పుతిన్‌పై హత్యాయత్నం.. హెలికాప్టర్‌పై డ్రోన్ల దాడి.. రష్యా సంచలన ప్రకటన!

రష్యా అధ్యక్షుడు వ్లాదిమిర్ పుతిన్‌పై (Vladimir Putin) ఒక హత్యాయత్నం జరిగిందని తెలుస్తోంది. ఈ విషయం ఆలస్యంగా బయటపడింది. పుతిన్ వెళ్తున్న హెలికాప్టర్‌ను డ్రోన్లతో దాడి చేశారని, కానీ రష్యా సైన్యం వాటన్నిటినీ కూల్చేసిందని ఆ దేశ ఆర్మీ అధికారి ఒకరు తాజాగా చెప్పారు. ఈ విషయం ప్రస్తుతం ప్రపంచ వ్యాప్తంగా పెద్ద చర్చకు కారణం అయ్యాయి. అసలు ఇది నిజంగా పుతిన్‌ను చంపే ప్లానా? లేక ఉక్రెయిన్ ఏదైనా కొత్త ఆట ఆడుతోందా? అన్న అనుమానాలు వస్తున్నాయి.

రష్యా వార్తా సంస్థ ఆర్‌బీసీ చెప్పిన వివరాల ప్రకారం, రష్యా ఎయిర్ డిఫెన్స్ యూనిట్ కమాండర్ యూరీ డాష్కిన్ కొన్ని విషయాలు వెల్లడించారు. మే 20 నుంచి 22 వరకు ఉక్రెయిన్ చాలా పెద్ద సంఖ్యలో డ్రోన్లతో రష్యాపై దాడి చేసింది. రష్యా ఆర్మీ ఆ దాడులన్నిటినీ ఆపేసింది. మొత్తం 1,170 డ్రోన్లను నాశనం చేసిందని డాష్కిన్ చెప్పారు. మే 20న కురుస్క్ అనే చోట దాడి జరిగింది. అక్కడ 46 డ్రోన్లను రష్యా సైన్యం కూల్చేసింది. సరిగ్గా అదే రోజు పుతిన్ ఆ ప్రాంతానికి వెళ్లారు. ఆయన హెలికాప్టర్ వెళ్తున్న దారిలోనే ఉన్నట్టుండి డ్రోన్లు వచ్చాయి. కానీ రష్యా ఆర్మీ వెంటనే వాటిని పడగొట్టింది. ఆ తర్వాత అధ్యక్షుడు సురక్షితంగా ప్రయాణించారని యూరీ డాష్కిన్ వివరించారు. ఈ ఘటనపై పెద్ద ఎత్తున దర్యాప్తు జరుగుతోందని డాష్కిన్ చెప్పారు. ఈ విషయాలపై ఉక్రెయిన్ నుంచి మాత్రం ఇప్పటివరకు ఎలాంటి అధికారిక స్పందనా రాలేదు.

రష్యా చేసిన ఈ ప్రకటనతో ప్రపంచమంతా దీనిపై మాట్లాడుకుంటోంది.ఈ సంఘటనతో ఉక్రెయిన్ డ్రోన్ల శక్తి గురించి రష్యాకు భయం పట్టుకుందని అంటున్నారు. పుతిన్ లాంటి పెద్ద నాయకుల దగ్గరికి కూడా డ్రోన్లు వస్తున్నాయంటే ఇది ఆందోళన కలిగించే విషయమే. అయితే, ఇది నిజంగా పుతిన్‌ను చంపే ప్రయత్నమా? లేక ఉక్రెయిన్, రష్యా నాయకులను భయపెట్టడానికి ఆడుతున్న 'సైకలాజికల్ వార్‌ఫేర్' (మానసిక యుద్ధం) లో భాగమా? అని కూడా కొందరు అనుమానిస్తున్నారు. యుద్ధంలో శత్రువుపై ఒత్తిడి పెంచడానికి ఇలాంటి ప్రకటనలు చేస్తుంటారని నిపుణులు చెబుతున్నారు.

ఈ డ్రోన్ దాడి గురించి చెప్పగానే రష్యా కూడా ఊరుకోలేదు, వెంటనే ప్రతీకార దాడులు మొదలుపెట్టింది. శనివారం రాత్రి కీవ్ (ఉక్రెయిన్ రాజధాని) నగరంతో పాటు ఉక్రెయిన్‌లోని చాలా చోట్ల రష్యా డ్రోన్లు, మిస్సైల్స్‌తో దాడి చేసింది. రష్యా చేస్తున్న దాడులపై అమెరికాతో పాటు ప్రపంచ దేశాలు ఏమీ మాట్లాడకపోవడం సరికాదని ఉక్రెయిన్ అధ్యక్షుడు వ్లోదిమిర్ జెలెన్‌స్కీ కోపం వెళ్లగక్కారు. ఇది పుతిన్‌ను మరింత రెచ్చగొడుతుందని, దాడులను ఆపడానికి ప్రపంచం కఠినంగా వ్యవహరించాలని ఆయన కోరారు. ఈ దాడులను అమెరికా మాజీ అధ్యక్షుడు డొనాల్డ్ ట్రంప్ ఉక్రెయిన్ ప్రత్యేక రాయబారి కీత్ కెల్లాగ్ తీవ్రంగా ఖండించారు. రష్యా చర్యలు దారుణమైనవి అని అన్నారు. మొత్తంగా, పుతిన్‌పై జరిగినట్లు చెబుతున్న ఈ డ్రోన్ దాడి ఆరోపణలు యుద్ధంలో ఉద్రిక్తతలను మరింత పెంచుతున్నాయి. ఈ సంఘటన రష్యా-ఉక్రెయిన్ యుద్ధంలో ఒక కొత్త మలుపు తీసుకురావచ్చని నిపుణులు భావిస్తున్నారు.