అమెరికా వీసా దారులు జాగ్రత్త..! యు.ఎస్ ఎంబసీ హెచ్చరిక

గత ఐదేళ్లలో భారతీయ విద్యార్థులు, వలసదారుల సంఖ్య అమెరికా వైపు గణనీయంగా పెరిగింది. ఈ ప్రవాహం రాబోయే కాలంలో మరింత పెరిగే అవకాశం కనిపిస్తోంది. అయితే, అదే సమయంలో అమెరికా వలస విధానాలు కఠినతరం అవుతున్నాయి. ముఖ్యంగా ట్రంప్ పరిపాలనలో ప్రవేశపెట్టిన నియమాలు ఇప్పటికీ అమలులో ఉన్నాయి, తాత్కాలిక వీసాలపై నియంత్రణ మరింత పటిష్టంగా మారింది.

తాజాగా అమెరికా దౌత్య కార్యాలయం భారతదేశంలోని వీసా హోల్డర్లకు ఒక ముఖ్యమైన హెచ్చరికను జారీ చేసింది. "వీసా మంజూరైన తర్వాత కూడా అమెరికా వలస నియమాలను పాటిస్తున్నారా లేదా అనే విషయాన్ని మేము నిరంతరం పరిశీలిస్తూనే ఉంటాం. ఎవరైనా నిబంధనలను అతిక్రమించినా వారి వీసాలు రద్దు చేసి, వారిని తక్షణమే వెనక్కి పంపించేస్తాం" అని అమెరికా ఎంబసీ స్పష్టం చేసింది.

గతంలో వలస విధానాలు కొంత సరళంగా ఉండేవి. భారతీయ విద్యార్థులు, వీసా హోల్డర్లు పార్ట్‌టైమ్ ఉద్యోగాలు చేయడం లేదా ఇతర కార్యకలాపాలలో పాల్గొనడంపై పెద్దగా నియంత్రణ ఉండేది కాదు. కానీ ఇప్పుడు పరిస్థితి పూర్తిగా మారిపోయింది. అమెరికా అధికారులు వలస చట్టాలను ఉల్లంఘించే వారిపై కఠిన చర్యలు తీసుకుంటున్నారు. అందువల్ల, వీసా హోల్డర్లు తమ వీసా మంజూరైన తర్వాత కూడా అమెరికాలో అన్ని వలస చట్టాలు, నియమాలను ఖచ్చితంగా పాటించాల్సి ఉంటుంది. లేదంటే వారి వీసాలు రద్దయి, స్వదేశానికి పంపించబడే ప్రమాదం ఉంది.

ఇది అమెరికా ప్రభుత్వ వైఖరిని స్పష్టం చేసే బలమైన హెచ్చరికగా భావించవచ్చు. అందుకే భారతీయ వీసా హోల్డర్లు ఇప్పుడు మరింత జాగ్రత్తగా ఉండాలి. చిన్నపాటి పొరపాటు కూడా వారి భవిష్యత్తుపై తీవ్ర ప్రభావం చూపే అవకాశం ఉంది.

వీసా హోల్డర్లు, ముఖ్యంగా విద్యార్థులు, ఉద్యోగార్థులు అందరూ వలస చట్టాలను పకడ్బందీగా పాటించాలి. స్వయంగా అమెరికా ఎంబసీ నుంచే ఈ రకమైన హెచ్చరిక రావడం పరిస్థితి తీవ్రతను స్పష్టంగా సూచిస్తోంది.