కింగ్‌ఫిషర్ పెంట్‌హౌస్ నిర్మాణంపై విజయ్ మాల్యా కామెంట్స్

ఒకప్పుడు'కింగ్ ఆఫ్ గుడ్ టైమ్స్'గా పేరుపొందిన, రాయల్ ఛాలెంజర్స్ బెంగళూరు మాజీ యజమాని విజయ్ మాల్యా గురించి తెలియని వారంటూ ఉండరు. ఆర్థిక సమస్యలతో ఆయన దేశం విడిచి వెళ్లినప్పటికీ ఆయన గురించిన ఆసక్తికర విషయాలు ఎప్పుడూ చర్చల్లో ఉంటాయి. తాజాగా ఒక నాలుగు గంటల నిడివి గల పాడ్‌కాస్ట్‌లో మాల్యా.. గత తొమ్మిదేళ్లుగా తనపై వచ్చిన ఆరోపణలన్నింటినీ ప్రస్తావించారు. అంతేకాదు, బెంగళూరులోని తన ప్రసిద్ధ కింగ్‌ఫిషర్ టవర్స్ పెంట్‌హౌస్ గురించి ఒక రహస్యాన్ని బయటపెట్టారు. అదంతా ఒక సరదా జోక్‌గా మొదలైందని మాల్యా చెప్పడం ఇప్పుడు హాట్‌టాపిక్‌గా మారింది.

విజయ్ మాల్యా మాట్లాడుతూ.. కింగ్‌ఫిషర్ టవర్స్ పైభాగంలో ఉన్న ఆ లగ్జరీ ఇల్లు తన చిన్ననాటి ఇల్లు అని చెప్పుకొచ్చారు. అది తన తండ్రికి చెందిన 100 సంవత్సరాల నాటి పాత భవనం అని ఆయన తెలిపారు. తాను ఆ ఇంట్లోనే పెరిగానని, తన తండ్రి కూడా అక్కడే నివసించేవారని మాల్యా గుర్తుచేసుకున్నారు. ఆ పెంట్‌హౌస్‌ను కొత్త భవనం పైన నిర్మించాలనే ఆలోచన మొదట్లో కేవలం ఒక సరదా జోక్ మాత్రమే అని మాల్యా అన్నారు.

ఇర్ఫాన్ రజాక్ నేతృత్వంలోని ప్రెస్టీజ్ గ్రూప్ అనే ఒక పెద్ద రియల్ ఎస్టేట్ కంపెనీ మాల్యాకు చెందిన పాత ఇంటి స్థలంలో ఒక భారీ, విలాసవంతమైన నివాస భవనాన్ని నిర్మించాలనుకుంది. ఈ సమయంలో మాల్యా సరదాగా ఒక షరతు పెట్టారు. "నా కుటుంబానికి చెందిన పాత బంగ్లాను మీరు కొత్తగా కట్టబోయే భవనం పైభాగంలో ఉంచగలిగితేనే నేను అంగీకరిస్తాను" అని ఆయన అన్నారట. తాను ఏదో సరదాగా అన్నప్పటికీ ప్రెస్టీజ్ గ్రూప్ వారు మాత్రం ఆ జోక్‌ను నిజం చేసి చూపించారు. కొత్త టవర్స్‌ను నిర్మించి దాని పైభాగంలో ఆ పాత బంగ్లాను అమర్చారు. తాను సరదాగా అన్నప్పటికీ వారు నిజం చేసి చూపించడం పట్ల మాల్యా ఆశ్చర్యం వ్యక్తం చేశారు.

ఈ ఆస్తి కబ్బన్ పార్క్ వైపుగా ఉంటుంది. బెంగళూరులోని వ్యాపార ప్రాంతానికి నడిబొడ్డున ఉంది. ఇది విజయ్ మాల్యా బాల్యం గడిపిన ఇల్లు కావడం దీనికి ఒక ప్రత్యేక గుర్తింపును తెచ్చిపెట్టింది. అయితే, ప్రస్తుతం ఈ ఆస్తి అసంపూర్ణంగా ఉంది. యునైటెడ్ బ్రూవరీస్ హోల్డింగ్స్ లిమిటెడ్ వివాదం కారణంగా ఇది కోర్టు కేసుల్లో చిక్కుకుపోయింది.మాల్యా రూ.9,000 కోట్లకు పైగా రుణాలను ఎగవేశారు. వీటిలో ఎక్కువ భాగం కింగ్‌ఫిషర్ ఎయిర్‌లైన్స్‌కు చెందినవే. దర్యాప్తు సంస్థల దాడులు, కేసుల మధ్య ఆయన 2016లో భారతదేశం విడిచి వెళ్లిపోయారు.

కింగ్‌ఫిషర్ టవర్స్ కేవలం మాల్యా పెంట్‌హౌస్‌కు మాత్రమే కాదు. అక్కడ నివసించే ప్రముఖుల వల్ల కూడా ప్రసిద్ధి చెందింది. ఇన్ఫోసిస్ సహ-వ్యవస్థాపకుడు నారాయణ మూర్తి, జెరోధాకు చెందిన నిఖిల్ కామత్ వంటి ఇతర ప్రముఖులు ఈ టవర్స్‌లో నివసిస్తున్నారు. కబ్బన్ పార్క్, చిన్నస్వామి స్టేడియం సమీపంలో ఉండటం వల్ల బెంగళూరులో ఈ భవనం ఒక ప్రత్యేకమైన, లగ్జరీ భవనంగా నిలిచింది.