భారతీయులపై ట్రంప్ అనుకూల వర్గాల విషప్రచారం.. అమెరికాలో జాత్యహంకార పోకడలతో టెక్కీల గుండెల్లో రైళ్లు!

ఒకవైపు భారతీయ నిపుణులు అమెరికా అభివృద్ధిలో కీలక పాత్ర పోషిస్తుంటే, మరోవైపు మాజీ అధ్యక్షుడు ట్రంప్ జాత్యహంకార వ్యాఖ్యలను సమర్థించడం దురదృష్టకరం. ‘నరక కూపాలు’, ‘లాప్‌టాప్ గ్యాంగ్‌స్టర్స్’ వంటి పదజాలం భారతీయుల ఆత్మగౌరవాన్ని దెబ్బతీసేలా ఉంది.

అమెరికా అధ్యక్ష ఎన్నికలు సమీపిస్తున్న కొద్దీ, వలస దారులు, విదేశీ నిపుణులపై దాడులు తీవ్రం అవుతున్నాయి. ప్రముఖ అమెరికన్ రేడియో హోస్ట్ మైఖేల్ సావేజ్, భారత్, చైనాను ఉద్దేశించి చేసిన అత్యంత అసహ్యకరమైన వ్యాఖ్యలను డొనాల్డ్ ట్రంప్ తన ‘ట్రూత్ సోషల్’ ఖాతాలో రీపోస్ట్ చేయడం ఇప్పుడు అంతర్జాతీయ స్థాయిలో దుమారం రేపుతోంది. దశాబ్దాలుగా అమెరికాను నిర్మించడంలో తోడ్పడుతున్న భారతీయ సమాజంపై ఇలాంటి ‘జాత్యాహంకార’ ముద్ర వేయడం అగ్రరాజ్య విజ్ఞతకే ప్రశ్నార్థకంగా మారింది.

ఏమిటి ఆ వివాదాస్పద వ్యాఖ్యలు?

మైఖేల్ సావేజ్ తన ప్రసంగంలో భారతీయులను, చైనీయులను లక్ష్యంగా చేసుకొని దారుణమైన వ్యాఖ్యలు చేశారు. భారత్, చైనా దేశాలను ఆయన ‘నరక కూపాలు’ అంటూ అభివర్ణించారు. అక్కడి ప్రజలు ఎలాగైనా అమెరికాలో అడుగుపెట్టాలని చూస్తున్నారని ఎద్దేవా చేశారు. మన దేశానికి గర్వకారణమైన ఐటీ నిపుణులను ఆయన ‘గ్యాంగ్‌స్టర్స్ ఆఫ్ లాప్‌టాప్స్’ అని సంబోధించారు. అంటే భారతీయులు అమెరికన్ల ఉద్యోగాలను ‘దోచుకుంటున్నారని’ ఆయన పరోక్షంగా ఆరోపించారు. పౌరసత్వం కోసం భారతీయ మహిళలు గర్భం దాల్చిన తొమ్మిదో నెలలో అమెరికాకు వస్తారని, అందుకే ‘బర్త్ రైట్ సిటిజన్‌షిప్’ చట్టాన్ని రద్దు చేయాలని ఆయన డిమాండ్ చేశారు.

భారతీయుల్లో ఆందోళన

ఈ వ్యాఖ్యలను ట్రంప్ రీపోస్ట్ చేయడం వెనుక పక్కా రాజకీయ వ్యూహం కనిపిస్తోంది. అమెరికాలోని స్థానిక శ్వేతజాతీయుల ఓట్లను ఆకర్షించడానికి ట్రంప్ మళ్లీ ‘అమెరికా ఫస్ట్’ అనే నినాదాన్ని తీవ్రతరం చేస్తున్నారు. గతంలో మోదీతో స్నేహం నటించిన ట్రంప్, ఇప్పుడు భారతీయులను కించపరిచే పోస్టులను షేర్ చేయడం ఆయన ద్వంద్వ వైఖరికి నిదర్శనం. ఇది అమెరికాలో ఉంటున్న సుమారు 45 లక్షల మంది భారత సంతతి ప్రజల్లో అభద్రతా భావాన్ని పెంచుతోంది.

భారతీయ నిపుణులపై మైఖేల్ సావేజ్, ట్రంప్ వంటి వారు చేసే జాత్యాహంకార ఆరోపణలకు, వాస్తవ గణాంకాలకు మధ్య చాలా వ్యత్యాసం ఉంది. వారు భారతీయ ఐటీ నిపుణులను ‘లాప్‌టాప్ గ్యాంగ్‌స్టర్స్’ అని, అమెరికన్ల ఉద్యోగాలను దోచుకుంటున్నారని ఆరోపిస్తున్నప్పటికీ, వాస్తవానికి అమెరికాలో అత్యధిక పన్నులు చెల్లిస్తూ ఆ దేశ ఆర్థిక వ్యవస్థకు వెన్నుముకగా నిలుస్తున్న వర్గం భారతీయులే. వృత్తి నైపుణ్యం విషయంలో వారిని కించపరిచేలా మాట్లాడినప్పటికీ, గూగుల్, మైక్రోసాఫ్ట్ వంటి ప్రపంచ ప్రఖ్యాత టెక్ దిగ్గజ సంస్థలకు భారతీయులే సీఈఓలుగా ఉండి అగ్రరాజ్యాన్ని నడిపిస్తున్నారు. అలాగే, భారత్ వంటి దేశాలను ‘నరక కూపాలు’గా వర్ణించడం పూర్తిగా అవాస్తవం.. ఎందుకంటే భారత్ నేడు ప్రపంచంలోనే అత్యంత వేగంగా ఎదుగుతున్న నాలుగో అతిపెద్ద ఆర్థిక వ్యవస్థగా అవతరించింది. ఈ గణాంకాలు భారతీయ నిపుణుల మేధస్సుకు, కష్టానికి నిదర్శనంగా నిలుస్తున్నాయి.

ఒకవైపు భారత్-అమెరికా వ్యూహాత్మక భాగస్వాములుగా చెప్పుకుంటున్న తరుణంలో, అమెరికా మాజీ అధ్యక్షుడు, ప్రస్తుత అధ్యక్ష అభ్యర్థి ఇలాంటి విద్వేషపూరిత వ్యాఖ్యలను ప్రోత్సహించడం గమనార్హం. ఇది కేవలం మాటలకే పరిమితం కాకుండా, క్షేత్రస్థాయిలో భారతీయులపై భౌతిక దాడులకు దారి తీసే ప్రమాదం ఉంది. 40 శాతం మంది భారతీయులు అమెరికాను వీడాలని అనుకుంటున్నారన్న సర్వే నిజమేనని ఇలాంటి ఘటనలు నిరూపిస్తున్నాయి