ఒక రాష్ట్ర ఉన్నత న్యాయస్థానం లైవ్ విచారణలో అశ్లీల దృశ్యాలు.. జడ్జి షాక్.. డిజిటల్ భద్రతపై ఆందోళన!

న్యాయ వ్యవస్థలో అత్యున్నత స్థానంలో ఉన్న హైకోర్టు విచారణలోనే అశ్లీల దృశ్యాలు ప్రత్యక్షమవ్వడం కేవలం ఒక సాంకేతిక లోపం మాత్రమే కాదు.., అది మన డిజిటల్ భద్రతపై జరుగుతున్న దాడి. ఢిల్లీ హైకోర్టులో ప్రధాన న్యాయమూర్తి సమక్షంలో జరిగిన ఈ 'హ్యాకింగ్' ఘటన సైబర్ నేరగాళ్లు ఎంత తెగించి ఉన్నారో చాటిచెబుతోంది. న్యాయం చేకూర్చాల్సిన కోర్టు గదుల్లో డిజిటల్ విప్లవం ద్వారా ‘వర్చువల్ విచారణలు’ మొదలయ్యాయి. అయితే, ఈ సౌలభ్యం ఇప్పుడు సైబర్ నేరగాళ్లకు అస్త్రంగా మారింది. ఢిల్లీ హైకోర్టులో విచారణ జరుగుతుండగా, ఒక్కసారిగా స్క్రీన్‌పై సెక్స్ వీడియోలు దర్శనమివ్వడం న్యాయ మూర్తులతో పాటు న్యాయవాదులను తీవ్ర దిగ్భ్రాంతికి గురిచేసింది.

ఘటన జరిగిన తీరు

ఈ విచారణ ప్రారంభమైన కొద్ది నిమిషాలకే అంతరాయం కలిగింది. మొదటిసారి వీడియోలు వచ్చినప్పుడు జడ్జి విచారణను నిలిపివేసి, అంతా సర్దుమణిగిందని భావించి మళ్లీ ప్రారంభించారు. కానీ, 10 నిమిషాల తర్వాత మళ్లీ అవే దృశ్యాలు ప్రత్యక్షమవ్వడం ఉద్దేశపూర్వకంగా చేసిన దాడి అని స్పష్టం చేస్తోంది. కేవలం వీడియోలు రావడమే కాకుండా, ‘మీరు హ్యాక్ అయ్యారు’ అనే సందేశం వాయిస్ రూపంలో వినిపించడం వ్యవస్థలోని భద్రత లోపాలను వెక్కిరించినట్లుగా ఉంది.

సైబర్ పోలీసుల యాక్షన్

సాంకేతిక సిబ్బంది వెంటనే అప్రమత్తమై ఐడీల ఆధారంగా నిందితులను గుర్తించారు. శ్రీధర్ సర్నోబత్, షిత్ జిత్ సింగ్ అనే వ్యక్తుల పేర్లు స్క్రీన్‌పై కనిపించాయి. ఢిల్లీ సైబర్ పోలీస్ విభాగం ప్రత్యేక బృందాలను రంగంలోకి దించింది. నిందితులను త్వరలోనే అరెస్టు చేస్తామని, ఇటువంటి చర్యలను ఉపేక్షించేది లేదని స్పష్టం చేసింది.

డిజిటల్ భద్రతపై ప్రశ్నలు..

హైకోర్టులు వాడే వీడియో కాన్ఫరెన్స్ ప్లాట్‌ఫారమ్‌లు అత్యంత భద్రంగా ఉండాలి. కానీ, ఈ ఘటన కొన్ని కీలక ప్రశ్నలను లేవనెత్తుతోంది. బహిరంగంగా జరిగే వర్చువల్ విచారణల ఐడీలు, పాస్‌వర్డ్‌లు ఎవరికైనా దొరికే అవకాశం ఉండడమే ఇలాంటి ఘటనలకు మూలం. కోర్టు నెట్‌వర్క్‌లోకి అపరిచితులు ప్రవేశించి, స్క్రీన్‌ను నియంత్రించగలిగారంటే మన సైబర్ సెక్యూరిటీ ఎంత బలహీనంగా ఉందో అర్థమవుతోంది.

ప్రధాన న్యాయమూర్తి ఈ ఘటన తర్వాత విచారణలను వాయిదా వేసి, ఉన్నత స్థాయి సమావేశం నిర్వహించడం సరైన నిర్ణయం. కోర్టుల గౌరవానికి భంగం కలిగించే ఇటువంటి చర్యలు మళ్లీ జరగకుండా ఉండాలంటే, వర్చువల్ విచారణలకు కేవలం ప్రత్యేకమైన, అత్యంత సురక్షితమైన సర్వర్లను వాడాలి. దోషులకు కఠిన శిక్ష పడితేనే భవిష్యత్తులో ఇలాంటి వెకిలి చేష్టలకు అడ్డుకట్ట పడుతుంది.