బ్రేకింగ్ : విదేశీ విద్యార్థులకు వీసాలు నిలిపేసిన అమెరికా

విదేశీ విద్యార్థులకు వీసాలు జారీ చేసే ప్రక్రియను ట్రంప్ పరిపాలన తాత్కాలికంగా నిలిపివేసినట్లు తెలుస్తోంది. భవిష్యత్తులో విద్యార్థుల సోషల్ మీడియా కార్యకలాపాలను క్షుణ్ణంగా పరిశీలించిన అనంతరమే వీసాలు మంజూరు చేయాలనే దిశగా అమెరికా ప్రభుత్వం యోచిస్తున్నట్లు సమాచారం. ఈ మంగళవారం, అమెరికా విదేశాంగ కార్యదర్శి మార్కో రుబియో అన్ని అమెరికా రాయబార కార్యాలయాలు , కాన్సులేట్‌లకు విద్యార్థుల వీసా ఇంటర్వ్యూలను తక్షణమే నిలిపివేయాలని ఆదేశాలు జారీ చేసినట్లు ఒక అంతర్గత టెలిగ్రామ్ ద్వారా వెల్లడైంది. "సోషల్ మీడియా స్క్రీనింగ్ ,ధృవీకరణ ప్రక్రియలను విస్తృతం చేయడానికి సన్నాహాలు చేస్తున్నందున, తదుపరి ఆదేశాలు వెలువడే వరకు వీసా అపాయింట్‌మెంట్‌లు ఇవ్వవద్దు" అని ఆ టెలిగ్రామ్‌లో స్పష్టం చేసినట్లు తెలిసింది.

ఇటీవలి కాలంలో వేలాది మంది విదేశీ విద్యార్థుల వీసాలను రద్దు చేసేందుకు అమెరికా స్టేట్ డిపార్ట్‌మెంట్ , హోంల్యాండ్ సెక్యూరిటీ విభాగం చర్యలు తీసుకున్నప్పటికీ కొన్ని సందర్భాల్లో న్యాయస్థానాల జోక్యంతో ఆ ప్రక్రియకు తాత్కాలికంగా బ్రేకులు పడ్డాయి. ఉదాహరణకు హార్వర్డ్ విశ్వవిద్యాలయంలో విద్యనభ్యసిస్తున్న సుమారు 7,000 మంది విదేశీ విద్యార్థుల వీసాలను రద్దు చేయాలని హోంల్యాండ్ సెక్యూరిటీ కార్యదర్శి క్రిస్టీ నోమ్ తీసుకున్న నిర్ణయాన్ని, న్యాయమూర్తి జెఫ్రీ ఎస్. వైట్ జారీచేసిన జాతీయస్థాయి స్టే ఆర్డర్ నిలిపివేసింది. అయినప్పటికీ, ఇప్పటివరకు నాలుగు వేలకు పైగా విద్యార్థుల వీసాలు రద్దు చేయబడ్డాయని అధికారిక గణాంకాలు చెబుతున్నాయి. వీరిలో కొందరు అగ్నిప్రమాదాలకు పాల్పడటం, వన్యప్రాణుల అక్రమ రవాణా, పిల్లల శిక్షణా దోషాలు, గృహ హింస, మద్యం సేవించి వాహనాలు నడపడం, దొంగతనం వంటి తీవ్రమైన ఆరోపణలు ఎదుర్కొంటున్నట్లు సమాచారం.

- సోషల్ మీడియాపై ప్రత్యేక దృష్టి.. ఏఐ వినియోగం

సోషల్ మీడియా ఖాతాల స్క్రీనింగ్ కోసం ప్రభుత్వ విభాగాలు ఇప్పటికే కృత్రిమ మేధ (ఆర్టిఫిషియల్ ఇంటెలిజెన్స్) ఆధారిత పైలట్ ప్రాజెక్టును ప్రారంభించినట్లు తెలుస్తోంది. ముఖ్యంగా హమాస్ వంటి తీవ్రవాద సంస్థలకు మద్దతుగా పోస్టులు పెట్టినట్లు గుర్తిస్తే, తక్షణమే వారి వీసాలను రద్దు చేస్తున్నారు. "తీవ్రవాద సంస్థలకు మద్దతు పలికే విదేశీయులకు అమెరికాలో స్థానం లేదు. అలాంటి అభిప్రాయాలను వ్యక్తం చేయడం మన దేశ భద్రతకు పెను ముప్పుగా పరిణమిస్తుంది" అని రుబియో వ్యాఖ్యానించినట్లు సమాచారం. ఇటీవల కొలంబియా యూనివర్సిటీలో ఇజ్రాయెల్‌కు వ్యతిరేకంగా జరిగిన ఆందోళనల్లో పాల్గొన్న మహ్మూద్ ఖలీల్ అనే విద్యార్థి వీసా , గ్రీన్ కార్డును అమెరికా ప్రభుత్వం రద్దు చేసింది. అతను "అపార్థైడ్ డైవెస్ట్" అనే సంస్థకు ప్రతినిధిగా వ్యవహరించినట్లు అధికారులు గుర్తించారు.

-రాజకీయ అభిప్రాయాల ఆధారంగా వీసా నిరాకరణ?

వీసా మంజూరు ప్రక్రియలో అభ్యర్థుల సోషల్ మీడియా ఖాతాలను పరిశీలించడం కొత్తేమీ కాదని, అయితే ఇది గతంలో ప్రధానంగా వివాహాల ద్వారా వీసా పొందే వారి నిజాయితీని నిర్ధారించుకోవడానికి మాత్రమే ఎక్కువగా ఉపయోగించేవారని రీవ్స్ ఇమ్మిగ్రేషన్ లా గ్రూప్ మేనేజింగ్ పార్ట్‌నర్ డెవిన్ కానొల్లి తెలిపారు. అయితే ప్రస్తుత పరిణామాల నేపథ్యంలో కేవలం రాజకీయ అభిప్రాయాల ఆధారంగా కూడా వీసాలు తిరస్కరించే అవకాశం ఉందా అనే సందేహాలు వ్యక్తమవుతున్నాయి.

ఇజ్రాయెల్-హమాస్ వంటి సున్నితమైన అంశాలపై చేసే వ్యాఖ్యలు వీసా నిరాకరణకు దారితీయవచ్చని నిపుణులు అంచనా వేస్తున్నారు. కానీ ఆఫ్రికనర్లకు ఆశ్రయం కల్పించడం వంటి ఇతర వివాదాస్పద అంశాలపై చేసే వ్యాఖ్యలు కూడా వీసా తిరస్కరణకు కారణమవుతాయా అనే దానిపై ఇంకా స్పష్టత రావాల్సి ఉంది.

ఈ కీలక పరిణామాలపై శ్వేతసౌధం నుంచి ఇప్పటివరకు ఎలాంటి అధికారిక ప్రకటన వెలువడలేదు. తదుపరి మార్గదర్శకాలు వెలువడే వరకు విదేశీ విద్యార్థులలో ఆందోళన నెలకొంది.