పెళ్లికి ముందు ఈ పరీక్ష పెట్టుకోండి.. పాస్ అయితే చేసుకోండి
అందుకే చాలా మంది జంటలు పెళ్లికి ముందు ఒకరినొకరు బాగా తెలుసుకోవడానికి, వారి మధ్య బంధాన్ని పరీక్షించుకోవడానికి వివిధ రకాల ప్రయత్నాలు చేస్తుంటారు.
By: Tupaki Desk | 1 April 2025 3:00 AM IST
పెళ్లి అనేది జీవితంలో ఒక ముఖ్యమైన ఘట్టం. ఇద్దరు వ్యక్తులు కలిసి ఒక కొత్త జీవితాన్ని ప్రారంభించే ముందు వారి మధ్య అనుకూలత, సహకారం వంటి విషయాలు చాలా ముఖ్యం. అందుకే చాలా మంది జంటలు పెళ్లికి ముందు ఒకరినొకరు బాగా తెలుసుకోవడానికి, వారి మధ్య బంధాన్ని పరీక్షించుకోవడానికి వివిధ రకాల ప్రయత్నాలు చేస్తుంటారు. కొందరు కలిసి ప్రయాణాలు చేస్తారు. మరికొందరు కొంతకాలం సహజీవనం చేస్తారు. అయితే, స్టాన్ఫోర్డ్ గ్రాడ్యుయేట్ - రచయిత సాహిల్ బ్లూమ్ మాత్రం ఒక ప్రత్యేకమైన పరీక్షను సూచిస్తున్నారు. దానినే ఆయన "ఐక్యా మ్యారేజ్ టెస్ట్" అని పిలుస్తున్నారు.
-ఇంతకీ ఏమిటీ ఇక్యా మ్యారేజ్ టెస్ట్?
సాహిల్ బ్లూమ్ ప్రకారం.. పెళ్లికి ముందు జంటలు ఐక్యా స్టోర్కు వెళ్లాలి. అక్కడ వారికి నచ్చిన ఒక ఫర్నిచర్ ముక్కను కొనుగోలు చేయాలి. ఆ తర్వాత దానిని ఇంటికి తీసుకొచ్చి ఇద్దరూ కలిసి అమర్చాలి. బ్లూమ్ 'ది 5 టైప్స్ ఆఫ్ వెల్త్' అనే పుస్తక రచయిత. ఎవరైతే ఐక్యా స్టోర్లోని గందరగోళాన్ని దాటుకుని.. ఇద్దరికీ నచ్చిన ఫర్నిచర్ను ఎంచుకుని, ఒకరిపై ఒకరు చిరాకు పడకుండా విజయవంతంగా అమర్చగలరో, వారు పెళ్లి జీవితంలోని కష్టాలను కూడా సులభంగా ఎదుర్కోగలరని ఆయన నమ్ముతారు. ఆయన తన ఎక్స్ ఖాతాలో ఈ విషయాన్ని తెలియజేశారు. అంతేకాదు గతంలో 2023 ఫిబ్రవరిలో కూడా ఇదే విషయాన్ని ఆయన ఇన్స్టాగ్రామ్లో పోస్ట్ చేశారు.
- ఫర్నిచర్ అవసరం లేదా? అయితే ఇది ప్రయత్నించండి!
ఒకవేళ మీకు ఫర్నిచర్ అవసరం లేకపోతే, సాహిల్ బ్లూమ్ మరో ఆసక్తికరమైన సూచన చేస్తున్నారు. ఇద్దరు వ్యక్తులు కలిసి ప్రయాణించే టెండమ్ కయాక్ను తీసుకెళ్లి అందులో ఒకరోజు సాహసయాత్ర చేయమని ఆయన అంటున్నారు. ఇది కూడా మీ మధ్య సమన్వయాన్ని సహనాన్ని పరీక్షించడానికి మంచి మార్గం అని ఆయన అభిప్రాయపడుతున్నారు.
- భిన్నాభిప్రాయాలు
సాహిల్ బ్లూమ్ చేసిన ఈ సూచనకు చాలా మంది నుంచి స్పందనలు వచ్చాయి. కొందరు దీనిని సీరియస్గా తీసుకుంటే, మరికొందరు సరదాగా వ్యాఖ్యానిస్తున్నారు. ఒక ఎక్స్ యూజర్ అయితే "మా ఆవిడ తెలివిగా తనకు కావలసినది కొనుక్కుంటుంది, ఆ తర్వాత నన్ను ఒక గదిలో బంధించి, తిడుతూ, కేకలు వేస్తూ ఆ ఫర్నిచర్ను నేనే అమర్చేలా చేస్తుంది" అని సరదాగా కామెంట్ చేశారు. మరొకరు "నేను తెలియకుండానే ఈ పరీక్షను ఎదుర్కొన్నాను. ఇప్పుడు ఆమె నా భార్య కాబోతోంది" అని సంతోషంగా తెలిపారు.
ఏది ఏమైనప్పటికీ సాహిల్ బ్లూమ్ సూచించిన ఈ "ఐక్యా మ్యారేజ్ టెస్ట్" పెళ్లికి ముందు జంటలు ఒకరినొకరు మరింత బాగా అర్థం చేసుకోవడానికి, కలిసి పనిచేసే స్వభావాన్ని తెలుసుకోవడానికి ఒక ఆసక్తికరమైన మార్గం అనడంలో సందేహం లేదు.