అమెరికా వస్తువులపై భారీ సుంకాలు.. చైనా గట్టి రియాక్షన్

అమెరికా అధ్యక్షుడు డొనాల్డ్ ట్రంప్ చైనా దిగుమతులపై సుంకాలను 145%కి పెంచిన నేపథ్యంలో చైనా కూడా ప్రతిస్పందించింది. అమెరికా వస్తువులపై ఉన్న సుంకాలను 84% నుండి 125%కి పెంచుతున్నట్లు శుక్రవారం ప్రకటించింది. అంతేకాకుండా అమెరికా తన చర్యలను ఏకపక్షంగా వ్యవహరిస్తుందంటూ.. ఇకపై అమెరికా సుంకాలు పెంచినా పట్టించుకోబోమని స్పష్టం చేసింది. చైనా అధ్యక్షుడు షీ జిన్‌పింగ్ యూరోపియన్ యూనియన్‌ను బీజింగ్‌తో కలిసి "ఏకపక్షంగా బెదిరించడాన్ని" ఎదుర్కోవాలని పిలుపునిచ్చారు.

అమెరికా తన అతిపెద్ద వాణిజ్య భాగస్వామిపై 125% తాజా సుంకాలను విధించడంతో అమెరికా వస్తువులు దిగుమతిదారులకు ఆర్థికంగా లాభదాయకం కానందున, అమెరికా యొక్క తదుపరి సుంకాల పెంపును పట్టించుకోబోమని చైనా తెలిపింది. "అమెరికా చైనాపై అసాధారణంగా అధిక సుంకాలు విధించడం అంతర్జాతీయ.. ఆర్థిక వాణిజ్య నియమాలు, ప్రాథమిక ఆర్థిక చట్టాలు , సాధారణ జ్ఞానాన్ని తీవ్రంగా ఉల్లంఘిస్తుంది. ఇది పూర్తిగా ఏకపక్షంగా బెదిరించడం..నిర్బంధించడం" అని చైనా ఆర్థిక మంత్రిత్వ శాఖ రాయిటర్స్‌తో చెప్పినట్లు పేర్కొంది.

"అమెరికా చైనా ప్రయోజనాలను గణనీయంగా ఉల్లంఘించడం కొనసాగిస్తే, చైనా దృఢంగా ప్రతి చర్యలు తీసుకుంటుంది. చివరి వరకు పోరాడుతుంది" అని ఆ ప్రకటన తెలిపింది. "అమెరికాకు ఎగుమతి చేయబడిన చైనా వస్తువులపై అదనపు సుంకాలు విధిస్తే, చైనా దానిని పట్టించుకోదు" అని చైనా ఆర్థిక మంత్రిత్వ శాఖ స్పష్టం చేసింది.

- ఏకపక్ష బెదిరింపులను ప్రతిఘటించాలని EUకి చైనా పిలుపు

అమెరికాతో పెరుగుతున్న వాణిజ్య యుద్ధంపై తన మొదటి బహిరంగ స్పందనలో చైనా అధ్యక్షుడు షీ జిన్‌పింగ్ చైనా "భయపడదని" ప్రకటించారు. ప్రపంచ మార్కెట్లు కుప్పకూలుతున్నా.. సంభావ్య మాంద్యం భయాలు పెరుగుతున్నా ఆయన ఈ వ్యాఖ్య చేశారు. అధ్యక్షుడు డొనాల్డ్ ట్రంప్ చైనా దిగుమతులపై 145 శాతం వరకు భారీ సుంకాలు విధించిన తర్వాత, అమెరికా యొక్క "ఏకపక్ష బెదిరింపులను" ఎదుర్కోవడానికి యూరోపియన్ యూనియన్‌ను కూడా బీజింగ్ పిలుపునిచ్చింది.

బీజింగ్‌లో స్పానిష్ ప్రధాన మంత్రి పెడ్రో సాంచెజ్‌తో జరిగిన సమావేశంలో అధ్యక్షుడు షీ జిన్‌పింగ్ ఈ విజ్ఞప్తి చేశారు. వాషింగ్టన్‌తో పెరుగుతున్న వాణిజ్య యుద్ధాన్ని ఎదుర్కోవడానికి చైనా యూరప్ సహకరించుకోవాలని షీ హెచ్చరించారు. "చైనా - యూరప్ తమ అంతర్జాతీయ బాధ్యతలను నెరవేర్చాలి... ఏకపక్ష బెదిరింపు చర్యలను సంయుక్తంగా ప్రతిఘటించాలి" అని పిలుపునిచ్చారు.

ఈ చర్య వారి స్వంత చట్టబద్ధమైన హక్కులు.. ప్రయోజనాలను కాపాడటమే కాకుండా అంతర్జాతీయ న్యాయం, ధర్మాన్ని కూడా కాపాడుతుందని చైనా అధ్యక్షుడు తెలిపారు.