షెహబాజ్ సర్కార్‌కు కష్టకాలం.. భారత్ దాడి.. ప్రజల తిరుగుబాటు!

భారత్ చేపట్టిన ఆపరేషన్ సింధూర్ ఎయిర్ స్ట్రైక్ తర్వాత పాకిస్తాన్ రాజధాని ఇస్లామాబాద్‌లో బుధవారం ప్రధాన మంత్రి షెహబాజ్ షరీఫ్ నేతృత్వంలో నేషనల్ సెక్యూరిటీ కమిటీ (NSC) కీలక సమావేశం జరిగింది. సమాచారం ప్రకారం ఈ సమావేశం దాదాపు రెండు గంటల పాటు కొనసాగింది. ఇందులో పాకిస్తాన్ సైనిక, ఉన్నత స్థాయి నాయకులు పాల్గొన్నారు. ఈ సమావేశంలో కేవలం భారత దాడికి ఎలా సమాధానం చెప్పాలనే దాని మీదనే కాకుండా ప్రజల ఆగ్రహం, విశ్వాసం లేకపోవడంపై కూడా చర్చ జరిగింది.

సమాచారం ప్రకారం.. సమావేశంలో షెహబాజ్ ప్రభుత్వం కేవలం బయటి దాడిని మాత్రమే కాకుండా, లోపలి నుండి కూడా వ్యతిరేకతను ఎదుర్కొంటోందని తేలింది. ప్రభుత్వం అన్ని రంగాల్లో విఫలమవుతోందని ప్రజలు భావిస్తున్నారు. సోషల్ మీడియా నుంచి వీధుల వరకు షెహబాజ్ ప్రభుత్వంపై ప్రశ్నలు వెల్లువెత్తుతున్నాయి. భారత్ వంటి పెద్ద దాడి చేసినప్పటికీ వారి స్పందన బలహీనంగా, అయోమయంగా ఎందుకు ఉందనేది ప్రజల ప్రశ్న.

ఎన్‌ఎస్‌సీ సమావేశంలో ఏం జరిగింది?

సమావేశంలో భారత దాడి తర్వాత పరిస్థితిపై సైన్యం తన నివేదికను సమర్పించింది. భారత్ పాకిస్తాన్‌లోని కోట్లి, బహవల్‌పూర్, మీర్‌పూర్, బాఘ్, మురీద్కేలలో క్షిపణి దాడులు చేసిందని నివేదికలో పేర్కొన్నారు. సైన్యం ప్రతిస్పందన చర్యల గురించి కూడా సమాచారం ఇచ్చింది. భవిష్యత్తు వ్యూహంపై చర్చించింది. ఈ సమయంలో దేశ ప్రజలను విశ్వాసంలోకి తీసుకోవడం ఇప్పుడు చాలా అవసరమని ప్రధాన మంత్రి షెహబాజ్ షరీఫ్‌కు సలహా ఇచ్చారు.

సాయంత్రం 4 గంటలకు షెహబాజ్ షరీఫ్ ప్రసంగం

సమావేశం తర్వాత ప్రధాన మంత్రి షెహబాజ్ షరీఫ్ బుధవారం సాయంత్రం 4 గంటలకు దేశాన్ని ఉద్దేశించి ప్రసంగిస్తారని నిర్ణయించారు. ఈ సమయంలో ఆయన భారత్‌పై ప్రభుత్వం తదుపరి వ్యూహాన్ని వెల్లడిస్తారని.. ప్రజలకు విశ్వాసం కలిగించడానికి ప్రయత్నిస్తారని భావిస్తున్నారు. అంతకుముందు ఏప్రిల్‌లో కూడా ఎన్‌ఎస్‌సీ సమావేశం జరిగింది. అప్పుడు భారత్ సింధు జలాల ఒప్పందాన్ని నిలిపివేస్తామని చెప్పింది. దానిని పాకిస్తాన్ యుద్ధ హెచ్చరికగా అభివర్ణించింది. ఇప్పుడు భారత్ నేరుగా సైనిక దాడి చేయడంతో పాకిస్తాన్ ముందు రెట్టింపు సవాలు ఉంది - ఒకవైపు సైన్యాన్ని సిద్ధం చేయడం, మరోవైపు ప్రజల విశ్వాసాన్ని గెలవాల్సి ఉంది.