హార్వార్డ్ కు షాకిచ్చిన ట్రంప్

అమెరికాలో ప్రఖ్యాత హార్వర్డ్‌ విశ్వవిద్యాలయంలో విదేశీ విద్యార్థుల సంఖ్యపై అమెరికా అధ్యక్షుడు డొనాల్డ్‌ ట్రంప్‌ చేసిన వ్యాఖ్యలు ప్రస్తుతం చర్చనీయాంశంగా మారాయి. విశ్వవిద్యాలయంలో మొత్తం 31 శాతం మంది విదేశీ విద్యార్థులు ఉన్నారని పేర్కొన్న ట్రంప్, వారి పేర్లు, దేశాల వివరాలను తమకు అందజేయాలని డిమాండ్ చేశారు. ఇటీవల హార్వర్డ్‌లో విదేశీ విద్యార్థులను చేర్చుకోవడానికి ఉన్న అనుమతిని రద్దు చేస్తూ ట్రంప్ తీసుకున్న నిర్ణయాన్ని ఫెడరల్ న్యాయమూర్తి అడ్డుకున్న నేపథ్యంలో ట్రంప్ తన నిర్ణయాన్ని సమర్థించుకుంటూ ఆదివారం ట్రూత్ సోషల్ లో ఈ పోస్టు చేశారు.

ట్రంప్ తన పోస్టులో "మొత్తం 31శాతం మంది విదేశీ విద్యార్థులున్నారనే విషయాన్ని హార్వర్డ్‌ ఎందుకు చెప్పడం లేదు. వారిలో అమెరికా వ్యతిరేక దేశాల నుంచి వచ్చిన వాళ్లూ ఉన్నారు. ఆయా దేశాలు వారి విద్యార్థుల చదువు కోసం ఎలాంటి సొమ్ము చెల్లించడం లేదు. ఆ విదేశీ విద్యార్థుల వివరాలు తెలుసుకోవాలనుకుంటున్నాం. హార్వర్డ్‌ యూనివర్సిటీకి మేము బిలియన్‌ డాలర్లు చెల్లించాం. వారి వివరాలు తెలుసుకోవాలనే మా అభ్యర్థన సరైనదే. మాకు ఆ విద్యార్థుల పేర్లు, దేశాల వివరాలు కావాలి. మీ దగ్గర రూ.442 కోట్లు ఉన్నాయిగా.. వాటినే ఉపయోగించుకోండి. డబ్బు కోసం ఫెడరల్‌ ప్రభుత్వానికి ఎలాంటి విజ్ఞప్తులు చేయకండి" అని పేర్కొన్నారు.

కాగా, ఇటీవల హార్వర్డ్‌ యూనివర్సిటీకి అందించే నిధుల్లో ట్రంప్ కోత విధించిన సంగతి తెలిసిందే. దీనికి తోడు, గురువారం విదేశీ విద్యార్థులను చేర్చుకోవడానికి ఉన్న అనుమతిని కూడా రద్దు చేశారు. ఈ చర్యను వ్యతిరేకిస్తూ హార్వర్డ్‌ యూనివర్సిటీ కోర్టులో పిటిషన్ దాఖలు చేసింది. ట్రంప్ చర్య అనైతికమని, నిబంధనలు ఉల్లంఘించడం అవుతుందని హార్వర్డ్‌ పేర్కొంది. "ఒక్క సంతకంతో యూనివర్సిటీలోని మొత్తం విద్యార్థుల్లో పావువంతు మందిని తొలగించేందుకు ప్రభుత్వం నిర్ణయం తీసుకుంది" అని వెల్లడించింది. దీనిపై విచారణ జరిపిన ఫెడరల్ కోర్టు న్యాయమూర్తి.. ట్రంప్ నిర్ణయాన్ని నిలుపుదల చేస్తూ ఆదేశాలు జారీ చేశారు.

ఈ పరిణామాల నేపథ్యంలో ట్రంప్ హార్వర్డ్‌లో విదేశీ విద్యార్థుల వివరాలను డిమాండ్ చేయడం రాజకీయ వర్గాల్లోనూ, విద్యా రంగంలోనూ చర్చకు దారి తీసింది. ఇది అమెరికా విద్యా విధానంపై, వలస విధానాలపై ఎలాంటి ప్రభావం చూపుతుందో వేచి చూడాలి.