రామచందర్ రావుకు తెలంగాణ బీజేపీ పగ్గాలు: అధికారికంగా ఖరారు

తెలంగాణ బీజేపీ అధ్యక్ష పదవికి తుది స్థాయిలో ఉత్కంఠకు తెరపడింది. రాష్ట్ర బీజేపీ అధ్యక్షుడిగా మాజీ ఎమ్మెల్సీ రామచందర్ రావును పార్టీ హైకమాండ్‌ నియమించనుంది. సోమవారం ఉదయం ఈ మేరకు అధికారికంగా సమాచారం అందింది. మధ్యాహ్నం 2 గంటలకు నాంపల్లిలోని బీజేపీ రాష్ట్ర కార్యాలయంలో ఆయన నామినేషన్ దాఖలు చేయనున్నారు. ఇప్పటివరకు ఈ పదవికి పలు కీలక నేతల పేర్లు పరిశీలనలో ఉన్నప్పటికీ, చివరకు రామచందర్ రావు పేరు ఖరారైంది. ఎంపీలు ఈటల రాజేందర్‌, ధర్మపురి అర్వింద్‌, మాజీ రాష్ట్ర అధ్యక్షుడు కె.లక్ష్మణ్‌లతోపాటు రామచందర్ రావు పేర్లు ప్రధానంగా వినిపించాయి. ఆరెస్సెస్ ఆశీర్వాదంతో పాటు, సీనియర్ నేతల మద్దతు రామచందర్ రావుకు కేటలైంది.

-ఈటల పోయి రాంచంద్రరావు ఎలా వచ్చారు?

గత కొద్ది రోజులుగా తెలంగాణ బీజేపీలో అధ్యక్ష పదవిపై తీవ్ర ఉత్కంఠ నెలకొంది. ఈటల రాజేందర్ పేరు ప్రముఖంగా వినిపించినప్పటికీ, పార్టీలోని సీనియర్ నాయకులు ఆయనకు అధ్యక్ష పదవి దక్కకుండా వ్యూహాత్మకంగా అడ్డుకున్నారని తెలుస్తోంది. వారి ప్రయత్నాలు ఫలించి, ఈటలకు చెక్ పడిందని, ఆయన ఆశలకు గండి కొట్టినట్లైందని రాజకీయ విశ్లేషకులు అభిప్రాయపడుతున్నారు. అధిష్టానం తీసుకున్న ఈ నిర్ణయం తెలంగాణ రాజకీయాల్లో కొత్త సమీకరణాలకు దారితీసే అవకాశం ఉంది. ముఖ్యంగా, చంద్రబాబు నాయుడు పరోక్ష ప్రభావం తెలంగాణ బీజేపీపై పడుతుందనే అంచనాలున్నాయి. రామచందర్ రావు నియామకం ద్వారా భవిష్యత్తులో తెలంగాణ బీజేపీలో తెలుగుదేశం సానుకూల ధోరణి పెరిగే అవకాశం ఉందని పలువురు వ్యాఖ్యానిస్తున్నారు.

ఇప్పటికే అధిష్టానం రామచందర్ రావును నామినేషన్ వేయాలని ఆదేశించినట్లు సమాచారం. ఈ పరిణామాలన్నీ చూస్తుంటే, తెలంగాణ బీజేపీలో ఒక కొత్త శకం ప్రారంభం కానుందని, రాబోయే రోజుల్లో రాష్ట్ర రాజకీయాల్లో బీజేపీ మరింత చురుకైన పాత్ర పోషించనుందని స్పష్టమవుతోంది. అయితే, ఈ నిర్ణయం పార్టీకి ఎంతవరకు లాభిస్తుంది, చంద్రబాబు ప్రభావం ఏ మేరకు ఉంటుంది అనేది కాలమే నిర్ణయించాలి.-పార్టీ బలోపేతమే లక్ష్యం

పార్టీని బలోపేతం చేయడం, కాంగ్రెస్ అధికారాన్ని సమర్థంగా ఎదుర్కోవడం, రానున్న స్థానిక సంస్థల ఎన్నికలకు పార్టీని సిద్ధం చేయడం వంటి అంశాలను పరిగణనలోకి తీసుకున్నట్లుగా సమాచారం. అందువల్లే పోటీ లేకుండా సమ్మతితో రామచందర్ రావు అభ్యర్థిత్వాన్ని ఖరారు చేసినట్టు తెలుస్తోంది.

-నామినేషన్ల ప్రక్రియ

బీజేపీ రాష్ట్ర కార్యాలయంలో సోమవారం మధ్యాహ్నం 2 గంటల నుంచి 4 గంటల వరకు నామినేషన్లను స్వీకరించనున్నారు. అదేరోజు సాయంత్రం 4 గంటల నుంచి 5 గంటల వరకు పరిశీలన, ఉపసంహరణ ప్రక్రియ ఉంటుంది. అధికారికంగా జూలై 1వ తేదీన బీజేపీ రాష్ట్ర అధ్యక్షుడి ఎన్నికను ప్రకటించనున్నారు. ఈ ఎన్నికలో రాష్ట్ర కౌన్సిల్‌కు చెందిన 119 మంది సభ్యులు, 38 జిల్లా అధ్యక్షులు, 17 మంది జాతీయ కౌన్సిల్ సభ్యులు పాల్గొననున్నారు. ఇటీవల రంగారెడ్డి జిల్లా మన్నెగూడ సమీపంలోని కన్వెన్షన్ సెంటర్‌లో జరిగిన సన్నాహక సమావేశంలో అభయ్ పాటిల్, చంద్రశేఖర్ తివారీ తదితరులు ఎన్నికల విధానం గురించి పార్టీ నేతలకు స్పష్టతనిచ్చారు.

- హైకమాండ్ దిశానిర్దేశం

తెలంగాణ బీజేపీలోని కీలక నేతలకు హైకమాండ్ నుంచి ప్రత్యేకంగా ఫోన్లు వెళ్లినట్టు సమాచారం. ఉదయం 11 గంటలకే అధికారిక సమాచారం ఇవ్వనున్నామని హైకమాండ్ ఇప్పటికే స్పష్టం చేసింది. దీంతో పలువురు నేతలు ఈ నిర్ణయం కోసం ఎదురుచూస్తున్నారు. ఈ నిర్ణయంతో తెలంగాణ బీజేపీకి కొత్త దిశ, ఉత్సాహం అందే అవకాశాలు కనిపిస్తున్నాయి. రామచందర్ రావు అనుభవంతో పార్టీ శ్రేణుల్లో నూతన జోష్ నెలకొనవచ్చని నాయకత్వం ఆశిస్తోంది.