ట్రంప్ గోల్డ్ కార్డ్ కల.. నిజం అవుతుందా?

అమెరికా అధ్యక్షుడు డొనాల్డ్ ట్రంప్ ప్రతిపాదించిన గోల్డ్ కార్డ్ ప్రాజెక్టు ఇటీవల అంతర్జాతీయంగా పెద్ద చర్చకు దారి తీసింది. అమెరికాలో పెరిగిపోతున్న జాతీయ అప్పు సమస్యను తగ్గించేందుకు ట్రంప్ ఈ పథకాన్ని ప్రవేశపెట్టారు. "5 మిలియన్ డాలర్ల విలువ గల గోల్డ్ కార్డ్ జారీ చేసి, దాని ద్వారా 5 ట్రిలియన్ డాలర్లు సమీకరించవచ్చని" ట్రంప్ ఆశిస్తున్నట్టు సమాచారం. అయితే ఇదంతా కేవలం ఊహాతీతమేనా? లేక నిజంగానే అమలులోకి వచ్చే అవకాశం ఉందా?

- గోల్డ్ కార్డు అంటే ఏమిటి?

ఈ గోల్డ్ కార్డు పథకం ద్వారా విదేశీ ధనవంతులు అమెరికాలో దీర్ఘకాలిక నివాసం పొందే అవకాశం కలుగుతుంది. అయితే మొదటగా ట్రంప్ చెప్పినట్లుగా గోల్డ్ కార్డు ద్వారా వెంటనే పౌరసత్వం రాదని ఇప్పుడు అధికారికంగా వెల్లడించారు. వీసా పరంగా, వ్యాపార అవకాశాల పరంగా కొన్ని సౌకర్యాలుంటాయి కానీ అమెరికన్ పౌరుడిగా మారే మార్గం మాత్రం ఇప్పటికీ సుదీర్ఘమైనదే.

- లక్ష్యం అప్పు తగ్గించడమా, ప్రచారోద్దేశమా?

అమెరికాకు 36 ట్రిలియన్ డాలర్ల అప్పు ఉండగా గోల్డ్ కార్డు ద్వారా 1 ట్రిలియన్ డాలర్ పైగా సమీకరించవచ్చని నిపుణులు అంచనా వేస్తున్నారు. కానీ అది కూడా 5 సంవత్సరాల వ్యవధిలోనే సాధ్యమవుతుందని, వడ్డీల ప్రభావంతో ఆ మొత్తానికి గణనీయమైన మార్పు ఉండదని అభిప్రాయపడుతున్నారు. దాంతో గోల్డ్ కార్డ్ వల్ల అమెరికా అప్పు తగ్గింపు సాధ్యపడుతుందనే ట్రంప్ ఆశలు మరీ విస్తృతంగా ఫలించకపోవచ్చు.

- ప్రపంచ ధనవంతుల స్పందన ఎలా ఉంది?

ప్రఖ్యాత బిజినెస్ మ్యాగజైన్ ఫోర్బ్స్ నిర్వహించిన సర్వే ప్రకారం.., ప్రపంచంలోని అధిక శాతం ధనవంతులు గోల్డ్ కార్డ్ పై ఆసక్తి చూపించలేదని వెల్లడైంది. వారు అమెరికా పౌరసత్వం కన్నా పెట్టుబడుల కోసం ఇతర మార్గాలను చూస్తున్నారని తేలింది. పైగా అమెరికా గోల్డ్ కార్డ్ ద్వారా ప్రత్యేకమైన పన్ను మినహాయింపులు లేకపోవడం కూడా వారిని వెనక్కి నెడుతోంది.

-గోల్డెన్ వీసాలో పోటీ దేశాలు ఇవీ

ఈ దిశగా సౌదీ అరేబియా, యూఏఈ, స్పెయిన్ వంటి దేశాలు అందిస్తున్న గోల్డెన్ వీసాలు ఎక్కువ ఆకర్షణీయంగా ఉన్నాయి. తక్కువ పెట్టుబడితో దీర్ఘకాలిక నివాసం, పన్నుల్లో రాయితీలు, ఇతర దేశాలకు వీసా ఫ్రీ ప్రయాణ సదుపాయాలు అందిస్తుండటంతో అమెరికా గోల్డ్ కార్డ్ వీసాలకు పోటీగా నిలవడం కష్టమేనని నిపుణుల అభిప్రాయం.

స్పష్టతలేమి, అనిశ్చితి

గోల్డ్ కార్డు నిబంధనలు ఇంకా పూర్తిగా వెల్లడించని పరిస్థితి, పనిలో పనిగా మారుతున్న ప్రకటనలు కూడా ఈ పథకంపై అనుమానాలు పెంచుతున్నాయి. అమెరికాలోని యువతకు ఉద్యోగ అవకాశాలు పెరుగుతాయా? లేక విదేశీ ధనవంతులు అమెరికా మార్కెట్‌ను మాత్రమే ఉపయోగించుకుంటారా? అన్న ప్రశ్నలకు సమాధానాలు రావాల్సి ఉంది.

ట్రంప్ ప్రతిపాదించిన గోల్డ్ కార్డు ప్రాజెక్టు ఆకర్షణీయంగా కనిపించవచ్చు కానీ ఆచరణలో తక్కువ అవకాశాలు కనిపిస్తున్నాయి. అమెరికా అప్పు తగ్గించడంలో దీని పాత్ర ఎంతో తక్కువగా ఉండే అవకాశం ఉంది. పైగా పోటీ దేశాల గోల్డెన్ వీసాల కన్నా ఇది వెనుకబడే పరిస్థితి ఉంది. పూర్తి వివరాలు వెలుగులోకి వచ్చిన తర్వాతే ఈ పథకంపై ఖచ్చితమైన అభిప్రాయం వ్యక్తీకరించలేము. ప్రస్తుతానికి ఇది ప్రచార ప్రయోగంగా మిగిలే అవకాశమే ఎక్కువ.