ఉక్రెయిన్ పై పెద్ద ప్లాన్ వేస్తున్న పుతిన్.. ట్రంప్ కు హింట్

ఉక్రెయిన్‌పై రష్యా అధ్యక్షుడు వ్లాదిమిర్ పుతిన్ భారీ ప్రతీకార ప్రణాళికలు రచిస్తున్నట్లు సంకేతాలు వెలువడుతున్నాయి. ఇటీవల అమెరికా అధ్యక్షుడు డొనాల్డ్ ట్రంప్ తనతో ఫోన్‌లో మాట్లాడినప్పుడు పుతిన్ ఈ విషయాన్ని చాలా గట్టిగా చెప్పినట్లు పేర్కొన్నారు. ట్రంప్ వ్యాఖ్యలను రష్యా అధ్యక్ష కార్యాలయం క్రెమ్లిన్ కూడా ధ్రువీకరించింది. ప్రతీకార దాడుల గురించి తమ ప్రణాళికను ఫోన్ కాల్‌లో ట్రంప్‌కు వెల్లడించినట్లు క్రెమ్లిన్ తెలిపింది.

బుధవారం పుతిన్‌తో 75 నిమిషాల పాటు ఫోన్‌లో మాట్లాడినట్లు ట్రంప్ సోషల్ మీడియాలో వెల్లడించారు. ఈ సంభాషణ సవ్యంగానే సాగినప్పటికీ, ఉక్రెయిన్-రష్యా మధ్య శాంతి సాధనకు ఇది ఉపకరించదని ట్రంప్ పేర్కొన్నారు. ఈ నేపథ్యంలోనే క్రెమ్లిన్ స్పందన వచ్చింది, ఇది రష్యా తీవ్రమైన ప్రతీకార చర్యలకు సిద్ధమవుతోందని సూచిస్తోంది.

-"స్పైడర్ వెబ్" ఆపరేషన్: రష్యాకు భారీ నష్టం

తుర్కియేలోని ఇస్తాంబుల్‌లో రష్యా, ఉక్రెయిన్‌ల మధ్య మరోసారి శాంతి చర్చలు జరగనున్న వేళ, గత ఆదివారం ఉక్రెయిన్ "స్పైడర్ వెబ్" పేరుతో ఒక అపూర్వమైన భారీ ఆపరేషన్ చేపట్టింది. ఉక్రెయిన్ బలగాలు రష్యా భూభాగంలోకి కంటైనర్లలో డ్రోన్‌లను తరలించి, రష్యా వైమానిక స్థావరాలను లక్ష్యంగా చేసుకుని దాడులు జరిపాయి. ఈ దాడిలో రష్యాకు చెందిన 41 యుద్ధ విమానాలు, పలు ఎయిర్‌బేస్‌లు ధ్వంసం అయ్యాయి. రష్యా భూభాగంలోని 4,000 కిలోమీటర్ల దూరంలో ఉన్న ఇర్కుట్స్క్ ప్రాంతంలోని వైమానిక స్థావరంలోకి వెళ్లి మరీ డ్రోన్‌లు దాడులు చేశాయి. ఈ దాడిలో టీయూ-95, టీయూ-22ఎం3 బాంబర్లు, కీలకమైన ఏ-50 ఎయిర్‌క్రాఫ్ట్‌లు ధ్వంసం అయ్యాయి. మూడేళ్లకు పైగా కొనసాగుతున్న ఈ యుద్ధంలో ఈ ఘటన మాస్కోకు పెద్ద కుదుపు కాగా, ఉక్రెయిన్ దళాలకు మరింత ఆత్మస్థైర్యం లభించినట్టు అంతర్జాతీయ విశ్లేషకులు అభిప్రాయపడ్డారు.

-రష్యా ప్రతీకారం: ఉక్రెయిన్‌పై డ్రోన్ల దాడి

"స్పైడర్ వెబ్" ఆపరేషన్ తర్వాత పరిణామాల నేపథ్యంలో రష్యా గురువారం ఉక్రెయిన్‌లోని ప్రైలుకీ నగరంలో డ్రోన్ల దాడి జరిపింది. ఈ దాడిలో నివాస ప్రాంతాలు ధ్వంసం కాగా, ఒక ఏడాది బిడ్డతో సహా ఐదుగురు మృతి చెందినట్లు అధికారులు వెల్లడించారు. ఈ నగరం ఉక్రెయిన్ రాజధాని కీవ్‌కు 100 కి.మీ. దూరంలో ఉంది. అక్కడ ఎలాంటి మిలిటరీ ఆస్తులు లేవని ఉక్రెయిన్ అధికారులు పేర్కొన్నారు. ప్రైలుకీతో పాటు ఇతర నగరాలను కూడా 103 డ్రోన్‌లు తాకాయని అధ్యక్షుడు జెలెన్‌స్కీ వెల్లడించారు.

రష్యా ప్రతీకార చర్యలకు సిద్ధమవుతోందని ఈ పరిణామాలు స్పష్టం చేస్తున్నాయి. యుద్ధం మరింత తీవ్రమయ్యే అవకాశం ఉందని అంతర్జాతీయ పరిశీలకులు ఆందోళన వ్యక్తం చేస్తున్నారు. భవిష్యత్తులో ఈ ఘర్షణ ఎలాంటి మలుపులు తిరుగుతుందో వేచి చూడాలి.