డాలర్‌కు షాక్ ఇచ్చిన రూపాయి.. లాభాల్లో రికార్డు.. కారణాలు ఇవే

భారతీయ రూపాయి శుక్రవారం అమెరికన్ డాలర్‌పై తన సత్తా చాటింది. దేశీయ స్టాక్ మార్కెట్లు మంచి లాభాలతో దూసుకుపోతుండటం, ప్రపంచవ్యాప్తంగా ఆర్థిక పరిస్థితులు మెరుగుపడుతుండటం, అలాగే భారత్ , అమెరికా మధ్య వాణిజ్య ఒప్పందం కుదిరే అవకాశం ఉండటంతో రూపాయి విలువ ఒక్కసారిగా పెరిగింది.

ఇంకా చెప్పాలంటే, ఏప్రిల్ నెలలో మన దేశం రికార్డు స్థాయిలో జీఎస్టీ వసూళ్లను సాధించింది. ఏకంగా రూ.2.37 లక్షల కోట్లు వసూలు కావడం నిజంగా గొప్ప విషయం. ఇది గత సంవత్సరం కంటే 12.6 శాతం ఎక్కువ. ఈ భారీ వసూళ్లు మన ఆర్థిక వ్యవస్థ ఎంత బలంగా ఉందో తెలియజేస్తున్నాయి. దీనివల్ల పెట్టుబడిదారుల్లో మరింత నమ్మకం పెరిగింది.

అంతేకాదు, విదేశీ పెట్టుబడిదారులు కూడా మన దేశంలో భారీగా పెట్టుబడులు పెట్టడానికి ఆసక్తి చూపిస్తున్నారు. ఏప్రిల్ 30, 2025న విదేశీ సంస్థాగత పెట్టుబడిదారులు ఏకంగా రూ.50.57 కోట్ల విలువైన షేర్లను కొనుగోలు చేశారు. మన దేశీయ పెట్టుబడిదారులు కూడా ఏమీ తక్కువ తినలేదు. వారు ఏకంగా రూ.1,792.15 కోట్ల విలువైన షేర్లను కొన్నారు. ఇది మన ఆర్థిక వ్యవస్థకు మరింత బలాన్నిచ్చింది. ప్రస్తుతం అమెరికా, చైనా మధ్య జరుగుతున్న వాణిజ్య చర్చలు కూడా సానుకూలంగా ఉండటంతో రూపాయి విలువ మరింత పెరిగే అవకాశం కనిపిస్తోంది.

ఈ అన్ని కారణాల వల్ల శుక్రవారం రూపాయి ఒక్కసారిగా 69 పైసలు పెరిగి, ఒక డాలర్‌కు రూ.83.85 వద్ద ట్రేడ్ అయింది. అంతకు ముందు రోజు ముగింపు ధర రూ.84.54గా ఉంది. రోజంతా రూపాయి విలువ రూ.83.76 నుంచి రూ.84.0025 మధ్యలో కదలాడింది. మొత్తానికి చూసుకుంటే..మన దేశ ఆర్థిక వ్యవస్థ మెరుగుపడుతుండడం, పెట్టుబడులు బాగా వస్తుండటంతో రూపాయి తన పరుగును కొనసాగిస్తోంది. డాలర్‌తో పోలిస్తే రూపాయి బలం పుంజుకోవడం మన దేశ ఆర్థిక భవిష్యత్తుకు చాలా మంచి సంకేతంగా పరిగణించవచ్చు.