ఉగ్రవాదానికి భారత్ దీటైన జవాబు..తీవ్ర నీటి సంక్షోభంలో పాకిస్తాన్

పహల్గాం ఉగ్రవాద దాడి తర్వాత పాకిస్తాన్‌కు బుద్ధి చెప్పడానికి భారతదేశం సింధు నదీ జలాల ఒప్పందాన్ని నిలిపివేయడంతో పాకిస్తాన్‌లో నీటి సంక్షోభం మరింత తీవ్రమైంది. పాక్ రిజర్వాయర్లలో నీటిమట్టం చాలా తగ్గిపోయింది. ఇప్పుడు వాటి నుంచి నీటిని తీయలేని పరిస్థితి ఏర్పడింది. ఇది పాకిస్తాన్ వ్యవసాయంపై, ముఖ్యంగా రాబోయే ఖరీఫ్ పంటలపై తీవ్ర ప్రభావం చూపే అవకాశం ఉంది.

సింధు నదీ ప్రవాహంలో భారీ తగ్గుదల

సింధు నదీ పరీవాహక ప్రాంతంలో నీటి ప్రవాహం గత సంవత్సరంతో పోలిస్తే 15 శాతం తగ్గిపోయింది. వేసవిలో వర్షాభావంతో ఇబ్బందులు పడిన రైతులకు ఖరీఫ్ సీజన్‌లో మరింత కష్టాలు తప్పవని నిపుణులు చెబుతున్నారు. గతేడాది జూన్ 5న పంజాబ్ ప్రావిన్స్‌లో 1.44 లక్షల క్యూసెక్కుల నీరు విడుదల కాగా, ప్రస్తుత నీటి విడుదల 1.24 లక్షల క్యూసెక్కులకు తగ్గిపోయింది.

తాజా గణాంకాల ప్రకారం..పాకిస్తాన్‌లోని ఖైబర్ పఖ్తూంఖ్వాలోని తర్బేలా డ్యామ్ వద్ద సింధు నది నీటిమట్టం 1,465 మీటర్లకు చేరింది. దీని కనీస నీటిమట్టం 1,402 మీటర్లు. పంజాబ్‌లోని చస్మా డ్యామ్ వద్ద ప్రస్తుత నీటిమట్టం 644 మీటర్లు. ఇక్కడ డెడ్ స్టోరేజ్ లెవెల్ 638 మీటర్లు అని నివేదించారు. సియాల్‌కోట్‌లోని మరాలా వద్ద పరిస్థితి చాలా తీవ్రంగా ఉన్నట్లు సమాచారం. అక్కడ చెనాబ్ నదిపై మే 28న సగటు నీటి విడుదల 26,645 క్యూసెక్కులు ఉండగా, జూన్ 5 నాటికి అది 3,064 క్యూసెక్కులకు పడిపోయింది. పాకిస్తాన్‌లోని పంజాబ్‌లో ఖరీఫ్ పంటలకు ప్రమాదం ఏర్పడింది. భారతదేశం తీసుకున్న నిర్ణయం వల్ల 21 శాతం నీటి కొరత వస్తుందని పాకిస్తాన్ అంచనా వేసింది. ఉగ్రవాదంపై పాకిస్తాన్ తన వైఖరిని మార్చుకునే వరకు ఒప్పందాన్ని నిలిపివేస్తామని భారత్ స్పష్టం చేసింది.

పాకిస్తాన్ 'నిర్బంధ' పిడుగు!

బలూచిస్తాన్ వేర్పాటువాద ఉద్యమాన్ని అణచివేయడానికి పాకిస్తాన్ ప్రభుత్వం ఇటీవల తీసుకొచ్చిన ఒక చట్టం వివాదాస్పదంగా మారింది. బలూచిస్తాన్ అసెంబ్లీ ఆమోదించిన ఉగ్రవాద వ్యతిరేక చట్టం 2025 పై స్థానిక ప్రజలు, మానవ హక్కుల సంఘాల నుండి తీవ్ర వ్యతిరేకత వ్యక్తమవుతోంది. ఈ చట్టం ప్రకారం, పాకిస్తాన్ సైన్యం లేదా నిఘా సంస్థలకు ఎటువంటి అభియోగాలు లేదా కేసులు లేకుండానే అనుమానితులను 90 రోజుల వరకు నిర్బంధించి, ఆ తర్వాత కోర్టులో హాజరుపరిచే అధికారం ఉంటుంది. పోలీసులు, నిఘా సంస్థలతో కూడిన సంయుక్త దర్యాప్తు బృందాలకు కోర్టుల ముందస్తు అనుమతి లేకుండానే తనిఖీలు నిర్వహించడానికి, వస్తువులను స్వాధీనం చేసుకోవడానికి, వ్యక్తులను నిర్బంధించడానికి అవసరమైన ఆదేశాలు జారీ చేసే అధికారం ఇచ్చారు.

మానవ హక్కుల ఉల్లంఘన ఆరోపణలు

న్యాయ వర్గాలు, మానవ హక్కుల సంఘాలు ఈ చట్టం పౌరులకు చట్టపరమైన రక్షణను దూరం చేస్తుందని హెచ్చరిస్తున్నాయి. కేవలం అనుమానం ఆధారంగా అరెస్ట్ చేయడం పై పౌర సమాజం నుండి తీవ్ర వ్యతిరేకత వస్తోంది. గతంలో రహస్యంగా జరిగిన ఇలాంటి చర్యలు ఇప్పుడు చట్టబద్ధం చేయడం పై ఆందోళన వ్యక్తం చేస్తున్నారు. అమ్నెస్టీ ఇంటర్నేషనల్, హ్యూమన్ రైట్స్ వాచ్ వంటి అంతర్జాతీయ మానవ హక్కుల సంస్థలతో పాటు స్థానిక మానవ హక్కుల సంస్థల ప్రకారం, ఈ చర్యలు అంతర్జాతీయ చట్టాలను, అలాగే పాకిస్తాన్ రాజ్యాంగ రక్షణలను ఉల్లంఘిస్తున్నాయి. బలూచిస్తాన్‌లో నిర్బంధాలు, అదృశ్యాలు ఆందోళన కలిగిస్తున్నాయి. చాలా కుటుంబాలు తమ తప్పిపోయిన బంధువుల కోసం సంవత్సరాలుగా వెతుకుతున్నాయి. ఈ అదృశ్యాల వెనుక ప్రభుత్వమే ఉందని ఆరోపణలు ఉన్నాయి. ఈ నేపథ్యంలో ప్రభుత్వం ఒక కొత్త చట్టాన్ని తీసుకురావడం బలూచ్ పౌరులలో మరింత భయాన్ని నింపుతోంది.