'మామిడి' మోసం.. తీపి పండు వెనుక చేదు నిజం బయటపడింది... అప్రమత్తంగా ఉండండి!

వేసవి కాలం వచ్చిందంటే చాలు.. భానుడి భగభగలతో పాటు మన నోరూరించే ‘పండ్ల రాజు’ మామిడి గుర్తుకు వస్తుంది. గల్లీ నుంచి ఢిల్లీ వరకు వయసుతో సంబంధం లేకుండా ప్రతి ఒక్కరూ ఆరాధించే పండు ఇది. చిన్నప్పుడు వేసవి సెలవుల్లో చెట్ల కింద కూర్చుని తిన్న ఆ సహజమైన మామిడి రుచి ఇప్పటికీ ఒక మధుర జ్ఞాపకం. అయితే దురదృష్టవశాత్తూ కాలక్రమేణా ఆ తీపి జ్ఞాపకాల స్థానంలో ఇప్పుడు ‘కల్తీ భయం’ వచ్చి చేరింది. లాభార్జనే ధ్యేయంగా పెట్టుకున్న కొందరు వ్యాపారులు మన ఆరోగ్యాన్ని ఫణంగా పెడుతున్నారు.

పుణే ఘటన.. వెలుగులోకి వచ్చిన విస్తుపోయే నిజాలు

ఇటీవల మహారాష్ట్రలోని పుణేలో బయటపడిన భారీ కల్తీ మామిడి గుజ్జు ఉదంతం దేశవ్యాప్తంగా కలకలం రేపింది. ఆహార భద్రతా అధికారులు నిర్వహించిన దాడుల్లో సుమారు 3,800 కిలోల కల్తీ మామిడి గుజ్జును స్వాధీనం చేసుకున్నారు. ఇందులో దిగ్భ్రాంతి కలిగించే విషయం ఏమిటంటే, ఆ గుజ్జులో సహజత్వం మచ్చుకైనా లేదు. కేవలం పరిమాణం పెంచడానికి, ఆకర్షణీయమైన రంగు కోసం అనుమతి లేని కృత్రిమ రంగులు, ప్రమాదకర రసాయనాలను కలిపారు. ఈ కల్తీ గుజ్జు కేవలం మార్కెట్‌కే పరిమితం కాలేదు. ఇది పెద్ద ఎత్తున ఐస్‌క్రీమ్ తయారీ యూనిట్లు.. ప్రముఖ జ్యూస్ సెంటర్లు.. స్వీట్ షాపులు.. బేకరీలకు సరఫరా అవుతున్నట్లు విచారణలో తేలింది. అంటే మనం బయట ఎంతో ఇష్టంగా తాగే మామిడి షేక్ లేదా తినే మామిడి స్వీట్లలో నిజమైన మామిడి పండు ఉందో లేదో తెలియని దారుణమైన పరిస్థితి నెలకొంది.

తెలుగు రాష్ట్రాల్లోనూ పొంచి ఉన్న ముప్పు

ఈ కల్తీ ప్రభావం కేవలం మహారాష్ట్రకే పరిమితం కాలేదు.. తెలుగు రాష్ట్రాల్లోనూ వేసవి సీజన్‌లో జ్యూస్ సెంటర్లు, మ్యాంగో షేక్ బండ్లు కిటకిటలాడుతుంటాయి. కానీ ఆ జ్యూసుల్లో వాడే గుజ్జు ఎక్కడి నుంచి వస్తోంది? అది సహజంగా పండిన పండ్ల నుంచి తీసిందా లేక రసాయనాల మిశ్రమమా? అన్నది ఇప్పుడు ప్రతి వినియోగదారుడిని వేధిస్తున్న ప్రశ్న.

