రూహ్ అఫ్జా vs పతంజలి.. మార్కెట్లో ఎవరిది ఆధిపత్యం?

యోగా గురువు బాబా రామ్‌దేవ్ మరోసారి వార్తల్లో నిలిచారు. ఈసారి ఆయన ఓ వీడియోలో ‘షర్బత్ జిహాద్’ గురించి మాట్లాడి దుమారం రేపారు. మార్కెట్‌లో బాగా ప్రాచుర్యం పొందిన షర్బత్ అమ్మే సంస్థ తన లాభాలతో మసీదులు, మదర్సాలు కట్టిస్తోందని బాబా రామ్‌దేవ్ ఆరోపించారు. పతంజలి గులాబీ షర్బత్ కొనాలని ఆయన ప్రజలకు విజ్ఞప్తి చేశారు. దీంతో, చాలా ఏళ్లుగా భారతదేశంలో ఎక్కువ మంది తాగే షర్బత్‌గా పేరొందిన హమ్‌దర్ద్ రూహ్ అఫ్జా షర్బత్‌ను ఆయన లక్ష్యంగా చేసుకున్నట్లు స్పష్టమవుతోంది. ముఖ్యంగా వేసవి కాలంలో దీనికి డిమాండ్ మరింత పెరుగుతుంది.

బాబా రామ్‌దేవ్ ఈ వీడియోతో వివాదాల్లో చిక్కుకున్నారు. ఆయన వ్యాఖ్యలపై సోషల్ మీడియాలో తీవ్ర చర్చ జరుగుతోంది. బాబా రామ్‌దేవ్‌ను చాలా మంది విమర్శిస్తున్నారు. హమ్‌దర్ద్ రూహ్ అఫ్జా షర్బత్ ఎలా ప్రారంభమైందో, రూహ్ అఫ్జా తయారు చేసే హమ్‌దర్ద్ లాబొరేటరీస్, బాబా రామ్‌దేవ్ పతంజలి వ్యాపారం ఎంత ఉందో ఇప్పుడు తెలుసుకుందాం...

119 ఏళ్ల నాటి రూహ్ అఫ్జా కథ

రూహ్ అఫ్జా అంటే ఆత్మను తాజాగా ఉంచేది అని అర్థం. దీని కథ భారతదేశ స్వాతంత్య్రానికి ముందే ప్రారంభమైంది. 1907లో యునాని హెర్బల్ మెడిసిన్, హమ్‌దర్ద్ దవాఖానా వ్యవస్థాపకుడు హకీమ్ హాఫీజ్ అబ్దుల్ మజీద్ ఈ షర్బత్‌ను కనుగొన్నారు. వేసవిలో డీహైడ్రేషన్, హీట్ స్ట్రోక్‌కు గురయ్యే వారి కోసం హకీమ్ అబ్దుల్ మజీద్ ఒక ప్రత్యేక ఔషధాన్ని తయారు చేయాలనుకున్నారని సమాచారం. పండ్లు, మూలికలు, పూల సారం నుంచి ప్రత్యేక మిశ్రమాన్ని తయారు చేశారు. దీంతో ఇది భారతదేశంలో అత్యధికంగా తాగే షర్బత్‌గా మారింది.

హమ్‌దర్ద్, పతంజలి వ్యాపారం ఎంత?

హమ్‌దర్ద్ లాబొరేటరీస్ కేవలం రూహ్ అఫ్జా షర్బత్‌కు మాత్రమే పరిమితం కాలేదు. సింకర, రోగన్ బాబాద్ షిరీన్, సాఫీ, జోషినా, స్వాలిన్ వంటి అనేక ఉత్పత్తులను తయారు చేస్తోంది. 2016లో రూహ్ అఫ్జా దాదాపు 600 కోట్ల వ్యాపారం చేసింది. 2018లో హమ్‌దర్ద్ లాబొరేటరీస్ 1000 కోట్ల అమ్మకాలు లక్ష్యంగా పెట్టుకుంది. మరోవైపు పతంజలి విషయానికొస్తే, బాబా రామ్‌దేవ్ సంస్థ ఉత్పత్తులు ఇప్పుడు భారతదేశంలోని ప్రతి ఇంటికి చేరుకున్నాయి. 2023-24లో పతంజలి 23.15 శాతం వృద్ధితో 9,335.32 కోట్ల వ్యాపారం చేసింది.