పుస్తెలు అమ్మైనా పులస తినాలని ఊరికే అనలేదు గోదారోళ్లు!

గోదావరి జిల్లాల ప్రజలకు, చేపలకు ఉన్న సంబంధం వేరే లెవెల్ అని చెబుతుంటారు. చేపలు, రొయ్యలు, పీతలు అనేవి మెజారిటీ గోదావరి జిల్లాల ప్రజల ఆహారంలో అత్యంత కీలక భాగం పోషిస్తుంటాయని చెబుతారు. ఇక ఈ సీజన్ లో వచ్చే పులస సంగతి చెప్పేపనేలేదు. పుస్తెలు అమ్మైనా పులస తినాలనే స్థాయిలో కొటేషన్స్ పెట్టి ఉంచారు. ఈ నేపథ్యంలో మళ్లీ పులస సందడి మొదలైపోయింది.

అవును... గోదావరిలో పులస చేప సందడి మొదలైపోయింది. అప్పుడే ఈ ఏడు రికార్డ్ ధరలు నమోదైపోతున్నాయి. జూలై నుంచి అక్టోబర్ మధ్య సముద్రంలో నుంచి గోదావరిలోకి వచ్చి దొరికే ఈ అరుదైన పులసలను దక్కించుకునేందుకు మాంసాహార ప్రియులు పోటీలు పడుతున్నారు. ఈ క్రమంలో వరుసగా రెండు రోజుల్లో రెండు పులస చేపలు మార్కెట్ లో సందడి చేశాయి. ఇక ధరలు భారీగానే ఉన్నాయి.

ఈ క్రమంలో... శనివారం గోదావరిలో పడిన ఓ పులస చేప.. యానాం మార్కెట్ వేలం పాటలో రూ.12 వేలకు అమ్ముడైన సంగతి తెలిసిందే. అదే యానాంలోని రాజీవ్‌ బీచ్‌ లో ఆదివారం మత్స్యకారులు నిర్వహించిన వేలంలో ఓ పులసను చేపల వ్యాపారం చేసే పొన్నమండ రత్నం రూ.22 వేలకు దక్కించుకున్నారు. ఈ పులస చేప బరువు 1.800 కేజీలుగా ఉంది.

హోప్‌ ఐలాండ్‌ కు చెందిన మల్లాడి ప్రసాద్‌ వలకు ఈ చేప చిక్కింది. ఈ సందర్భంగా స్పందించిన ప్రసాద్... గతేడాది ఓ పులసను రూ.23 వేలకు విక్రయించినట్లు చెప్పారు. ప్రస్తుత సీజన్లో లభ్యత తక్కువగా ఉండటంతో ధరలు ఆకాశాన్ని అంటుతున్నాయి. బంగాళాఖాతం నుంచి సంతానోత్పత్తి కోసం గోదావరి వరద నీటిలోకి వచ్చి మత్స్యకారులకు చిక్కే వీటిని కొనేందుకు ఏటా తీవ్ర పోటీ ఉంటుంది.