నా సీటెక్కడో చెప్పండి.. బోర్డింగ్ పాసుతో ఫ్లైట్ లోకి కంగారూ.. ప్యాసింజర్ల పరేషాన్

సోషల్ మీడియాలో ప్రస్తుతం ఒక వింత వీడియో విపరీతంగా వైరల్ అవుతోంది. ఒక ముద్దులొలికే కంగారూ తన వీపుపై బ్యాగును తగిలించుకొని, ముందు కాళ్లతో బోర్డింగ్ పాస్‌ను పట్టుకొని విమానం ఎక్కి, చెక్-ఇన్ అయ్యాక తన సీటులో కూర్చున్నట్లు ఈ వీడియోలో కనిపిస్తోంది. ఈ వీడియో చూసిన లక్షలాది మంది నెటిజన్లు ఆశ్చర్యపోయారు. "కంగారూలు కూడా విమానం ఎక్కుతున్నాయా?" అని ఆందోళన చెందారు. అసలు ఈ సంఘటన ఎక్కడ జరిగింది అని నెటిజన్లు సోషల్ మీడియాలో తెగ వెతికారు.

'ఇన్‌ఫినైట్ అన్‌రియాలిటీ' అనే ఇన్‌స్టాగ్రామ్ పేజీ ఈ వీడియోను పోస్ట్ చేసింది. ఈ పేజీ AI- రూపొందించిన జంతువుల క్లిప్‌లను షేర్ చేస్తూ ఉంటుంది. కానీ, ఈ కంగారూ వీడియో మాత్రం అచ్చం నిజమైనదిలా కనిపించింది. ఒక కంగారూ విమానంలో బోర్డింగ్ పాస్‌ను పట్టుకొని ప్రశాంతంగా ఉన్నట్లు కనిపించిన ఈ వీడియో అందరినీ ఆకట్టుకుంది. అంతేకాకుండా, ఈ వీడియో నెటిజన్లలో వినోదం, గందరగోళం రెండింటినీ కలిగించింది.

ఈ వీడియోలో ఒక మహిళ విమాన సిబ్బందితో వాదిస్తుండగా.. కంగారూ ఓపికగా నిలబడి ఉంది. ఆ తర్వాత కంగారూ అక్కడి నుండి తన సీటులో కూర్చోవడానికి వెళ్తున్నట్లు కనిపిస్తుంది. ఈ వీడియో చూసిన చాలా మంది ప్రజలు నిజమని నమ్మి గందరగోళానికి గురయ్యారు. ఈ కంగారూ వీడియోను ఆర్టిఫిషియల్ ఇంటెలిజెన్స్ ఉపయోగించి రూపొందించారు. దీనిని మొదట 'ఇన్‌ఫినైట్ అన్‌రియాలిటీ' అనే ఇన్‌స్టాగ్రామ్ పేజీలో పోస్ట్ చేశారు. ఈ పేజీ ఇంతకు ముందే అనేక జంతువులకు సంబంధించిన ఇలాంటి వీడియోలను సృష్టించింది. విమాన సీటులో కూర్చున్న హిప్పోపొటామస్, విమానం ఎక్కుతున్న జిరాఫీ వంటి వీడియోలను కూడా ఇది సృష్టించి విడుదల చేసింది.