పుతిన్ వాడే హెలికాప్టర్ నే మోదీ వాడుతున్నారు.. ఇంతకీ దాని ఖరీదెంతో తెలుసా ?

రష్యా, ఉక్రెయిన్ మధ్య జరుగుతున్న యుద్ధం ఇప్పుడు మూడేళ్లు దాటింది. ఈ మూడు సంవత్సరాల్లో ఇరువైపులా వేలాది మంది ప్రాణాలు కోల్పోయారు. అమెరికా మాజీ అధ్యక్షుడు డొనాల్డ్ ట్రంప్ ప్రయత్నించినప్పటికీ ఈ యుద్ధం ఆగడం లేదు. అయితే, ఇప్పుడు ఈ యుద్ధంలో మరో పెద్ద సంచలనం చోటు చేసుకుంది. మీడియా నివేదికల ప్రకారం.. రష్యా సైన్యం ఒక పెద్ద విషయాన్ని బయటపెట్టింది. ఇటీవల ఉక్రెయిన్, రష్యా అధ్యక్షుడు వ్లాదిమిర్ పుతిన్‌ను (Vladimir Putin) లక్ష్యంగా చేసుకుని దాడికి ప్రయత్నించిందట. ఈ ఘటన మే 20, 2025న జరిగిందని, ఆ సమయంలో పుతిన్ కుర్స్క్ ప్రాంతంలో పర్యటిస్తున్నారని తెలుస్తోంది.

పుతిన్ హెలికాప్టర్‌పై డ్రోన్ దాడి యత్నం

రష్యా మిలిటరీ కమాండర్ వెల్లడించిన వివరాల ప్రకారం.. ఉక్రెయిన్ డ్రోన్‌లను ఉపయోగించి పుతిన్‌ను టార్గెట్ చేసిందని తెలుస్తోంది. మీడియా నివేదికలు చెబుతున్న దాని ప్రకారం.. ఆ సమయంలో రష్యా అధ్యక్షుడు Mi-17 హెలికాప్టర్‌లో ప్రయాణిస్తున్నారు. అయితే, రష్యా ఈ ఉక్రెయిన్ దాడిని విజయవంతంగా తిప్పికొట్టింది. ఈ ఘటనతో రష్యా-ఉక్రెయిన్ యుద్ధంలో మరింత ఉద్రిక్తత పెరిగింది. మరి పుతిన్ ప్రయాణించిన Mi-17 హెలికాప్టర్ అంటే ఏమిటి? దాని ప్రత్యేకతలు, ధర ఎంత ఉంటుందో తెలుసుకుందాం.

Mi-17 హెలికాప్టర్ ధర

Mi-17 హెలికాప్టర్ ప్రపంచంలోని అనేక దేశాల సైన్యాలు ఉపయోగిస్తాయి. దీనిని రష్యా, గతంలో సోవియట్ యూనియన్, అభివృద్ధి చేసింది. ఇది ఒక రవాణా, మధ్యస్థ దాడి హెలికాప్టర్ (Transport and Medium Attack Helicopter). రష్యా వద్ద ఈ హెలికాప్టర్ అనేక వెర్షన్లు ఉన్నాయి. రష్యా సైన్యం దీనిని ముఖ్యంగా వీఐపీల కదలికల (VIP movement) కోసం ఉపయోగిస్తుంది.

Mi-17V5 హెలికాప్టర్ అనేది Mi-17 సిరీస్‌లో అత్యంత అధునాతన, అప్‌గ్రేడెడ్ వెర్షన్. దీని ధర సుమారు 6 మిలియన్ల నుంచి 10 మిలియన్ డాలర్లు ఉంటుంది. భారతీయ రూపాయల్లో దీని విలువ దాదాపు 51 కోట్ల నుంచి 85 కోట్ల రూపాయల వరకు ఉంటుంది. వీఐపీ కదలికల విషయానికి వస్తే ఈ హెలికాప్టర్ ఒక రకంగా ఎగురుతున్న సురక్షితమైన మినీ ఆఫీసులా మారుతుంది. మన భారత ప్రధాని నరేంద్ర మోదీ కూడా Mi-17 హెలికాప్టర్‌ను ఉపయోగిస్తారు.

Mi-17 హెలికాప్టర్ ఎందుకు అంత ప్రత్యేకం?

Mi-17 హెలికాప్టర్ చాలా బలమైనది. దీనిపై తుపాకీ తూటాల ప్రభావం పెద్దగా ఉండదు. దీనిలో ఇన్‌ఫ్రారెడ్ జామ్మర్ (Infrared Jammer), లాంచర్లు, అనేక రకాల మిసైల్‌లు, ఇతర ఆయుధాలను అమర్చవచ్చు. ఇవి దీనిని చాలా ప్రమాదకరమైనదిగా మారుస్తాయి. దీనివల్లనే దీనిని రవాణా, సైనికుల కదలికలు, వీఐపీల రవాణా,సెర్చింగ్ అండ్ రెస్క్యూ (Search and Rescue) వంటి అనేక రకాల పనుల కోసం ఉపయోగిస్తారు. దీని బహుళ ప్రయోజనకర లక్షణాలు, భద్రతా ఫీచర్లు దీనిని ప్రపంచవ్యాప్తంగా ప్రసిద్ధి చెందిన హెలికాప్టర్‌గా మార్చాయి. పుతిన్‌పై దాడి విఫలం కావడానికి ఈ హెలికాప్టర్ రక్షణ సామర్థ్యాలు కూడా ఒక కారణమని రష్యా సైన్యం పేర్కొంది.