సెక్యూరిటీ ఇవ్వడానికి నానా పాట్లు పడుతున్న పాక్

అమెరికా, ఇరాన్ దేశాల మధ్య నెలకొన్న ఉద్రిక్తతలను తగ్గించి శాంతిని నెలకొల్పేందుకు పాకిస్థాన్ వేదికగా మారుతోంది. ఇస్లామాబాద్‌లో జరగనున్న ఈ చారిత్రాత్మక చర్చల కోసం పాక్ ప్రభుత్వం కనీవినీ ఎరుగని రీతిలో ఏర్పాట్లు చేస్తోంది. అయితే ఇప్పటికే పీకల్లోతు ఆర్థిక కష్టాల్లో ఉన్న పాకిస్థాన్‌కు ఈ ఆతిథ్యం ఒకవైపు ప్రతిష్టాత్మక అంశంగా మారుతుండగా మరోవైపు సామాన్యుడి నడ్డి విరుస్తోంది.

నగరమంతా భద్రతా వలయం.. 'బ్లూ బుక్' అమల్లోకి..

ఈ చర్చల నేపథ్యంలో పాకిస్థాన్ రాజధాని ఇస్లామాబాద్‌ను సైన్యం తన ఆధీనంలోకి తీసుకుంది. అత్యంత ప్రతిష్టాత్మకమైన ‘బ్లూ బుక్’ ప్రోటోకాల్‌ను ప్రభుత్వం అమలు చేస్తోంది. సాధారణంగా దేశాధినేతలు లేదా అత్యున్నత స్థాయి వీవీఐపీలు పర్యటించే సమయంలో మాత్రమే వాడే ఈ ప్రోటోకాల్ కింద భద్రత బాధ్యతలను నేరుగా సైన్యం,రేంజర్స్ పర్యవేక్షిస్తున్నారు. ముఖ్యంగా అమెరికా ఉపాధ్యక్షుడు జేడీ వాన్స్ బృందం ఈ పర్యటనలో పాల్గొంటుండటంతో భద్రతా చర్యలు మునుపెన్నడూ లేనంత కఠినంగా ఉన్నాయి. పోలీసు, రేంజర్స్ , సైనిక విభాగాల మధ్య సమన్వయంతో మూడు అంచెల రక్షణ కవచాన్ని ఏర్పాటు చేశారు. నగరమంతటా స్నైపర్లు, హై-రిజల్యూషన్ సీసీటీవీ కెమెరాలు, మొబైల్ సిగ్నల్ జామర్లను మోహరించారు. ఇస్లామాబాద్‌లోని ప్రధాన రహదారులను మూసివేసి వీఐపీల కోసం ప్రత్యేక కారిడార్లను ఏర్పాటు చేశారు. ప్రముఖ సెరెనా హోటల్‌ను పూర్తిగా హై-సెక్యూరిటీ జోన్‌గా మార్చి సామాన్యుల ప్రవేశాన్ని నిషేధించారు.

ప్రజలపై పెను భారం.. చమురు ధరల బాదుడు

ఈ అంతర్జాతీయ ఈవెంట్ నిర్వహణ పాకిస్థాన్ ఖజానాకు భారీ చిల్లు పెడుతోంది. అందిన సమాచారం ప్రకారం.. ఈ చర్చల కోసం పాక్ ప్రభుత్వం సుమారు ₹220 కోట్లు (పాకిస్థాన్ రూపాయిల్లో భారీగా) ఖర్చు చేస్తోంది. ఆర్థిక సంక్షోభంలో ఉన్న దేశానికి ఇది ఊహించని భారం. ఈ ఖర్చును భర్తీ చేసేందుకు పాక్ ప్రభుత్వం ప్రజలపై భారాలను మోపుతోంది. ఇటీవల పెట్రోల్, డీజిల్ ధరలను లీటర్‌కు ఏకంగా 127 రూపాయల వరకు పెంచడం గమనార్హం. తమ దైనందిన జీవితం గడవడమే భారంగా ఉన్న తరుణంలో ప్రభుత్వం ఇలాంటి ఖరీదైన దౌత్యానికి ప్రాధాన్యత ఇవ్వడంపై స్థానిక ప్రజల్లో అసహనం వ్యక్తమవుతోంది.

పాక్ వ్యూహం.. శాంతిదూత ఇమేజ్ కోసం ఆరాటం..

అంత ఆర్థిక ఇబ్బందుల్లో ఉండి కూడా పాకిస్థాన్ ఇంతటి సాహసం ఎందుకు చేస్తోంది? దీని వెనుక లోతైన దౌత్య వ్యూహాలు ఉన్నాయని విశ్లేషకులు చెబుతున్నారు. అంతర్జాతీయంగా ఉగ్రవాద ఆరోపణలు ఎదుర్కొంటున్న పాకిస్థాన్ ఈ చర్చల ద్వారా తనను తాను "శాంతిదూత"గా మార్చుకోవాలని భావిస్తోంది. అమెరికా-ఇరాన్ మధ్య మధ్యవర్తిత్వం వహించడం ద్వారా అమెరికాతో సంబంధాలను మెరుగుపరుచుకోవాలని, తద్వారా వరల్డ్ బ్యాంక్, ఐఎంఎఫ్ వంటి సంస్థల నుండి సులభంగా రుణాలు పొందాలని పాక్ భావిస్తోంది. దక్షిణాసియాలో తన ప్రాముఖ్యతను చాటుకోవడానికి ఈ చర్చలను ఒక గొప్ప అవకాశంగా పాక్ ప్రభుత్వం పరిగణిస్తోంది.

మొత్తానికి ఇస్లామాబాద్ వేదికగా జరుగుతున్న ఈ చర్చలు అటు అమెరికాకు, ఇటు ఇరాన్‌కు ఎంత ముఖ్యమో గానీ, పాకిస్థాన్‌కు మాత్రం ఇది ఒక అగ్నిపరీక్ష లాంటిదే. ప్రజల సొమ్మును కోట్లలో ఖర్చు చేసి నిర్వహిస్తున్న ఈ "శాంతి ప్రయత్నం" పాకిస్థాన్ ఆర్థిక వ్యవస్థకు ఊపిరి పోస్తుందా లేక మరింత సంక్షోభంలోకి నెడుతుందా అన్నది వేచి చూడాలి. ప్రస్తుతం మాత్రం ఇస్లామాబాద్ ఒక అభేద్యమైన కోటను తలపిస్తోంది.