అంతరిక్షం నుంచి భారతదేశానికి ‘నమస్కారం’ చెప్పిన శుభాంశు శుక్లా.. లైవ్ కాల్ వైరల్

భారతదేశ కీర్తిని అంతరిక్షంలో రెపరెపలాడించిన భారత వైమానిక దళ ఫైటర్ పైలట్ శుభాంశు శుక్లా చరిత్ర సృష్టించారు. కోట్లాది మంది భారతీయుల ఆశలను మోస్తూ అంతరిక్షంలోకి దూసుకెళ్లిన ఆయన, ప్రస్తుతం భూకక్ష్యలో తన వ్యోమనౌకలో తిరుగుతూ అంతర్జాతీయ అంతరిక్ష కేంద్రం (ISS) వైపుగా పయనిస్తున్నారు. ఈ అద్భుత ప్రయాణం మధ్యలో, శుభాంశు శుక్లా అంతరిక్షం నుంచి నేరుగా లైవ్ కాల్ చేసి భారత ప్రజలకు "నమస్కారం" తెలిపారు. ఈ హృదయ స్పర్శ గల దృశ్యం ప్రతి భారతీయుడి మనసును బలంగా తాకింది.

-ఒక చిన్న పిల్లాడిలా అంతరిక్షంలో నడవడం నేర్చుకుంటున్నా: శుభాంశు భావోద్వేగం

"అంతరిక్షం నుంచి అందరికీ నమస్కారం. తోటి వ్యోమగాములతో కలిసి ఇక్కడ ఉండటం చాలా ఆనందంగా ఉంది. ఇదో గొప్ప ప్రయాణం" అని శుభాంశు తన అనుభూతిని పంచుకున్నారు. "30 రోజుల క్వారంటైన్ తర్వాత ఐఎస్‌ఎస్‌కు చేరుకోబోతున్నాం. ఈ ప్రయాణంలో నాకు సహకరించిన ప్రతిఒక్కరికీ కృతజ్ఞతలు" అని ఆయన అన్నారు. ఆసక్తికరంగా ఈ ప్రయాణంలో ‘జాయ్’ (ఒక బేబీ హంస బొమ్మ) కూడా వారితో పాటు ఉంది. భారత సంప్రదాయంలో హంసను విజ్ఞానానికి ప్రతీకగా భావిస్తారు. భార రహిత స్థితికి అలవాటుపడటం గురించి శుభాంశు మాట్లాడుతూ "భార రహిత స్థితికి ఇప్పుడిప్పుడే అలవాటుపడుతున్నా. అంతరిక్షంలో ఎలా నడవాలి, ఎలా తినాలి అనే విషయాలను చిన్నపిల్లాడిలా నేర్చుకుంటున్నా. ఇక్కడున్న ప్రతీ క్షణాన్ని ఆస్వాదిస్తున్నా" అని తెలిపారు.

- కోట్లాది భారతీయులు నాకు తోడుగా ఉన్నారు: మువ్వన్నెల పతాకంతో శుభాంశు

తన భుజంపై ఉన్న మువ్వన్నెల పతాకాన్ని చూపిస్తూ శుభాంశు భావోద్వేగంగా మాట్లాడారు. "నా భుజంపై మువ్వన్నెల పతాకం ఉంది. అది చూస్తున్నప్పుడు ఈ ప్రయాణంలో నేను ఒంటరి కాను.. కోట్లాది మంది భారతీయులు నాకు తోడుగా ఉన్నారనే భావన కలుగుతుంది. రోదసియానంలో నాది చిన్న అడుగే కావొచ్చు. కానీ భారత మానవ సహిత అంతరిక్ష యాత్రలకు ఘనమైన ముందడుగు" అని ఆయన పేర్కొన్నారు. అంతర్జాతీయ అంతరిక్ష కేంద్రంలో వీలైనంత ఎక్కువ సమయం గడుపుతానని, తన అనుభవాలను భారత ప్రజలతో పంచుకోవడానికి ఎదురుచూస్తున్నానని శుక్లా తెలిపారు. దాదాపు 15 నిమిషాల పాటు ఈ లైవ్ కాల్ సాగింది, దేశవ్యాప్తంగా లక్షలాది మంది ప్రజలు దీనిని వీక్షించారు.

-41 ఏళ్ల తర్వాత భారతీయ వ్యోమగామి అంతరిక్షంలోకి: యాక్సియం-4 మిషన్

భారత కాలమానం ప్రకారం బుధవారం మధ్యాహ్నం 12:01 గంటలకు అమెరికాలోని కెన్నడీ అంతరిక్ష కేంద్రం నుంచి యాక్సియం-4 మిషన్లో భాగంగా శుభాంశు శుక్లాతో పాటు మొత్తం నలుగురు వ్యోమగాములు ఐఎస్‌ఎస్‌కు బయల్దేరారు. గురువారం సాయంత్రం 4:30 గంటలకు వారి వ్యోమనౌక అంతర్జాతీయ అంతరిక్ష కేంద్రంతో అనుసంధానం అవుతుంది. ఈ బృందం 14 రోజుల పాటు ఐఎస్‌ఎస్‌లో ఉండి పలు శాస్త్రీయ పరిశోధనలు చేస్తుంది.

41 ఏళ్ల తర్వాత భారతీయ వ్యోమగామి ఒకరు అంతరిక్షంలోకి వెళ్లడం ఇదే తొలిసారి కావడం విశేషం. ఇది భారతదేశ అంతరిక్ష చరిత్రలో ఒక సరికొత్త మైలురాయిని నమోదు చేసింది. శుభాంశు శుక్లా ఈ అరుదైన అవకాశాన్ని ఉపయోగించుకొని దేశగౌరవాన్ని అంతరిక్షం వరకూ తీసుకెళ్లారు. భారత యువతకు ప్రేరణగా నిలిచిన శుభాంశుకు దేశం నలుమూలల నుండి శుభాకాంక్షలు, అభినందనలు వెల్లువెత్తుతున్నాయి.