విమానంలో ఘోరం: ప్రయాణికుడిపై భారత సంతతి యువకుడి దాడి.. వీడియో వైరల్

జూన్ 30న ఫిలడెల్ఫియా నుంచి మయామికి వెళ్తున్న ఫ్రాంటియర్ ఎయిర్‌లైన్స్‌ విమానంలో జరిగిన ఓ దారుణ ఘటన ప్రయాణికులను దిగ్భ్రాంతికి గురిచేసింది. గగనతలంలో విమానం సజావుగా సాగుతుందని భావించిన వారికి, భారత సంతతికి చెందిన ఇషాన్ శర్మ (21) అనే యువకుడు తోటి ప్రయాణికుడిపై దాడికి దిగిన దృశ్యం షాక్ ఇచ్చింది. ఈ ఘటనకు సంబంధించిన వీడియోలు ప్రస్తుతం సోషల్ మీడియాలో వైరల్‌గా మారాయి.

న్యూయార్క్‌కు చెందిన ఇషాన్ శర్మకు, కీను ఎవాన్స్ అనే మరో ప్రయాణికుడికి మధ్య విమానంలో వాగ్వాదం తలెత్తింది. చిన్న మాటల తూకంలా మొదలైన ఈ గొడవ క్షణాల్లోనే హింసాత్మకంగా మారింది. శర్మ ఒక్కసారిగా ఎవాన్స్‌పై దాడికి దిగి, అతని గొంతు బిగించి ఊపిరాడకుండా చేశాడు. తోటి ప్రయాణికులు అడ్డుకునేందుకు ప్రయత్నించినా, శర్మను ఆపడం కష్టమైంది. అక్కడితో ఆగకుండా, శర్మ ఎవాన్స్ గొంతు కోయడానికి ప్రయత్నించి, శరీరంపై గాయాలు చేశాడు. ఈ ఘటనతో విమానంలోని ప్రయాణికులు భయాందోళనకు గురయ్యారు. సిబ్బందికి అత్యవసర బటన్ నొక్కి సమాచారం అందించగా, విమానం మయామి విమానాశ్రయానికి చేరుకోగానే పోలీసులు శర్మను అరెస్ట్ చేశారు. ఈ దాడిలో శర్మ కంటిపై స్వల్ప గాయాలైనట్లు గుర్తించారు.

-పోలీసు విచారణ.. కోర్టు హాజరు

దాడి చేసిన ఇషాన్ శర్మపై పోలీసులు కేసు నమోదు చేశారు. బాధితుడు ఎవాన్స్ పోలీసులకు ఇచ్చిన ఫిర్యాదులో, తన సీటు వైపు వెళ్తుండగా శర్మ తన మెడ పట్టుకుని చంపుతానని బెదిరించాడని పేర్కొన్నాడు. విమాన సిబ్బందికి తానే సమాచారం అందించినట్లు ఎవాన్స్ తెలిపాడు.జులై 2న శర్మను కోర్టులో హాజరుపరిచారు. శర్మ తరఫు న్యాయవాది మాట్లాడుతూ, "ఇషాన్ ధ్యానంలో ఉండేవాడు. అప్పుడు వెనుక ప్రయాణికుడు ఏదో అభ్యంతరం చెప్పినట్లు సమాచారం. కానీ ఇది ఓ దురదృష్టకర ఘటన మాత్రమే" అని వివరించారు.

-వైరల్ అవుతున్న వీడియోలు

ఈ ఘర్షణకు సంబంధించిన వీడియోలు సోషల్ మీడియాలో విపరీతంగా వైరల్ అవుతున్నాయి. గగనతలంలోనే జరిగిన ఈ హింసాత్మక ఘటనపై నెటిజన్లు తీవ్ర ఆవేదన వ్యక్తం చేస్తున్నారు. "విమానాల్లో భద్రత మామూలుగా ఉండటం సరిపోదు.. మానసిక స్థితి సరిగా లేని వ్యక్తులపై ముందుగానే చర్యలు తీసుకోవాలి" అంటూ పలువురు విమర్శలు గుప్పిస్తున్నారు.

ఈ ఘటన మరోసారి విమాన ప్రయాణాల్లో భద్రతా ప్రమాణాలపై ప్రశ్నలను లేవనెత్తింది. ప్రయాణికుల భద్రత కోసం విమాన సంస్థలు మరింత జాగ్రత్తలు తీసుకోవాల్సిన అవసరం ఉందని విశ్లేషకులు అభిప్రాయపడుతున్నారు. ఇషాన్ శర్మపై నేర విచారణ కొనసాగుతోంది.