కేవలం గుజ్జు మాత్రమే కాదు.. నేరుగా మార్కెట్లో విక్రయించే పండ్లు కూడా ఇప్పుడు నమ్మదగ్గ స్థితిలో లేవు. కార్బైడ్ వంటి ప్రమాదకర రసాయనాలను ఉపయోగించి పండ్లను బలవంతంగా పండిస్తున్నారు. బయటికి పసుపు రంగులో మెరిసిపోతూ ఆకర్షణీయంగా కనిపించినా, లోపల మాత్రం పండు పచ్చిగా ఉండటం మనం గమనిస్తూనే ఉంటాం. ఇలాంటి పండ్లు తినడం వల్ల తీవ్రమైన జీర్ణ సంబంధిత సమస్యలు.. చర్మ అలర్జీలు.. దీర్ఘకాలంలో క్యాన్సర్ వంటి ప్రాణాంతక వ్యాధులు వచ్చే అవకాశం ఉందని వైద్యులు హెచ్చరిస్తున్నారు.

వ్యాపారుల మాయాజాలం.. రంగు, రుచి అన్నీ కృత్రిమమే!

అక్రమ వ్యాపారులు కేవలం రంగులతోనే ఆగడం లేదు. మామిడి గుజ్జు పరిమాణాన్ని పెంచడానికి చక్కెర పాకం విపరీతంగా కలుపుతున్నారు. దీనికి తోడుగా మామిడి వాసన వచ్చేలా సింథటిక్ ఫ్లేవర్లను జోడిస్తున్నారు. ఇది చూడటానికి వాసనకు అసలు మామిడిలాగే అనిపించినా, అందులో పోషకాలు శూన్యం, పైగా హానికరమైన వ్యర్థాలు అధికం. ఫుడ్ సేఫ్టీ అధికారులు అప్పుడప్పుడూ దాడులు చేస్తున్నప్పటికీ ఈ నెట్‌వర్క్ చాలా లోతుగా విస్తరించి ఉండటం ఆందోళన కలిగిస్తోంది.

వినియోగదారులు తీసుకోవాల్సిన జాగ్రత్తలు

ఈ కల్తీల కాలంలో మనల్ని మనం కాపాడుకోవడానికి అప్రమత్తతే ఏకైక మార్గం. మీరు పండ్లు లేదా మామిడి ఉత్పత్తులు కొనేటప్పుడు ఈ క్రింది విషయాలను గుర్తుంచుకోండి. సహజంగా పండిన మామిడి పండుపై అక్కడక్కడా చిన్న మచ్చలు ఉంటాయి. అది మరీ మెరిసిపోతూ ఉండదు. ముఖ్యంగా దాని నుంచి వచ్చే సహజమైన సువాసనను గమనించండి.పండు మొత్తం ఒకే రకమైన పసుపు రంగులో ఉంటే అది రసాయనాలతో పండించినది అయ్యే అవకాశం ఉంది. సహజ పండ్లలో రంగు అక్కడక్కడా మారుతూ ఉంటుంది. రోడ్ల పక్కన దొరికే మామిడి షేక్స్ కంటే, ఇంట్లోనే పండ్లు తెచ్చుకుని శుభ్రంగా కడిగి జ్యూస్ చేసుకోవడం ఉత్తమం. ఒకవేళ బయట తాగాల్సి వస్తే మీ కళ్ల ముందే పండును కోసి జ్యూస్ చేస్తున్నారో లేదో గమనించండి. స్థానిక రైతుల వద్ద లేదా నమ్మకమైన ఆర్గానిక్ స్టోర్లలో పండ్లను కొనుగోలు చేయడానికి ప్రాధాన్యత ఇవ్వండి.

ఆరోగ్యం కంటే మించిన సంపద లేదు. ‘పండ్ల రాజు’ అందించే తీపిని ఆస్వాదించే క్రమంలో కల్తీ రసాయనాల భారిన పడకుండా జాగ్రత్త వహించండి. చిన్నపాటి అప్రమత్తత మీ కుటుంబాన్ని పెద్ద ఆరోగ్య సమస్యల నుంచి కాపాడుతుంది.