టేకాఫ్ కు ముందు ఫైర్ అలెర్ట్.. విమానం నుంచి కిందకు దూకిన ప్రయాణికులు.. ఏంటీ ఉపద్రవాలు

స్పెయిన్‌లోని పాల్మా డె మేయోర్కా విమానాశ్రయంలో ఇటీవల చోటుచేసుకున్న ఓ ఘటన ప్రయాణికులను తీవ్ర భయాందోళనకు గురిచేసింది. మాంచెస్టర్‌కు బయలుదేరాల్సిన ర్యాన్‌ఎయిర్‌కు చెందిన బోయింగ్ 737 విమానంలో టేకాఫ్‌కు సిద్ధంగా ఉండగా ఒక్కసారిగా ఫైర్ అలర్ట్ మోగింది. దీంతో ప్రయాణికులు ప్రాణభయంతో ఎమర్జెన్సీ ద్వారాలు తెరిచి బయటకు పరుగులు తీయగా, కొందరు అత్యవసర మార్గాలను కూడా పట్టించుకోకుండా ఏకంగా విమానం రెక్కలపై నుంచి కిందకు దూకేశారు.

-టేకాఫ్‌కు సిద్ధంగా ఉండగానే అలర్ట్

ప్రయాణికుల కథనం ప్రకారం, విమానం రన్‌వేపై కదులుతూ టేకాఫ్‌కు సన్నద్ధమవుతున్న సమయంలోనే ఫైర్ అలర్ట్ సౌండ్ ఒక్కసారిగా వినిపించింది. దీనితో ప్రయాణికుల్లో తీవ్ర భయాందోళనలు రేకెత్తాయి. కొందరు వెంటనే ఎమర్జెన్సీ డోర్లను తెరిచి బయటకు దూకగా, మరికొందరు విమాన సిబ్బంది సూచనలను కూడా వినకుండా, అత్యవసర మార్గాలను ఉపయోగించకుండా నేరుగా విమానం రెక్కలపై నుంచి కిందకు దూకేశారు.

-18 మందికి గాయాలు

ఈ విధంగా అజాగ్రత్తగా కిందకు దూకడం వల్ల కనీసం 18 మంది ప్రయాణికులు స్వల్పంగా గాయపడ్డారు. విమాన సిబ్బంది ప్రయాణికులను సురక్షితంగా ఎమర్జెన్సీ మార్గాల ద్వారా బయటకు పంపేందుకు ప్రయత్నించినప్పటికీ, భయంతో కొందరు వారి సూచనలను పట్టించుకోకుండా కిందకు దూకేశారు.

-అధికారుల స్పందన

ఈ ఘటనపై ర్యాన్‌ఎయిర్ సంస్థ స్పందించింది. "విమానం టేకాఫ్‌కు సిద్ధమవుతున్న సమయంలో తప్పుడు అలర్ట్ వెలిగినట్టు గుర్తించాం. ఏ విధమైన మంటలు లేదా పొగలు బయటపడలేదు. ప్రయాణికులందరినీ సురక్షితంగా టెర్మినల్‌కు తరలించాం. మా సిబ్బంది అగ్ని ప్రమాద నిబంధనల ప్రకారం తక్షణ చర్యలు తీసుకున్నారు" అని ర్యాన్‌ఎయిర్ ఒక ప్రకటనలో తెలిపింది.

-దృశ్యాలు వైరల్

ఈ ఘటనకు సంబంధించిన వీడియోలు సోషల్ మీడియాలో తెగ వైరల్ అవుతున్నాయి. విమానం రెక్కలపై నుంచి ప్రయాణికులు భయంతో దూకుతూ పరుగులు తీయడం చూసి నెటిజన్లు ఆశ్చర్యపోతున్నారు.

ఈ సంఘటన మనకు మరోసారి గుర్తు చేస్తోంది. విమాన ప్రయాణాల్లో అత్యవసర పరిస్థితులలో శాంతంగా, విమాన సిబ్బంది సూచనలు పాటిస్తూ వ్యవహరించడం ఎంత ముఖ్యమో. వ్యర్థ భయంతో తీసుకునే నిర్ణయాలు ప్రయాణికుల ప్రాణాలను ప్రమాదంలోకి నెట్టే అవకాశముంది. అధికారులు, సిబ్బంది వేగవంతమైన చర్యల వల్ల ఈ ప్రమాదం తప్పింది.