భారత యువకుడిదే తప్పు.. అమెరికాలో అమానుషంపై స్పందించిన విదేశాంగ శాఖ

అమెరికాలోని నెవార్క్ విమానాశ్రయంలో ఓ భారతీయ యువకుడిపై జరిగిన సంఘటన ఇప్పుడు తీవ్ర చర్చకు దారి తీసింది. అక్కడి భద్రతాధికారులు అతనిపై చూపిన దాడి లాంటి వ్యవహారం సోషల్ మీడియా ద్వారా వెలుగులోకి వచ్చి ప్రపంచవ్యాప్తంగా విమర్శలకు గురవుతోంది. దీనిపై భారత విదేశాంగశాఖ కూడా స్పందించింది.

-విదేశాంగ శాఖ ప్రకటన

భారత విదేశాంగశాఖ తెలిపిన వివరాల ప్రకారం.., హరియాణాకు చెందిన ఆ యువకుడు సరైన వీసా లేకుండా అక్రమ మార్గంలో అమెరికాలోకి ప్రవేశించాడు. ఇది చట్టవిరుద్ధం అని, విదేశీ నిబంధనలు అతడు ఉల్లంఘించిన విషయాన్ని భారత విదేశాంగ శాఖ స్పష్టం చేసింది. "ఆ యువకుడి ప్రవర్తన ప్రయాణ సమయంలో సరిగాలేదు. వీసా లేకుండా ప్రవేశించిన కారణంగా అతని మీద అక్కడి అధికారులు చర్యలు తీసుకున్నారు. ప్రస్తుతం అతని ఆరోగ్య పరిస్థితి మెరుగవుతోందని, అతన్ని భారత్‌కు తిరిగి పంపించేందుకు అక్కడి అధికారులతో సంప్రదింపులు జరుగుతున్నాయి" అని భారత విదేశాంగశాఖ వర్గాలు వెల్లడించాయి.

-అమెరికా భద్రతాదళాల చర్యలపై భారత్ అసంతృప్తి:

అయితే అక్రమంగా వెళ్లడం తప్పని తేలినా, ఆ యువకుడిపై అమెరికా భద్రతాధికారులు ప్రదర్శించిన హింసాత్మక ప్రవర్తనపై భారత్ తీవ్ర అసంతృప్తిని వ్యక్తం చేసింది. మానవ హక్కులను ఉల్లంఘించేలా ఆయనను నేలపై పడేసి, చేతులు వెనక్కి మడిచేలా బంధించడం ఖండనీయం అని పేర్కొంది. ఈ ఘటనకు సంబంధించిన ఫోటోలు, వీడియోలు సోషల్ మీడియాలో వైరల్‌ అవుతూ ప్రజల ఆగ్రహానికి దారి తీశాయి.ఇప్పటికే అమెరికా ప్రభుత్వం ట్రంప్ పాలన ప్రారంభమైన నాటినుంచి అక్రమంగా దేశంలోకి ప్రవేశించిన వారిపై కఠిన చర్యలు తీసుకుంటోంది. అప్పటి నుంచి పలువురు భారతీయులు కూడా అరెస్టై, మళ్లీ భారత్‌కు పంపించబడ్డారు.

-యువతకు గుణపాఠం - ప్రభుత్వాల బాధ్యత:

భారత ప్రభుత్వం ఇప్పటికే తమ పౌరులకు ఇతర దేశాలకు వీసా లేకుండా ప్రయాణించరాదని పలుమార్లు హెచ్చరించింది. అయినా కొన్ని చోట్ల యువకులు అక్రమ మార్గాల్లో ప్రయాణిస్తున్న ఘటనలు వెలుగు చూస్తూనే ఉన్నాయి. నెవార్క్ ఘటన కూడా అలాంటిదే. ఈ ఘటన భారత యువతకు గుణపాఠంగా నిలవాలి. చట్టబద్ధమైన మార్గాల ద్వారా మాత్రమే విదేశాలకు ప్రయాణించాలి. ఇదే సమయానికి విదేశీ ప్రభుత్వాలు కూడా మానవ హక్కుల పరిరక్షణలో శ్రద్ధ చూపాలని భారత్ మరోసారి గుర్తుచేసింది.