"బర్త్‌రైట్ సిటిజన్‌షిప్ బానిసల పిల్లల కోసమే" .. ట్రంప్ సంచలన వ్యాఖ్యలు

అమెరికాలో అత్యంత ప్రతిష్టాత్మకమైన వివాదాస్పదమైన జన్మతః పౌరసత్వం అంశంపై జరుగుతున్న తాజా పరిణామాలు కేవలం ఆ దేశ అంతర్గత వ్యవహారాలు మాత్రమే కావు.. అవి ప్రజాస్వామ్య విలువలపై రాజ్యాంగ మూలస్తంభాలపై జరుగుతున్న దాడికి సంకేతాలు. ముఖ్యంగా అమెరికా అధ్యక్షుడు డొనాల్డ్ ట్రంప్ ఈ హక్కును కేవలం "బానిసల పిల్లల కోసం" మాత్రమే ఉద్దేశించినదని వ్యాఖ్యానించడం.. ఆధునిక అమెరికా నిర్మాణాన్ని సవాలు చేయడమే.

ట్రంప్‌ తన సోషల్‌ మీడియా వేదిక “ట్రూత్‌”లో చేసిన పోస్టులో “ఈ చట్టం చైనా వంటి దేశాల నుంచి వచ్చే ధనవంతులు తమ పిల్లలకు అమెరికా పౌరసత్వం పొందేందుకు ఉపయోగించుకునేలా రూపొందించలేదు. ఇది కేవలం బానిసల పిల్లలకు గౌరవప్రదమైన స్థానం కల్పించేందుకు మాత్రమే తీసుకువచ్చిన చట్టం” అని వ్యాఖ్యానించారు. ఆయన మాటల్లో అమెరికా న్యాయవ్యవస్థపై కూడా అసంతృప్తి స్పష్టంగా కనిపించింది. ముఖ్యంగా ఇటీవల టారిఫ్‌లకు సంబంధించిన తీర్పులను ఉద్దేశిస్తూ “మన న్యాయవ్యవస్థ బలహీనంగా మారింది. ఇలాంటి పరిస్థితుల్లో దేశాన్ని గొప్పగా తీర్చిదిద్దడం అసాధ్యం” అని విమర్శించారు.

జన్మతః పౌరసత్వానికి చారిత్రక నేపథ్యం ఉంది. 1865లో అమెరికా అంతర్యుద్ధం ముగిసిన తర్వాత బానిసత్వ నిర్మూలనకు భాగంగా ఈ విధానాన్ని ప్రవేశపెట్టారు. తరువాత అమెరికా రాజ్యాంగం ద్వారా దీనికి రాజ్యాంగ పరిరక్షణ లభించింది. ఈ సవరణ ప్రకారం అమెరికాలో జన్మించిన ప్రతి వ్యక్తి వారి తల్లిదండ్రుల వలస స్థితి ఏదైనా సరే స్వయంగా అమెరికా పౌరుడిగా గుర్తింపు పొందుతారు.

అమెరికా సంయుక్త రాష్ట్రాల రాజ్యాంగంలోని 14వ సవరణ ఆ దేశ ప్రజాస్వామ్యానికి వెన్నెముక వంటిది. 1865లో అంతర్యుద్ధం ముగిసిన తర్వాత జాతి వివక్షను రూపుమాపి.. నల్లజాతీయులకు.. మాజీ బానిసలకు ఆత్మగౌరవంతో కూడిన పౌరసత్వాన్ని కల్పించేందుకు దీనిని రూపొందించారు. అయితే ఒక శతాబ్దంపైగా అమల్లో ఉన్న ఈ చట్టం ఇప్పుడు రాజకీయ చదరంగంలో పావుగా మారడం దురదృష్టకరం.

ట్రంప్ వాదనలోని లోపాలు

ట్రంప్ తన తాజా వ్యాఖ్యల్లో ఈ చట్టాన్ని కేవలం ఒక చారిత్రక అవసరానికి మాత్రమే పరిమితం చేయాలని చూడటం రాజ్యాంగ స్ఫూర్తిని తక్కువ చేయడమే. "చైనా వంటి దేశాల నుంచి వచ్చే ధనవంతులు దీనిని దుర్వినియోగం చేస్తున్నారు" అన్న ఆయన వాదనలో కొంత మేర 'బర్త్ టూరిజం'పై ఆందోళన ఉండవచ్చు, కానీ దాన్ని నెపంగా చూపి మొత్తం వ్యవస్థనే రద్దు చేయాలనుకోవడం ప్రమాదకరం. రాజ్యాంగం అనేది మారుతున్న కాలానికి అనుగుణంగా అందరికీ సమాన హక్కులను కల్పించే ఒక సజీవ పత్రం తప్ప, కేవలం గతకాలపు అవసరాలకు పరిమితమైన పత్రం కాదు.

న్యాయవ్యవస్థపై ఒత్తిడి

ట్రంప్ తన పోస్ట్‌లో న్యాయవ్యవస్థను "బలహీనమైనది" అని అభివర్ణించడం గమనార్హం. తన రాజకీయ అజెండాకు అనుగుణంగా తీర్పులు రానప్పుడు కోర్టులను తప్పుబట్టడం ప్రజాస్వామ్య వ్యవస్థలకు క్షేమకరం కాదు. ఏప్రిల్ 1న సుప్రీంకోర్టు చేపట్టబోయే విచారణ ఇప్పుడు అత్యంత కీలకంగా మారింది. న్యాయస్థానం ఇచ్చే తీర్పు అమెరికాను "వలసదారుల స్వర్గధామం"గా ఉంచుతుందా లేదా "సంకుచిత జాతీయవాదం" వైపు మళ్లిస్తుందా అనేది తేలిపోనుంది.

రాజకీయ లబ్ధి వర్సెస్ మానవ హక్కులు

ఎన్నికల వేళ వలసల అంశాన్ని రగిల్చి తన ఓటు బ్యాంకును పదిలపరుచుకోవాలనేది ట్రంప్ ఎత్తుగడగా కనిపిస్తోంది. అయితే ఈ ప్రక్రియలో లక్షలాది మంది వలసదారుల పిల్లల భవిష్యత్తును పణంగా పెట్టడం మానవ హక్కుల ఉల్లంఘనే అవుతుంది. 'అమెరికన్ డ్రీమ్'ను నమ్మి అక్కడికి వెళ్లే ప్రతి ఒక్కరి హక్కులను కాపాడాల్సిన బాధ్యత ఆ దేశ రాజ్యాంగంపై ఉంది.

జన్మతః పౌరసత్వం అనేది అమెరికా ఉదారవాదానికి చిహ్నం. రాజ్యాంగ సవరణల ద్వారా సంక్రమించిన ఈ హక్కును ఒక కార్యనిర్వాహక ఉత్తర్వుతో లేదా రాజకీయ ప్రసంగాలతో మార్చలేరు. సుప్రీంకోర్టు తన తీర్పులో రాజ్యాంగబద్ధతను, సమన్యాయాన్ని కాపాడుతుందని ఆశిద్దాం. పౌరసత్వం అనేది కేవలం పుట్టుకకు సంబంధించినది మాత్రమే కాదు, అది ఒక దేశం తన ప్రజలకు ఇచ్చే భరోసా. ఆ భరోసాను రాజకీయ స్వార్థం కోసం చెరిపివేయడం అగ్రరాజ్యానికే తగదు.