జగన్ నిశ్శబ్ధం వ్యూహమా? బలహీనతా?

ఆంధ్రప్రదేశ్ రాజకీయాల్లో మాజీ ముఖ్యమంత్రి, వైసీపీ అధినేత వైఎస్ జగన్ శైలి ఎప్పటి నుంచో భిన్నంగా ఉంటోంది. ఎన్ని విమర్శలు ఎదురైనా, ఎన్ని ఆరోపణలు వచ్చినా ఆయన సాధారణంగా మౌనమే పాటిస్తారు. ఈ తీరుపై ఇటీవల పార్టీ సీనియర్ నాయకుడు, మాజీ మంత్రి బొత్స సత్యనారాయణ చేసిన వ్యాఖ్యలు రాజకీయ వర్గాల్లో చర్చనీయాంశమయ్యాయి. “మా నాయకుడు అంతే!” అని ఆయన సరదాగా చెప్పిన వ్యాఖ్య, వాస్తవానికి పార్టీ లోపలి అసంతృప్తిని బయటపెడుతోందని అనుకోవచ్చు.

పార్టీ నేతల్లో అసంతృప్తి..

రాజకీయాల్లో అబద్ధం వేగంగా వ్యాపిస్తుందనే విషయం తెలిసిందే. అలాంటప్పుడు సమయానుసారం స్పందించడం, నిజాన్ని ప్రజల ముందు ఉంచడం నాయకుని బాధ్యత. కానీ జగన్ మాత్రం నిరీక్షణకే ప్రాధాన్యం ఇస్తున్నారు. ఆయన ప్రతిస్పందనలో జాప్యం వల్ల ప్రత్యర్థుల ఆరోపణలు మరింత బలంగా వినిపిస్తున్నాయన్న అభిప్రాయం వైసీపీ శ్రేణుల్లో పెరుగుతోంది. ఫలితంగా సీనియర్ నేతల్లో అసంతృప్తి చెలరేగుతోంది. కొందరు బహిరంగంగానే విమర్శించగా, మరికొందరు మౌనంగా పార్టీ భవిష్యత్తు గురించి ఆందోళన చెందుతున్నారు.

వైసీపీ శ్రేణుల్లో అభద్రత

ఇక, కొందరు నేతలు పరిస్థితులను దృష్టిలో పెట్టుకొని తమకంటూ యూట్యూబ్ ఛానెల్లు నిర్వహిస్తూ, పార్టీ పక్షాన వాదనలు వినిపిస్తున్నారు. మరికొందరు "మనకేం పనిలేదు" అన్నట్లుగా నిశ్శబ్దంగా వ్యవహరిస్తున్నారు. ఇంకొందరు అయితే ప్రత్యామ్నాయ రాజకీయ అవకాశాలను పరిశీలిస్తున్నారనే ఊహాగానాలు వినిపిస్తున్నాయి. ఈ విధమైన భిన్నాభిప్రాయాలు పార్టీ ఏకతను దెబ్బతీయవచ్చన్న భయం వైసీపీ వర్గాల్లో కనబడుతోంది.

హెచ్చరిస్తున్న నేతలు

జగన్ నిశ్శబ్దం వెనుక ఉన్న కారణం ఆయన నమ్మకం అని కొందరు విశ్లేషకులు చెబుతున్నారు. ప్రజలు తనపట్ల ఉన్న విశ్వాసం ఆధారంగా, ఎటువంటి ప్రత్యామ్నాయం లేదనే ధీమాతో ఆయన స్పందించకపోవచ్చని అంటున్నారు. కానీ అదే ధోరణి పార్టీకి రాబోయే ఎన్నికల్లో నష్టాన్ని మిగల్చే ప్రమాదం ఉందని సీనియర్లు హెచ్చరిస్తున్నారు.

అంతర్గత ఉద్రిక్తతలపై స్పష్టత

ఈ పరిణామాల మధ్య బొత్స సత్యనారాయణ రాబోయే రోజుల్లో రాజకీయ విరమణ ప్రకటించే అవకాశముందని జరుగుతున్న చర్చ, వైసీపీ లోపలి ఉద్రిక్తతలను మరింతగా స్పష్టతనిస్తుంది. అంతిమంగా, జగన్ ఈ మౌన ధోరణి ఆయనకు రాజకీయంగా కవచంగా మారుతుందా, లేక పార్టీ లోపల విభేదాలను మరింత ప్రోత్సహిస్తుందా అన్నది వచ్చే ఎన్నికల ఫలితాల ద్వారానే స్పష్టమవుతుంది.