చౌకైన డ్రోన్లతో రష్యాకు కోలుకోలేని దెబ్బ..రూ.60వేల కోట్ల నష్టం

అత్యాధునిక ఆయుధాలతో, శక్తివంతమైన వైమానిక దళంతో ప్రపంచంలోనే అత్యంత బలమైన దేశాలలో ఒకటిగా రష్యా (Russia) పేరు గాంచింది. అయితే, ఉక్రెయిన్ (Ukraine) కేవలం కొన్ని వేల రూపాయల విలువైన డ్రోన్లతో రష్యా సైనిక స్థావరాలపై భారీ దాడికి పాల్పడింది. రక్షణ నిపుణులు ఈ దాడిని ఆధునిక యుద్ధ చరిత్రలో అతిపెద్ద సర్జికల్ స్ట్రైక్ (Surgical Strike) గా అభివర్ణిస్తున్నారు. ఈ దాడిలో రష్యాకు సుమారు రూ.60,000 కోట్లు నష్టం వాటిల్లినట్లు అంచనా వేస్తున్నారు. చౌకైన టెక్నాలజీతో ఎంతటి బలవంతుడైన శత్రువును అయినా దెబ్బతీయవచ్చని ఈ ఘటన నిరూపించింది.

ఉక్రెయిన్ చేపట్టిన ఈ భారీ డ్రోన్ దాడిలో రష్యాలోని కీలక వైమానిక స్థావరాలు (air bases) లక్ష్యంగా చేసుకున్నారు. రష్యా రక్షణ మంత్రిత్వ శాఖ ప్రకారం, ఉక్రెయిన్ డ్రోన్‌లు ఐదు రష్యా ఎయిర్‌బేస్‌లపై దాడి చేశాయి. ఇందులో అణు సామర్థ్యం కలిగిన TU-95, Tu-22 వంటి వ్యూహాత్మక బాంబర్లు సహా సుమారు 40 రష్యన్ విమానాలను ధ్వంసం చేశామని ఉక్రెయిన్ ప్రకటించింది. ఈ దాడులు రష్యా సైనిక సామర్థ్యానికి తీవ్ర నష్టం కలిగించడమే కాకుండా.. వారి రక్షణ వ్యవస్థలలోని లోపాలను కూడా స్పష్టం చేశాయి.

ఈ దాడిలో ఉక్రెయిన్ ఉపయోగించిన డ్రోన్‌లు ఫస్ట్ పర్సన్ వ్యూ (FPV) రకానికి చెందినవి. వీటి ఖరీదు ఒక్కోటి కేవలం రూ.4235 మాత్రమే. ఈ డ్రోన్‌లకు పేలుడు పదార్థాలతో పాటు కెమెరాలను అమర్చుతారు. వీటిని ఆపరేట్ చేసేవారు (ఆపరేటర్లు) ప్రత్యేక గ్లాసెస్‌ (special glasses) సహాయంతో లక్ష్యం చేసిన ప్రాంతాలను లైవ్‌లో చూడగలుగుతారు. ఇది ఆపరేటర్లకు లక్ష్యంపై పూర్తి నియంత్రణను అందిస్తుంది. తద్వారా వారు అత్యంత కచ్చితత్వంతో దాడులు చేయగలరు.

ఫస్ట్ పర్సన్ వ్యూ (FPV) డ్రోన్‌లు వాటి తక్కువ ఖర్చు, అధిక విధ్వంసక సామర్థ్యం, వాడకంలో సౌలభ్యం కారణంగా ఆధునిక యుద్ధంలో గేమ్ ఛేంజర్ గా మారాయి. ఈ డ్రోన్‌లను చిన్న సైనిక బృందాలు కూడా సులభంగా ఉపయోగించవచ్చు. దీని వల్ల పెద్ద ఎత్తున వనరులు అవసరం లేకుండానే శత్రువులకు భారీ నష్టం కలిగించవచ్చు. రష్యా వంటి పెద్ద దేశంపై కేవలం కొన్ని వేల రూపాయల డ్రోన్లతో రూ.60,000 కోట్ల నష్టం కలిగించడం, సైనిక వ్యూహంలో ఒక విప్లవాత్మక మార్పుగా నిపుణులు భావిస్తున్నారు.

రక్షణ నిపుణులు ఈ డ్రోన్ దాడిని 'సర్జికల్ స్ట్రైక్' గా పేర్కొనడానికి కారణం, ఇది లక్షిత ప్రాంతాలపై మాత్రమే అత్యంత కచ్చితత్వంతో దాడి చేయగలిగింది. పెద్ద ఎత్తున ప్రాణ నష్టం లేదా అనుబంధ నష్టం (collateral damage) లేకుండా శత్రువు కీలక ఆస్తులను దెబ్బతీయడం ఇందులో ప్రధానం. ఈ దాడి ఆధునిక యుద్ధంలో డ్రోన్‌ల ప్రాధాన్యతను మరోసారి చాటింది. డ్రోన్ టెక్నాలజీ భవిష్యత్ యుద్ధాలను ఎలా ప్రభావితం చేయబోతోందో ఈ ఘటన స్పష్టం చేస్తోంది. రష్యాతో పోలిస్తే చాలా చిన్న సైనిక సామర్థ్యం ఉన్న ఉక్రెయిన్, ఇలాంటి వినూత్న పద్ధతులతో రష్యాకు తీవ్ర నష్టం కలిగించగలుగుతోంది.