్నికల ప్రక్రియను పూర్తి చేయాలని, అందులో భాగంగా 30 రోజుల్లోగా వార్డుల విభజన ప్రక్రియను పూర్తి చేయాలని హైకోర్టు ఆదేశించింది. ఈ తీర్పుతో తెలంగాణలో స్థానిక సంస్థల ఎన్నికల కోలాహలం త్వరలో ప్రారంభం కానుంది. ప్రభుత్వ, ఎన్నికల సంఘాలు హైకోర్టు ఆదేశాలకు అనుగుణంగా త్వరితగతిన చర్యలు తీసుకునే అవకాశం ఉంది.