కార్గిల్ వార్ తర్వాత తొలిసారి... పాకిస్థాన్ కీలక స్టెప్!

గత రెండు రోజులుగా భారత్ - పాక్ సరిహద్దుల్లో తీవ్ర ఉద్రిక్త పరిస్థితులు నెలకొన్న సంగతి తెలిసిందే. గతంలో ఎన్నడూ లేనివిధంగా అన్నట్లుగా పాక్ దూకుడు ప్రదర్శిస్తోందని అంటున్నారు. భారత పౌరులు, సైనిక స్థావరాలు లక్ష్యంగా డ్రోనులు, క్షిపణులు, ఫైటర్ జెట్లతో దూసుకు వస్తోంది. ఈ సమయంలో పాక్ సైన్యం మరో బిగ్ స్టెప్ వేసిందని అంటున్నారు.

అవును... 1999 కార్గిల్ యుద్ధం తర్వాత తొలిసారిగా పాక్ సైన్యం ముందుకు కదులుతోంది. ఇందులో భాగంగా... సరిహద్దు వెంబడి ఉన్న ప్రాంతాలకు పాకిస్థాన్ తన సైన్యాన్ని తరలిస్తోందని ప్రభుత్వం తెలిపింది. అయితే... భారత దళాలు సిద్ధంగా, అప్రమత్తంగా ఉన్నాయని రక్షణశాఖ వెల్లడించింది. ఇప్పటికే వరుసగా దాడులు చేస్తోన్న సంగతి తెలిసిందే.

ఇందులో భాగంగా.. గురువారం రాత్రి 36 ప్రాంతాల్లోనూ, శుక్రవారం రాత్రి 26 ప్రాంతాల్లోనూ పాక్ సైన్యం దాడులకు తెగబడిందని ప్రభుత్వం తెలిపింది. అయితే శుక్రవారం సైనిక స్థావరాలతో పాటు పౌర మైలిక సదుపాయాలను లక్ష్యంగా చేసుకుని దాడులకు ప్రయత్నించిందని వెల్లడించింది. మరోపక్క ఆరు పాక్ వైమానిక స్థావరాలపై భారత్ దాడులు చేసిందని తెలిపింది.

ఈ సందర్భంగా... పాకిస్థాన్ సైన్యం సరిహద్దు ప్రాంతాలకు తమ దళాలను వేగంగా పెద్ద ఎత్తున తరలిస్తున్నట్లు తెలుస్తోందని.. ఇది ప్రస్తుతం పరిస్థితిని మరింత తీవ్రతరం చేయాలనే ఉద్దేశ్యాన్ని సూచిస్తుందని.. అయితే భారత సాయుధ దళాలు ఈ విషయంలో పక్కగా సిద్ధంగా ఉన్నాయని.. శత్రు చర్యలను, శత్రు సైన్యాన్ని సమర్థవంతంగా ఎదుర్కొని తగిన విధంగా స్పందిస్తాయని తెలిపారు.

ఇదే సమయంలో... శనివారం తెల్లవారుజామున "ఆపరేషన్ బన్యన్ ఉల్ మర్సూన్" ను పాకిస్థాన్ ప్రారంభించిందని చెప్పిన కేంద్రం.. ఈ సందర్భంగా జమ్మూ కాశ్మీర్, రాజస్థాన్, పంజాబ్, గుజరాత్ లలోని సైనిక స్థావరాలతో పాటు స్కూళ్లు, హాస్పటల్స్ ను లక్ష్యంగా చేసుకుని డ్రోన్లు, క్షిపణులతో దాడి చేసిందని తెలిపారు.

ఇక.. ఈ ఆపరేషన్ పేరు విషయానికొస్తే... ఇది ఖురాన్ నుంచి తీసుకోబడింది. దీనర్ధం "విచ్ఛిన్నం కాని గోడ"! అల్ జజీరా ప్రకారం... "బున్యన్ మార్సూస్ అనేది అరబిక్ పదం కాగా.. దీనర్ధం "సీసంతో చేసిన నిర్మాణం"! అంటే... తనను తాను ఒక లక్ష్యం కోసం పోరాడుతున్న ఓ దుర్భేద్యమైన గోడ లేదా నిర్మాణంగా చిత్రీకరించుకోవాలని పాక్ కోరుకుంటుందన్నమాట!