సముద్రంలో మునిగిపోతున్న జపాన్ ఇంజనీరింగ్ అద్భుత విమానాశ్రయం

టెక్నాలజీలో అగ్రగామిగా నిలిచిన జపాన్ మరోసారి ప్రపంచాన్ని తన ఇంజినీరింగ్‌ అద్భుతంతో ఆశ్చర్యపరిచింది. ఒసాకా బే సముద్రంలో నిర్మించిన కాన్సాయ్‌ అంతర్జాతీయ విమానాశ్రయం (KIX) ప్రపంచంలోనే అత్యంత వినూత్నమైన విమానాశ్రయాలలో ఒకటిగా నిలిచింది. 1994లో ప్రారంభమైన ఈ విమానాశ్రయం రెండు మానవ నిర్మిత ద్వీపాలపై ఉంది. ఒసాకా అంతర్జాతీయ విమానాశ్రయంలోని రద్దీని తగ్గించడమే దీని ప్రధాన ఉద్దేశం. 2024 నాటికి 30.6 మిలియన్ల ప్రయాణికులతో 25 దేశాల్లోని 91 నగరాలను కలుపుతూ జపాన్ మూడవ అత్యంత రద్దీ గల విమానాశ్రయంగా రికార్డు సాధించింది.

తీవ్రమైన సవాలు.. ఊహించని మునిగే వేగం

కాన్సాయ్ విమానాశ్రయం ఒక తీవ్రమైన సమస్యను ఎదుర్కొంటోంది. నిర్మాణం ప్రారంభించిన 1987 నుంచే ఇది ఊహించిన దానికంటే వేగంగా మునుగుతోంది. 1994లో ఇది ఏటా 50 సెం.మీ. మునిగిపోగా, 2024 నాటికి ఇది సగటున 6 సెం.మీ.కి తగ్గింది. కానీ ఇప్పటివరకు మొత్తం 13.66 మీటర్లు మునిగిపోయింది. 2056 నాటికి ఈ విమానాశ్రయం భాగాలు సముద్ర మట్టానికి దిగువన ఉండవచ్చన్న ఆందోళనలు వ్యక్తమవుతున్నాయి. ఈ మునిగే సమస్యను ఎదుర్కొనేందుకు 150 మిలియన్‌ డాలర్లతో సముద్ర గోడలు ఎత్తు పెంచారు. జాక్‌-అప్‌ సిస్టమ్‌, ఇసుక కాలువలు, టెట్రాపోడ్‌ల వంటి పలు పద్ధతులు వినియోగించినప్పటికీ ఆశించిన ఫలితాలు లభించలేదు.

భవిష్యత్తు సవాళ్లు.. టెక్నాలజీకి పరీక్ష

సముద్ర మట్టం పెరుగుదల, వాతావరణ మార్పులు కాన్సాయ్ విమానాశ్రయం భవిష్యత్తుపై కొత్త ప్రశ్నలు కలిగిస్తున్నాయి. శాస్త్రవేత్తల అంచనాల ప్రకారం 2050 నాటికి సముద్ర మట్టం 30-60 సెం.మీ. పెరిగే అవకాశం ఉంది. అయినప్పటికీ, విమానాశ్రయ నిర్వాహకులు మునిగే రేటు ఆమోదయోగ్యమైన స్థాయిలో ఉందని, 609 మిలియన్‌ డాలర్ల విలువైన టెర్మినల్‌ 1 పునరుద్ధరణతో భద్రతను మరింతగా పెంచే ప్రయత్నాలు జరుగుతున్నాయని చెబుతున్నారు. ఇలాంటి నిర్మాణాల ద్వారా ప్రపంచానికి సముద్రంలో మానవ నిర్మిత ద్వీపాల ఇంజినీరింగ్‌పై అమూల్యమైన పాఠాలు లభిస్తున్నాయని నిపుణులు అభిప్రాయపడుతున్నారు.