‘కరూర్’ కేసులో విజయ్ పేరు లేకపోవడం వెనుక ఆంతర్యం ఏంటి..?

సెప్టెంబర్ 27, 2025న తమిళనాడు రాజకీయాల్లో ఈ తేదీ అత్యంత దుర్ధినంను చూపుతోంది. ఆ రోజు 41 మంది ప్రాణాలు కోల్పోగా.. వందకు పైగా మంది తీవ్రగాయాలపాలయ్యారు. అందులో కొందరు శాశ్వత అనారోగ్యం పాలయ్యారు. తమిళనాడు కరూర్‌లో థలపతి విజయ్ నేతృత్వంలోని తమిళగ వెట్రి కళగం (టీవీకే) పార్టీ మొదటి పబ్లిక్ రోడ్‌షో సందర్భంగా జరిగిన తొక్కిసలాట దారుణం. మరణించిన, గాయపడిన వారిలో ఎక్కువ మంది మహిళలు, పిల్లలు. ఈ ఘటన తమిళనాడు రాజకీయాల్లో తుఫాను సృష్టించింది. దీనిపై ఆ రాష్ట్ర ముఖ్యమంత్రి ఎంకే స్టాలిన్ అసెంబ్లీలో ‘విజయ్ ఆలస్యంగా రావడం, భారీ జన సమీకరణతో ఈ దుర్ఘటన జరిగింది’ అని అన్నారు. పోలీసులు సీరియస్ గా కేసును దర్యాప్తు చేస్తున్నారని చెప్పారు. పోలీసులు దర్యాప్తు చేస్తుండగా.. తనపై కుట్ర జరుగుతోందని విజయ్ సుప్రీం కోర్టును ఆశ్రయించాడు. దీంతో సుప్రీం సీబీఐ విచారణకు ఆదేశించింది.

సుప్రీం ఆదేశాలతో రంగంలోకి సీబీఐ

సుప్రీం కోర్టు ఆదేశాల మేరకు సీబీఐ విచారణ ప్రారంభించడంతో, ప్రాథమిక ఎఫ్‌ఐఆర్‌లో విజయ్ పేరు లేకపోవడం చర్చనీయాంశమైంది. తమిళనాడు పోలీసులు నమోదు చేసిన కేసుల్లో కూడా అతని పేరు లేదు. ఈ పరిణామం రాజకీయ కుట్రలు, న్యాయ వ్యవస్థ మధ్య సంక్షోభాన్ని రేకెత్తిస్తోంది. విజయ్ పేరు మిస్సింగ్‌ కావడం బీజేపీ చేసిన పనేనని కొందరు ఆరోపిస్తున్నారు. ఆయనను రక్షించేందుకు కేంద్ర ప్రభుత్వం కుట్ర పన్నుతుందని డీఎంకే నేతలు విమర్శలు కురిపిస్తున్నారు. ఇది తమిళనాడు రాజకీయాల్లో కొత్త చర్చలకు దారితీస్తోంది.

దారుణమైన ఘటన..

కరూర్ ఘటన దారుణమైనది. విజయ్ టీవీకే పార్టీ పతాకాలతో మొదటి పబ్లిక్ రోడ్‌షో నిర్వహించిన సమయంలో అధిక రద్దీ, పోలీస్ బందోబస్తు మధ్య లోపాల వల్ల తొక్కిసలాట జరిగింది. సుప్రీంకోర్టు ‘పాలిటికల్ అండర్‌టోన్’ ఉందని గుర్తించి, సీబీఐకి కేసు అప్పగించింది. సీబీఐ ప్రాథమిక ఎఫ్‌ఐఆర్‌లో టీవీకే జనరల్ సెక్రటరీ బస్సీ ఆనంద్, మరో ముగ్గురు ఫంక్షనరీలను మాత్రమే నేమ్ చేసింది. విజయ్ పేరు లేకపోవడం, అతను సుప్రీం కోర్టు వెళ్లి విచారణ తెచ్చుకున్నప్పటికీ, ఇప్పుడు బీజేపీ ఆయనను రక్షిస్తుందని ఆరోపణలకు దారితీసింది. నామ్ తమిళర్ కచ్చి (NTK) నేత సీమాన్, ‘విజయ్ పేరు ఎందుకు లేదు? ఇది రాజకీయ కుట్ర’ అని ప్రశ్నించారు. డీఎంకే పక్షం కూడా, ‘విజయ్ బీజేపీతో దగ్గరి సంబంధాలు పెట్టుకొని సీబీఐని ఉపయోగిస్తున్నాడు’ అని ఆరోపిస్తోంది. సీఎం స్టాలిన్ అసెంబ్లీలో విజయ్‌ను నేరారోపితుడిగా చూపించినా.. ఎఫ్ఐఆర్ లో పేరు లేకపోవడం ప్రభుత్వం రాజకీయ వ్యూహాన్ని సూచిస్తుందని పలువురు విమర్శలు గుప్పిస్తున్నారు.

బాధితులకు విజయ్ అండ..

విజయ్ ప్రతిస్పందన ఆసక్తికరంగా ఉంది. ప్రభుత్వాలు తనను నిందితుడిగా మార్చే కుట్రలు చేస్తున్నాయన్నాడు. మృతుల కుటుంబాలకు రూ.20 లక్షల చొప్పున పరిహారం పంపి, ‘భవిష్యత్తులో అండగా ఉంటాము’ అని చెప్పాడు. ‘విజయ్ సినిమాల నుంచి రాజకీయాల్లోకి వచ్చి, బీజేపీతో కుమ్మకై కేంద్ర దర్యాప్తు సంస్థలను ఉపయోగిస్తున్నాడు’ అని సీమాన్ వ్యాఖ్యానిస్తున్నారు. మద్రాస్ హైకోర్టు అక్టోబర్ 27కు కేసు విచారణ వేసింది. అయితే కొన్ని బాధిత కుటుంబాలు ‘సీబీఐ పిటిషన్‌లో మిస్‌లెడ్ చేశారు’ అని క్లెయిమ్ చేశాయి. ఇది విజయ్ పార్టీ ప్రచార వ్యూహాన్ని ప్రశ్నార్థకం చేస్తోంది.

మరింత స్వతంత్రంగా జరగాలి..

ఈ కేసు విషయంలో సీబీఐ విచారణ మరింత స్వతంత్రంగా జరగాలి. మద్రాస్ హైకోర్టు మానిటరింగ్ చేయాలి. విజయ్ పార్టీ ఈవెంట్లకు ముందు సెక్యూరిటీ ప్రొటోకాల్స్ అమలు చేయాలి. ప్రభుత్వం రాజకీయ కుట్రలు పక్కన పెట్టి బాధిత కుటుంబాలకు న్యాయం అందించాలి. కరూర్ కేసులో సీబీఐ ఎఫ్‌ఐఆర్‌లో విజయ్ పేరు మిస్సింగ్, రాజకీయ కుట్రలకు దారితీస్తోంది. విజయ్ రాజకీయ ప్రయాణం మొదటి దశలోనే ఈ దుర్ఘటన అతని నాయకత్వ లోపాన్ని సూచిస్తుంది.