విదేశీ కార్లు.. చైనా.. ట్రంప్ సంచలన నిర్ణయాలు

అమెరికా అధ్యక్షుడు డొనాల్డ్ ట్రంప్ మరోసారి తన వివాదాస్పద నిర్ణయాలతో వార్తల్లో నిలిచారు. ఆయన తాజాగా విదేశాల నుంచి దిగుమతి అయ్యే కార్లపై ఏకంగా 25 శాతం సుంకం విధిస్తున్నట్లు ప్రకటించారు. ఈ నిర్ణయం ఏప్రిల్ 2వ తేదీ నుంచి అమల్లోకి వస్తుందని ఆయన స్పష్టం చేశారు. వైట్‌హౌస్‌లో జరిగిన ఒక కార్యక్రమంలో ట్రంప్ ఈ విషయాన్ని అధికారికంగా వెల్లడించారు.

ట్రంప్ మాట్లాడుతూ "అమెరికాలో తయారవ్వని అన్ని కార్లపై 25 శాతం సుంకం విధిస్తున్నాం. ఇది శాశ్వతమైన చర్య. మా దేశంలో తయారయ్యే కార్లపై మాత్రం ఎలాంటి సుంకం ఉండదు. ఈ నిర్ణయం మా ఆర్థిక వ్యవస్థను మరింత బలోపేతం చేస్తుంది. గతంలో ఎన్నడూ చూడని వృద్ధిని ఇది కొనసాగిస్తుంది. ఏప్రిల్ 2 నుంచి ఈ కొత్త సుంకాలు అమలులోకి వస్తాయి" అని అన్నారు.

ట్రంప్ ఈ ప్రకటన అమెరికా వాహన తయారీ పరిశ్రమకు ఊతమిస్తుందని భావిస్తున్నారు. దేశీయంగా కార్ల ఉత్పత్తి పెరిగి, తద్వారా ఉద్యోగాలు కూడా పెరుగుతాయని ఆయన ఆశాభావం వ్యక్తం చేశారు. అయితే ఈ నిర్ణయం వల్ల విదేశీ కార్ల ధరలు అమెరికాలో గణనీయంగా పెరిగే అవకాశం ఉంది. ఇది వినియోగదారులపై ప్రత్యక్ష ప్రభావం చూపుతుంది. ముఖ్యంగా యూరప్, జపాన్, దక్షిణ కొరియా వంటి దేశాల నుంచి దిగుమతి అయ్యే కార్ల ధరలు భారీగా పెరగవచ్చు.

ట్రంప్ తీసుకున్న ఈ నిర్ణయం అంతర్జాతీయ వాణిజ్య సంబంధాలపై కూడా ప్రభావం చూపే అవకాశం ఉంది. ఇతర దేశాలు కూడా అమెరికా ఉత్పత్తులపై ప్రతిగా సుంకాలు విధించే అవకాశం లేకపోలేదు. ఇది ప్రపంచ వాణిజ్య యుద్ధానికి దారితీసే ప్రమాదం కూడా ఉంది. గతంలో కూడా ట్రంప్ అనేక దేశాల దిగుమతులపై ఇలాంటి ఆంక్షలు విధించిన సంగతి తెలిసిందే.

- చైనాకు ఓ ఆఫర్ ఇచ్చిన ట్రంప్

మరోవైపు డొనాల్డ్ ట్రంప్ చైనాకు ఒక ఆసక్తికరమైన ఆఫర్ ఇచ్చారు. చైనా నుంచి దిగుమతి అయ్యే వస్తువులపై గతంలో విధించిన సుంకాలను తగ్గించే అవకాశం ఉందని ఆయన సంకేతాలు ఇచ్చారు. అయితే, దీనికి ఒక షరతు కూడా పెట్టారు. ప్రముఖ షార్ట్ వీడియో యాప్ టిక్‌టాక్‌ను అమెరికాకు విక్రయిస్తేనే ఈ సుంకాల తగ్గింపు సాధ్యమవుతుందని ఆయన స్పష్టం చేశారు. అంతేకాకుండా అవసరమైతే ఈ ఒప్పందం కోసం గడువును కూడా పెంచుతానని ఆయన హామీ ఇచ్చారు.

ట్రంప్ వైట్‌హౌస్‌లో విలేకరులతో మాట్లాడుతూ ఈ వ్యాఖ్యలు చేశారు. ఇటీవల అమెరికా ప్రభుత్వం టిక్‌టాక్‌ను నిషేధిస్తున్నట్లు ప్రకటించిన విషయం తెలిసిందే. అమెరికా నిబంధనలకు అనుగుణంగా వ్యవహరించడం లేదని ఆరోపిస్తూ జనవరి 18న గూగుల్ , యాపిల్ తమ ప్లే స్టోర్ల నుంచి ఈ యాప్‌ను తొలగించాయి. అయితే అధ్యక్షుడు ట్రంప్ ఈ నిషేధాన్ని అమలు చేయడంలో కొంత జాప్యం చేయడంతో టిక్‌టాక్ మళ్లీ అమెరికాలోని యాప్ స్టోర్లలో కనిపించింది.

అమెరికాలో టిక్‌టాక్‌కు దాదాపు 170 మిలియన్ల మంది వినియోగదారులు ఉన్నారు. ఈ యాప్‌ను కొనుగోలు చేయడానికి అనేక కంపెనీలు ఆసక్తి చూపుతున్నాయి. తొలుత ప్రపంచ కుబేరుడు ఎలాన్‌మస్క్ కూడా టిక్‌టాక్‌ను కొనుగోలు చేస్తారని వార్తలు వచ్చాయి, కానీ ఆయన దానిని ఖండించారు.

ఇటీవల ట్రంప్ అమెరికా ట్రెజరీ - వాణిజ్య విభాగాలను ఒక 'సావరిన్ వెల్త్ ఫండ్'ను సృష్టించాలని ఆదేశిస్తూ ఒక కార్యనిర్వాహక ఉత్తర్వుపై సంతకం చేశారు. ఈ సావరిన్ వెల్త్ ఫండ్ ద్వారా టిక్‌టాక్‌ను కొనుగోలు చేసే అవకాశం ఉందని ఆయన అభిప్రాయపడ్డారు.

మొత్తానికి డొనాల్డ్ ట్రంప్ తీసుకున్న ఈ రెండు కీలక నిర్ణయాలు - విదేశీ కార్లపై భారీ సుంకం , చైనాకు టిక్‌టాక్‌ ఆఫర్ రాబోయే రోజుల్లో అమెరికా ఆర్థిక వ్యవస్థ అంతర్జాతీయ సంబంధాలపై ఎలాంటి ప్రభావం చూపుతాయో వేచి చూడాలి. ఈ నిర్ణయాలు అమెరికాలో వినియోగదారులను, వాహన తయారీదారులను చైనా వంటి ఇతర దేశాలతో అమెరికా యొక్క వాణిజ్య సంబంధాలను ఎలా ప్రభావితం చేస్తాయో చూడాల్సిందే.