హైదరాబాద్ కాదు.. విజయనగరమే నా టార్గెట్.. దర్యాప్తులో సిరాజ్ సంచలన నిజాలు!

ఆంధ్రప్రదేశ్‌లోని విజయనగరం ఉగ్రవాద అనుమానితుల కేసులో ఇప్పుడు సంచలన విషయాలు వెలుగులోకి వస్తున్నాయి. ఈ కేసులో ప్రధాన నిందితుల్లో ఒకడైన సిరాజ్ అనే వ్యక్తి చెప్పిన మాటలు అందరినీ షాక్‌కు గురిచేస్తున్నాయి. హైదరాబాద్‌లో పేలుళ్లు జరపమని సౌదీలోని తమ హ్యాండ్లర్లు ఆదేశించినా, తాను మాత్రం విజయనగరమే తన మొదటి టార్గెట్ అని సిరాజ్ చెప్పాడని తెలుస్తోంది. పేలుళ్ల కోసం ఏకంగా 4 కీలక ప్రాంతాలను సెలక్ట్ చేసుకున్నట్లు సమాచారం. ఈ వార్త విజయనగరంతో పాటు తెలుగు రాష్ట్రాల్లో పెద్ద కలకలం రేపుతోంది.

ఈ కేసులో జాతీయ దర్యాప్తు సంస్థ (NIA) విచారణలో భాగంగా చాలా షాకింగ్ వివరాలు బయటపడుతున్నాయి.పేలుళ్లకు అవసరమైన శిక్షణను తాను సౌదీ అరేబియాలో పొందానని సిరాజ్ ఒప్పుకున్నట్లు తెలుస్తోంది. ఇది భారత్‌లో ఉగ్రవాద కార్యకలాపాలకు విదేశీ సంబంధాలు ఉన్నాయనే ఆందోళనలను మరింత పెంచుతోంది. శిక్షణ అనంతరం భారత్‌కు తిరిగి వచ్చి, ఇక్కడ దాడులకు ప్రణాళికలు రచించినట్లు ఎన్‌ఐఏ అనుమానిస్తోంది. ఈ కేసులో మరో నిందితుడు సమీర్ కూడా ఎన్‌ఐఏ విచారణలో కీలక విషయాలను బయటపెట్టాడని చెబుతున్నారు. పేలుళ్లపై తాను పాకిస్తాన్‌లో శిక్షణ తీసుకున్నానని సమీర్ అంగీకరించాడట. సౌదీ, పాకిస్తాన్‌లతో ఈ ఉగ్రవాద నెట్‌వర్క్‌కు సంబంధాలు ఉన్నాయని ఈ అంగీకారాలు స్పష్టం చేస్తున్నాయి.

కొన్ని నివేదికల ప్రకారం.. ఈ అనుమానితులకు పాకిస్తాన్ నుంచి పదేపదే ఆదేశాలు అందినట్లు.. వారు అక్కడి ఉగ్రవాద సంస్థలతో నిరంతరం సంప్రదింపులు జరిపినట్లు తెలుస్తోంది. సాధారణంగా ఉగ్రవాదులు హైదరాబాద్ వంటి పెద్ద నగరాలను లక్ష్యంగా చేసుకుంటారు. కానీ సిరాజ్ విజయనగరాన్ని తన మొదటి టార్గెట్‌గా చెప్పడం అనేక ప్రశ్నలను లేవనెత్తుతోంది. విజయనగరం ఒక చిన్న పట్టణం కావడంతో, అక్కడ భద్రతా చర్యలు పెద్ద నగరాలతో పోలిస్తే తక్కువగా ఉంటాయని భావించి ఉండవచ్చు. లేదంటే, ఇది స్థానిక అంశాలతో ముడిపడి ఉన్న వ్యూహమా అన్న కోణంలో కూడా ఎన్‌ఐఏ దర్యాప్తు చేపడుతోంది.

పేలుళ్ల కోసం 4 కీలక ప్రాంతాలను సెలక్ట్ చేసుకున్నట్లు సిరాజ్ చెప్పాడని సమాచారం. ఈ ప్రాంతాలు ప్రజలు ఎక్కువగా గుమిగూడే ప్రదేశాలు, లేదా ముఖ్యమైన ప్రభుత్వ కార్యాలయాలు అయ్యే అవకాశం ఉందని భద్రతా వర్గాలు అనుమానం వ్యక్తం చేస్తున్నాయి. అయితే, ఆ 4 ప్రాంతాలు ఏవి అనేది మాత్రం ఇంకా స్పష్టంగా బయటపడలేదు. ఎన్‌ఐఏ అధికారులు ఆ ప్రాంతాలపై రహస్యంగా నిఘా పెట్టి, ఎలాంటి ప్రమాదం జరగకుండా చూస్తున్నట్లు తెలుస్తోంది.

ఈ కేసులో నిఘా వర్గాలు గత కొంతకాలంగా నిఘా పెట్టినట్లు తెలుస్తోంది. అనుమానితుల కదలికలు, వారి ఫోన్ సంభాషణలు, సోషల్ మీడియా కార్యకలాపాలను ట్రాక్ చేసిన తర్వాతే అరెస్టులు చేసినట్లు సమాచారం. ఈ అరెస్టులు కేవలం కొందరు వ్యక్తులవి మాత్రమే కాకుండా, ఒక పెద్ద ఉగ్రవాద నెట్‌వర్క్‌లో భాగం కావచ్చని భద్రతా అధికారులు అనుమానిస్తున్నారు. ఈ ఘటనతో తెలుగు రాష్ట్రాల్లో భద్రతా వ్యవస్థలు మరింత అప్రమత్తమయ్యాయి. ప్రజలు కూడా అపరిచిత వ్యక్తులు, అనుమానాస్పద వస్తువుల పట్ల జాగ్రత్తగా ఉండాలని పోలీసులు హెచ్చరిస్తున్నారు.