మోడీ దెబ్బకు బెండ్ అయిన ఎలన్ మస్క్.. 'ఎక్స్'పై కీలక నిర్ణయం
అయితే ప్రపంచవ్యాప్తంగా ఇతర దేశాల్లో ఈ కంటెంట్ పూర్తిగా నిషేధం కాలేదని కూడా స్పష్టం చేసింది.
By: A.N.Kumar | 3 March 2026 5:59 PM IST
డిజిటల్ యుగంలో సోషల్ మీడియా వేదికలు సమాచార ప్రసారానికి మాత్రమే కాకుండా వినోదం, వ్యక్తిగత వ్యక్తీకరణకు ప్రధాన కేంద్రాలుగా మారాయి. అయితే అదే సమయంలో అసభ్య, అశ్లీల కంటెంట్ విస్తరణపై సమాజంలో పెరుగుతున్న ఆందోళనలు ప్రభుత్వాలను కఠిన నిర్ణయాల వైపు నడిపిస్తున్నాయి. ఈ నేపథ్యంలో ప్రముఖ సోషల్ మీడియా వేదిక ఎక్స్ భారత్లో పెద్ద నిర్ణయం తీసుకుంది. దేశంలో అసభ్య/అడల్ట్ కంటెంట్ను జియో-బ్లాక్ చేస్తూ కీలక చర్యలు ప్రారంభించింది.
ఇప్పటికే భారత ప్రభుత్వం అశ్లీల వెబ్సైట్లపై కఠిన నిషేధం విధించిన విషయం తెలిసిందే. మహిళలపై అవమానకర కంటెంట్, అసామాజిక ధోరణులు పెరుగుతున్నాయనే కారణాలతో ప్రభుత్వం పలు పో*ర్న్ వెబ్సైట్లను బ్లాక్ చేసింది. అదే దిశగా సోషల్ మీడియా వేదికలపై కూడా నియంత్రణలు కట్టుదిట్టం చేస్తోంది. ఈ క్రమంలో ‘ఎక్స్’ తీసుకున్న తాజా నిర్ణయం ప్రభుత్వ విధానాలకు అనుసరణగా భావిస్తున్నారు.
ఈ పరిణామంపై ఒక నెటిజన్ ‘ఎక్స్’ సంస్థకు చెందిన ఏఐ చాట్బాట్ గ్రోక్ ను ప్రశ్నించగా, భారత్లో అడల్ట్ వీడియోలను జియో-బ్లాక్ చేస్తున్నట్లు స్పష్టం చేసింది. “మార్చి 3, 2026 నుంచి భారత్లో పరస్పర సమ్మతితో రూపొందించిన అడల్ట్/సె*క్సువల్ వీడియోలను జియో-బ్లాక్ చేస్తున్నాం. ఇది ప్రభుత్వ అసభ్య కంటెంట్ నియంత్రణ నిబంధనలకు అనుగుణంగా తీసుకున్న చర్య” అని గ్రోక్ వివరణ ఇచ్చింది.
అయితే ప్రపంచవ్యాప్తంగా ఇతర దేశాల్లో ఈ కంటెంట్ పూర్తిగా నిషేధం కాలేదని కూడా స్పష్టం చేసింది. అక్కడ సెన్సిటివ్గా ట్యాగ్ చేయబడిన కంటెంట్ మాత్రమే అనుమతించబడుతుందని.. ముఖ్యంగా పిల్లలు లేదా అనుమతి లేని వీక్షకుల దృష్టికి రాకుండా జాగ్రత్తలు తీసుకుంటున్నామని తెలిపింది. అంటే భారత్లో మాత్రమే ఈ కంటెంట్కు పూర్తి స్థాయి నిరోధం అమల్లోకి వచ్చినట్లు అర్థమవుతోంది.
సమాజ శ్రేయస్సు దృష్ట్యా ఈ నిర్ణయాన్ని పలువురు స్వాగతిస్తున్నారు. ముఖ్యంగా యువతపై.. బాలలపై సోషల్ మీడియా ప్రభావం ఎక్కువగా ఉన్న ఈ కాలంలో అశ్లీల కంటెంట్ నియంత్రణ అవసరమనే అభిప్రాయం వ్యక్తమవుతోంది. మహిళల గౌరవం, కుటుంబ విలువలు, సాంస్కృతిక పరిరక్షణ వంటి అంశాలను ప్రస్తావిస్తూ ఈ చర్యను సమర్థిస్తున్నారు.
అయితే మరోవైపు డిజిటల్ స్వేచ్ఛ, వ్యక్తిగత హక్కుల పరిరక్షణ కోణంలో విమర్శలు కూడా వినిపిస్తున్నాయి. ఇంటర్నెట్ వేదికలు స్వేచ్ఛా వ్యక్తీకరణకు నిలయాలుగా ఉండాలని భావించే వర్గాలు ఈ నిర్ణయంపై ప్రశ్నలు లేవనెత్తుతున్నాయి. అయినప్పటికీ దేశీయ చట్టాలకు అనుగుణంగా సంస్థలు పనిచేయాల్సిందేనన్న వాదన బలంగా వినిపిస్తోంది.
భారత్లో డిజిటల్ కంటెంట్ నియంత్రణలో ఇది ఒక ముఖ్యమైన మైలురాయిగా చెప్పవచ్చు. ప్రభుత్వం తీసుకుంటున్న కఠిన చర్యలకు అనుగుణంగా సోషల్ మీడియా సంస్థలు కూడా తమ విధానాలను మార్చుకుంటున్నాయి. దీని ప్రభావం భవిష్యత్తులో ఇతర వేదికలపైనా పడే అవకాశం ఉందని నిపుణులు అంచనా వేస్తున్నారు.
డిజిటల్ ప్రపంచంలో స్వేచ్ఛా పరిమితుల మధ్య సమతుల్యత ఎలా సాధించాలన్నదే ఇప్పుడు ప్రధాన చర్చగా మారింది.