అమెరికా 'కొంప' ముంచుతున్న ట్రంప్?

అధ్యక్షుడు డొనాల్డ్ ట్రంప్ తిరిగి అధికారంలోకి వచ్చిన తర్వాత విధించిన కొత్త సుంకాల (టారిఫ్‌లు) వల్ల అమెరికా మార్కెట్‌లో వస్తువుల ధరలు గణనీయంగా పెరిగాయి. ముఖ్యంగా దుస్తులు, బ్యాగులు వంటి దిగుమతి చేసుకునే వస్తువులపై ఈ ప్రభావం స్పష్టంగా కనిపిస్తోంది. ఇది అమెరికా పౌరులపై ఆర్థిక భారాన్ని పెంచుతోందని ఇటీవల సోషల్ మీడియాలో వైరల్ అవుతున్న వీడియోలు, పోస్ట్‌లు వెల్లడిస్తున్నాయి.

- ట్రంప్ టారిఫ్‌లు లక్ష్యం ఏంటి? ప్రభావం ఎంత?

ట్రంప్ ప్రభుత్వం విదేశీ ఉత్పత్తులపై సుంకాలను పెంచడం వెనుక ప్రధాన ఉద్దేశం అమెరికా తయారీ పరిశ్రమను ప్రోత్సహించడం. దేశీయంగా తయారైన ఉత్పత్తులను మరింత పోటీతత్వంగా మార్చి, దిగుమతులను తగ్గించడం ద్వారా అమెరికా ఆర్థిక వ్యవస్థను బలోపేతం చేయాలని ట్రంప్ యోచిస్తున్నారు. ఈ విధానంలో భాగంగానే చైనా, భారతదేశం వంటి దేశాల నుంచి వచ్చే వస్తువులపై భారీ సుంకాలు విధించారు. భారతదేశం నుండి దిగుమతి అయ్యే వస్తువులపై సుంకాన్ని 50%కి పెంచారు.చైనా నుండి వచ్చే వస్తువులపై 30% సుంకాన్ని విధించారు. ఈ సుంకాలు చివరికి అమెరికా వినియోగదారుల జేబులకే చిల్లు పెడుతున్నాయి. దిగుమతిదారులు పెరిగిన పన్నులను భరించలేక వస్తువుల ధరలను పెంచుతున్నారు. దీని వల్ల వినియోగదారులు అధిక ధరలు చెల్లించాల్సి వస్తోంది.

-వాల్‌మార్ట్‌ వీడియోలో వాస్తవాలు

మెర్సిడెస్‌ చాండ్లర్‌ అనే ఇన్‌స్టాగ్రామ్ యూజర్ వాల్‌మార్ట్‌ స్టోర్‌లో తీసిన వీడియో ఈ పరిస్థితికి ప్రత్యక్ష సాక్ష్యంగా నిలిచింది. ఆమె వీడియోలో పిల్లల దుస్తులు, బ్యాక్‌ప్యాక్‌ల ధరలు ఎలా పెరిగాయో చూపించారు.

ఇంతకుముందు $6.98 ఉండగా, ఇప్పుడు $10.98కి పెరిగింది. $19.97 నుంచి $24.97కి పెరిగింది. పాత ధరల మీద తెల్ల స్టిక్కర్లతో కొత్త ధరలను ముద్రించడం ఈ వీడియోలో స్పష్టంగా కనిపించింది. ఈ వీడియోపై వేలాదిమంది స్పందించారు. సుంకాలను దిగుమతి చేసుకున్న దేశాలు కాకుండా, అమెరికా ప్రజలే చెల్లిస్తున్నారని పలువురు వ్యాఖ్యానించారు.

-భారతదేశంపై ప్రభావం

అమెరికా విధించిన ఈ కొత్త సుంకాల వల్ల భారతదేశం యొక్క వాణిజ్య రంగంపై కూడా తీవ్ర ప్రభావం పడే అవకాశం ఉంది. అమెరికా, భారత టెక్స్‌టైల్ ఎగుమతులకు అతిపెద్ద మార్కెట్. 2023-24 ఆర్థిక సంవత్సరంలో భారతదేశం అమెరికాకు $10.05 బిలియన్ల విలువైన టెక్స్‌టైల్ ఉత్పత్తులను ఎగుమతి చేసింది. కొత్తగా విధించిన 50% సుంకం వల్ల ఈ ఎగుమతులు భారీగా తగ్గే అవకాశం ఉంది.

ఈ పరిస్థితి భారతీయ తయారీదారులకు, వ్యాపారులకు ఒక సవాలుగా మారింది. సుంకాల వల్ల ఉత్పత్తుల ధరలు పెరుగుతుండటంతో, అమెరికాలో భారతీయ వస్తువుల డిమాండ్ తగ్గవచ్చు. దీనివల్ల భారతీయ ఎగుమతులపై ప్రతికూల ప్రభావం పడుతుందని నిపుణులు అంచనా వేస్తున్నారు.

మొత్తానికి, ట్రంప్ టారిఫ్‌లు అమెరికాలో ద్రవ్యోల్బణానికి దారితీసి, సాధారణ ప్రజల కొనుగోలు శక్తిని తగ్గిస్తుంటే, అంతర్జాతీయంగా వాణిజ్య సంబంధాలపై కూడా తీవ్ర ప్రభావం చూపుతున్నాయి.