భారత్ పై అదే ద్వేషం.. వసలదారులపై అమెరియా యాడ్ దుమారం

అమెరికా అధ్యక్షుడు డొనాల్డ్ ట్రంప్ అధికారంలోకి వచ్చాక వలస విధానాలు మరింత కఠినమయ్యాయి. 'అమెరికా ఫస్ట్' అనే నినాదంతో, ప్రభుత్వం మాస్ డిపోర్టేషన్లు, అరెస్టులు, చట్టపరమైన ప్రవేశాలపై ఆంక్షలను కొత్త నిబంధనగా మార్చింది. ముఖ్యంగా వృత్తి నిపుణులకు ఇచ్చే హెచ్-1బీ వీసా దారులపై, వారిలో అధికంగా ఉన్న భారతీయులపై, వైట్ హౌస్ యంత్రాంగం బహిరంగంగానే వ్యతిరేకత వ్యక్తం చేస్తోంది.

* లేబర్ డిపార్ట్‌మెంట్ ప్రకటనలో భారత్‌పై అక్కసు

ఇటీవల, అమెరికా లేబర్ డిపార్ట్‌మెంట్ ఒక అధికారిక ప్రకటనను విడుదల చేసింది. ఈ యాడ్‌లో కంపెనీలు హెచ్-1బీ వీసాలను దుర్వినియోగం చేస్తున్నాయని, దీనివల్ల అమెరికన్ యువతకు ఉద్యోగ అవకాశాలు తగ్గిపోతున్నాయని ఆరోపించింది. "హెచ్-1బీ వీసా దుర్వినియోగం కారణంగా అమెరికన్ యువత తమ అమెరికన్ డ్రీమ్‌ను కోల్పోతున్నారు. విదేశీ కార్మికులు తక్కువ వేతనాలకు పనిచేస్తూ స్థానికుల అవకాశాలను దొంగిలిస్తున్నారు. కానీ ట్రంప్ ప్రభుత్వం ఈ అన్యాయాన్ని అరికట్టేందుకు చర్యలు తీసుకుంటోంది" అని ఆ వీడియోలో స్పష్టంగా పేర్కొంది.

ఇందులో మరింత వివాదాస్పదమైన విషయం ఏమిటంటే.. కేటాయించిన హెచ్-1బీ వీసాలలో 72 శాతం భారతీయులకే వెళ్తున్నాయని గ్రాఫ్ రూపంలో చూపడం ద్వారా, భారత్‌ను పరోక్షంగా ఈ 'దుర్వినియోగానికి' ప్రధాన కారణంగా చూపింది.

*ప్రాజెక్ట్ ఫైర్‌వాల్, పెరిగిన ఫీజుల భారం

ఈ ఆరోపణల నేపథ్యంలో, లేబర్ డిపార్ట్‌మెంట్ "ప్రాజెక్ట్ ఫైర్‌వాల్" పేరిట హెచ్-1బీ వీసా వ్యవస్థలో అవకతవకలు ఉన్నాయా అనే దానిపై విస్తృత ఆడిట్ ప్రారంభించింది. అంతేకాకుండా ట్రంప్ ప్రభుత్వం హెచ్-1బీ వీసా ఫీజులను భారీగా పెంచింది. ఈ ఫీజును ఏకంగా లక్ష డాలర్లకు పెంచాలని భావించడం దేశవ్యాప్తంగా పెద్ద చర్చనీయాంశమైంది. "ఈ వీసా వ్యవస్థలో మోసాలు ఎక్కువ. అమెరికన్ల వేతనాలను తగ్గిస్తోంది. కాబట్టి దానిని సరిదిద్దుతాం" అని వైట్ హౌస్ ఈ చర్యను సమర్థించుకుంది.

* న్యాయస్థానాల మెట్లు ఎక్కిన అభ్యంతరాలు

ట్రంప్ ప్రభుత్వ ఈ కఠిన నిర్ణయాలపై అమెరికాలో పెద్ద ఎత్తున వ్యతిరేకత వ్యక్తమైంది. అమెరికా ఛాంబర్ ఆఫ్ కామర్స్ ఈ నిర్ణయాన్ని తీవ్రంగా వ్యతిరేకించింది. వీసా వ్యవస్థ కాంగ్రెస్ ఆమోదించిన విధానమని, ట్రంప్ జోక్యంతో అది దెబ్బతింటోందని ఆరోపిస్తూ కోర్టును ఆశ్రయించింది. అనేక ఉద్యోగ సంఘాలు ఈ నిర్ణయాన్ని వెనక్కి తీసుకోవాలని డిమాండ్ చేశాయి. కాంగ్రెస్ సభ్యులు అధ్యక్షుడికి లేఖ రాసి, నైపుణ్యవంతులైన వలసదారులు అమెరికా ఆర్థిక వ్యవస్థకు వెన్నెముక అని, వారిపై ఆంక్షలు సరికాదని గుర్తుచేశారు.

* అమెరికన్ కంపెనీలకు సవాలు

హెచ్-1బీ వీసా దారులపై తీసుకుంటున్న ఈ నిర్ణయాలు అమెరికా కంపెనీలకు.. ముఖ్యంగా టెక్, ఆరోగ్య రంగాలకు పెద్ద సవాలుగా మారాయి. నైపుణ్య కార్మికుల కొరత పెరిగే ప్రమాదం ఉందని నిపుణులు హెచ్చరిస్తున్నారు. భారతీయ ఐటీ కంపెనీలు, ఇక్కడ పనిచేస్తున్న ప్రొఫెషనల్స్ ఈ పరిణామాల వల్ల తీవ్ర ఆందోళనకు గురవుతున్నారు.

మొత్తంగా ట్రంప్ ప్రభుత్వం "అమెరికా ఫస్ట్" అనే నినాదం కింద వలస విధానాలను కఠినతరం చేస్తూ, విదేశీ ప్రతిభపై ఆధారపడిన అమెరికా ఆర్థిక వ్యవస్థను ఒక కొత్త పరీక్షకు గురి చేస్తోంది.