పంజాబ్‎లో టెర్రర్ నెట్ వర్క్ ఛేదించిన పోలీసులు.. మరో యూట్యూబర్ అరెస్ట్

దేశ భద్రతకు సంబంధించిన ఒక కీలక కేసులో మరోసారి పాకిస్థాన్ గూఢచర్యం నెట్‌వర్క్ బయటపడింది. యూట్యూబ్ ఛానెల్ నడుపుతూ, లక్షలాది మంది సబ్‌స్క్రైబర్లను కలిగి ఉన్న ఒక వ్యక్తి పాకిస్థాన్‌కు గూఢచర్యం చేస్తున్నాడని తేలింది. పంజాబ్ పోలీసులు ఈ నెట్‌వర్క్‌ను ఛేదించారు. అందుకు సంబంధించిన వారిని అరెస్ట్ చేశారు. ఈ ఘటన దేశవ్యాప్తంగా కలకలం సృష్టిస్తోంది.

పంజాబ్ డీజీపీ గౌరవ్ యాదవ్ తెలిపిన వివరాల ప్రకారం.. పంజాబ్‌లోని మొహాలీలోని స్టేట్ స్పెషల్ ఆపరేషన్స్ సెల్ (SSOC) పాకిస్థాన్ సపోర్టుతో నడుస్తున్న ఒక టెర్రర్ సంబంధిత గూఢచర్యం నెట్‌వర్క్‌ను ఛేదించింది. ఈ నెట్‌వర్క్‌లో రూపనగర్‌లోని మహ్లాన్ గ్రామానికి చెందిన జస్బీర్ సింగ్ పాలుపంచుకున్నాడని గుర్తించి అతడిని అరెస్ట్ చేశారు.

జస్బీర్ సింగ్ 'జాన్ మహల్' అనే యూట్యూబ్ ఛానెల్‌ను నడుపుతున్నాడు. ఈ ఛానెల్‌కు ఏకంగా 11 లక్షల మంది సబ్‌స్క్రైబర్లు ఉన్నారని డీజీపీ వెల్లడించారు. జస్బీర్ సింగ్‌కు పాకిస్థానీ హ్యాకర్లతో మంచి సంబంధాలు ఉన్నాయని, భారతీయ మూలాలున్న పలువురితో సన్నిహిత సంబంధాలు కొనసాగిస్తున్నాడని దర్యాప్తులో తేలింది.

ఈ గూఢచర్యం నెట్‌వర్క్‌లో హర్యానాకు చెందిన యూట్యూబర్ జ్యోతి మల్హోత్రా కూడా పాలుపంచుకున్నట్లు గుర్తించారు. ఆమెను ఇటీవల ఒక గూఢచర్యం కేసులో అరెస్టు చేశారు. పాకిస్థాన్ మాజీ హైకమిషనర్ ఎహ్సాన్-ఉర్-రహీమ్ అలియాస్ డానిష్, జస్బీర్ సింగ్‌ను ఢిల్లీలో జరిగిన ఒక పాకిస్థాన్ నేషనల్ డే కార్యక్రమానికి ఆహ్వానించినట్లు డీజీపీ వెల్లడించారు. ఈ కార్యక్రమంలో జస్బీర్ సింగ్ పాకిస్థానీ ఆర్మీ అధికారులతో మాట్లాడినట్లు సమాచారం.

జస్బీర్ సింగ్ 2020, 2021, 2024 సంవత్సరాల్లో మూడు సార్లు పాకిస్థాన్‌ను సందర్శించాడు. అతని వద్ద నుంచి పలు ఎలక్ట్రానిక్ పరికరాలను స్వాధీనం చేసుకున్నామని డీజీపీ తెలిపారు. ఈ పరికరాల్లో చాలా మంది పాకిస్థానీ ప్రముఖుల కాంటాక్ట్ నంబర్‌లు ఉన్నట్లు గుర్తించారు. ప్రస్తుతం ఫోరెన్సిక్ డిపార్ట్‌మెంట్ ఈ డేటా మొత్తాన్ని తిరిగి పొందడానికి ప్రయత్నిస్తోంది. ఈ డేటా ద్వారా ఈ గూఢచర్యం నెట్‌వర్క్ ఎంత పెద్దది.. ఎవరెవరు ఇందులో పాలుపంచుకున్నారు అనే పూర్తి వివరాలు త్వరలోనే బయటకు రానున్నాయి.