పాక్‌కు సపోర్ట్ చేసిన టర్కీ, అజర్‌బైజాన్‌పై భారత్ ఆగ్రహం.. ఆ రంగానికి పెద్ద దెబ్బే!
మనోళ్లు ఉగ్రవాదుల స్థావరాలపై ఆపరేషన్ సింధూర్ చేస్తే ప్రపంచ దేశాలు వెల్కమ్ చెప్పాయి.
By: Tupaki Desk | 8 May 2025 12:30 PM
మనోళ్లు ఉగ్రవాదుల స్థావరాలపై ఆపరేషన్ సింధూర్ చేస్తే ప్రపంచ దేశాలు వెల్కమ్ చెప్పాయి. రష్యా, అమెరికా లాంటి పెద్దన్నలు కూడా ఉగ్రవాదాన్ని తుదముట్టించాల్సిందే అని తేల్చి చెప్పారు. కానీ, ఈ టైంలో పాకిస్తాన్‌కు సపోర్ట్‌గా రెండు దేశాలు మేమున్నామంటూ నిలబడ్డాయి. అవే టర్కీ, అజర్‌బైజాన్. ఈ రెండు కంట్రీలు పాకిస్తాన్‌కు జై కొట్టి, మన ఆపరేషన్ తప్పు అని అన్నాయి.
ఈ రెండు దేశాలు కూడా దౌత్యపరంగా మాట్లాడుకుంటేనే సమస్య పరిష్కారం అవుతుందని సలహా ఇచ్చాయి. టర్కీ, అజర్‌బైజాన్ వేర్వేరు ప్రకటనల ద్వారా తమ అభిప్రాయాన్ని బయటపెట్టాయి. టర్కీ విదేశాంగ శాఖ అయితే ట్వీట్ కూడా చేసింది. ఇండియా, పాకిస్తాన్ మధ్య ఉన్న సంబంధాలను మేం చాలా దగ్గరగా చూస్తున్నాం అంది. ఇండియా పాకిస్తాన్‌పై దాడి చేయడం యుద్ధానికి మొదటి అడుగు లాంటిది. ఇలాంటి రెచ్చగొట్టే పనులను మేం అస్సలు ఒప్పుకోం అని ఎక్స్ వేదికగా గట్టిగా చెప్పింది. అంతేకాదు, రెండు దేశాలు కూడా శాంతంగా ఉండాలని, ఒకరి మీద ఒకరు చర్యలు తీసుకోవద్దని టర్కీ సూచించింది.
ఇంకోవైపు అజర్‌బైజాన్ విదేశాంగ శాఖ కూడా ఇండియా, పాకిస్తాన్ మధ్య గొడవలు ఎక్కువ కావడం చూసి తాము చాలా బాధపడుతున్నామని చెప్పింది. పాకిస్తాన్‌పై జరిగిన సైనిక దాడులను ఖండిస్తున్నామని తేల్చి చెప్పింది. ఈ దాడుల్లో చాలా మంది సామాన్య ప్రజలు కూడా చనిపోయారని బాధపడింది. పాకిస్తాన్ ప్రజలకు తమ మద్దతు ఉంటుందని ఎక్స్ ద్వారా తెలిపింది.
వాస్తవానికి టర్కీ, అజర్‌బైజాన్‌లకు భారతదేశం నుంచి గణనీయమైన స్థాయిలో టూరిజం ఉంటుంది. వారి తాజా వ్యాఖ్యల నేపథ్యంలో భారతీయ పర్యాటకులు ఈ దేశాలకు ప్రయాణాలు కొనసాగిస్తారా లేదా ప్రత్యామ్నాయ గమ్యస్థానాలను ఎంచుకుంటారా అనేది చూడాలి. భారతదేశం నుండి టర్కీకి వెళ్ళే పర్యాటకుల సంఖ్య క్రమంగా పెరుగుతోంది. టర్కీ దాని చారిత్రక ప్రదేశాలు, సహజ సౌందర్యంతో భారతీయ పర్యాటకులను ఆకర్షిస్తోంది. ముఖ్యంగా ఇస్తాంబుల్, కాప్పడోసియా వంటి ప్రాంతాలు చాలా మందికి ఇష్టమైన ప్రదేశాలు.
అజర్‌బైజాన్ కూడా భారతీయ పర్యాటకులలో ప్రాచుర్యం పొందుతోంది. ముఖ్యంగా బాకు నగరం దాని ఆధునిక , చారిత్రక కట్టడాల కలయికతో, అలాగే కాస్పియన్ సముద్ర తీరంతో పర్యాటకులను ఆకర్షిస్తోంది. వీసా విధానాలు సరళంగా ఉండటం, అందుబాటు ధరలు కూడా ఇక్కడికి ఎక్కువ మంది భారతీయులు రావడానికి కారణాలు. 2024లో అజర్‌బైజాన్‌కు వచ్చిన భారతీయ పర్యాటకుల సంఖ్య గణనీయంగా పెరిగింది.
అయితే, టర్కీ మరియు అజర్‌బైజాన్ ఇటీవల పాకిస్తాన్‌కు మద్దతు తెలుపుతూ చేసిన వ్యాఖ్యలు భారతీయ పర్యాటకులలో ఆగ్రహాన్ని కలిగిస్తున్నాయి. సోషల్ మీడియాలో ఈ దేశాలను బహిష్కరించాలనే పిలుపులు కూడా వినిపిస్తున్నాయి. చాలా మంది తమ ప్రయాణ ప్రణాళికలను రద్దు చేసుకుంటున్నట్లు లేదా ప్రత్యామ్నాయ గమ్యస్థానాలను పరిశీలిస్తున్నట్లు తెలుస్తోంది.